குழந்தைகள் நலம்: கடையில் விற்கும் பால் பரிசுத்தமானதா?

அறிவியல் ஆய்வுகள் சொல்வதென்ன?

 


ஃபார்முலா பால்

குழந்தைகளுக்கான ஃபார்முலா பால் என்பது கடந்த தசாப்தங்களில் பல மாற்றங்களை கடந்துவந்துள்ளது. 19 மற்றும் 20ஆம் நூற்றாண்டுகளில், புட்டிப்பால் என்பது குழந்தைகளுக்கு நல்லதல்ல என்ற கருத்து இருந்தது. 1900-களில் ஆதரவற்ற குழந்தைகள் இல்லங்களில் புட்டிப்பால் கொடுக்கப்பட்ட 80 சதவீதத்திற்கும் அதிகமான குழந்தைகள் பிறந்து ஓராண்டுக்குள்ளேயே இறந்தன. சுத்தப்படுத்தப்படாத பாட்டில்களால் ஏற்படும் தொற்று, ஊட்டச்சத்துக் குறைபாடு ஆகிய காரணங்கள் இதற்கு முன்வைக்கப்பட்டன. 1865இல் முதன்முறையாக வணிக ரீதியாக 4 பொருட்களைக் கொண்டு (பசும்பால், கோதுமை, பார்லி மாவு, பொட்டாசியம் பைகார்பனேட்) ஃபார்முலா பால் தயாரிக்கப்பட்டது. அதன் ஊட்டச்சத்துகள் குறிப்பிட்ட முறையில் சுத்திகரிக்கப்பட்டவையாகும்.

 

இன்றைய ஃபார்முலா பாலில் என்ன இருக்கிறது?

ஃபார்முலா பாலில் கொழுப்புக்காக பசும்பால் அல்லது ஆட்டுப்பால் சேர்க்கப்படுகிறது. மேலும், பாமாயில், சூரியகாந்தி உள்ளிட்ட எண்ணெய் மற்றும் கொழுப்பு அமிலங்கள் ஆகியவை சேர்க்கப்படுகின்றன.

 

தாய்ப்பாலில் கார்போஹைட்ரேட் ஆதாரமாக லாக்டோஸ் இருக்கிறது. ஃபார்முலா பாலில் க்ரீம் நீக்கப்பட்ட பால் மாவு சேர்க்கப்படுகிறது. சோளம் அல்லது உருளைக்கிழங்கிலிருந்து எடுக்கப்படும் மால்டோடெக்ஸ்ட்ரினும் சேர்க்கப்படும்.

 

ஃபார்முலா பாலில் சேர்க்கப்படும் புரதத்தின் அளவு பசும்பால் அல்லது ஆட்டுப்பாலை பொறுத்து மாறுபடுகிறது. இரண்டும் இல்லாமல் தாவர அடிப்படையில் தயாரிக்கப்படும் பாலில் சோயா புரதமாக பயன்படுத்தப்படுகிறது. , டி, பி மற்றும் கே போன்ற வைட்டமின்கள், கால்சியம், மக்னீசியம், இரும்புச்சத்து, ஜிங்க் உள்ளிட்டவையும் ஃபார்முலா பாலில் இருக்கின்றன.

 

ஃபார்முலா பாலில் நச்சுத்தன்மை வாய்ந்த ரசாயனங்களும் இருக்கின்றன.

 

கன உலோகங்கள்

அமெரிக்காவில் செயல்பட்டுவரும் லாப நோக்கற்ற அமைப்பான க்ளீன் லேபெல் ப்ராஜெக்ட் 2017ஆம் ஆண்டில் 86 ஃபார்முலா பால் மாதிரிகளை ஆய்வு செய்ததில் அதில் சுமார் 80 சதவீத மாதிரிகளில் பூச்சிக் கொல்லிகள், கன உலோகங்கள் இருந்தது கண்டுபிடிக்கப்பட்டது. சோயா அடிப்படையிலான ஃபார்முலா பாலில் பேட்டரிகளில் காணப்படும் புற்றுநோயை உண்டாக்கக்கூடிய உலோகமான காட்மியம், மற்ற ஃபார்முலா பாலைவிட 7 மடங்கு அதிகமாக இருந்தது கண்டுபிடிக்கப்பட்டது.

 

மேலும் ஃபார்முலா மாவை கலக்க பயன்படுத்தப்படும் குழாய் நீரிலும் உடலுக்குக் கேடு விளைவிக்கும் ரசாயனங்கள் கலந்துள்ளன. இவை பழைய குழாய்களால் நீர் மாசடைவதால் ஏற்படுவதாகும்.

எனினும், "குடிநீரில் உள்ள கன உலோகங்களை நாம் நீக்கினாலும் ஃபார்முலா பாலால் ஏற்படும் பிரச்னைகளை பாதிதான் நாம் தீர்க்கிறோம்," என க்ளீன் லேபெல் ப்ராஜெக்டின் செயல் இயக்குனரும் சூழலியல் உயிரியலாளருமான ஜாக்கி போவென் தெரிவிக்கிறார்.

 

பாமாயில், சோயா ஆகியவை காட்டு வாழிடங்களை அழித்து உற்பத்தி செய்யப்படுவதால், அவற்றிலும் சூழலியல் தாக்கங்கள் உள்ளன. இதற்கான ஒரு தீர்வாக இயற்கை பொருட்கள் மூலம், உள்ளூரிலேயே கூடுமானவரை ஃபார்முலா பால் தயாரிப்பதை சிலர் பரிந்துரைக்கின்றனர்.

 

நுண்ணுயிர்கள்

குழந்தையின் குடல் நுண்ணுயிர்களின் வளர்ச்சிக்கான "முக்கிய ஆதாரமாக" தாய்ப்பால் விளங்குகிறது என, லண்டனில் உள்ள குழந்தை ஊட்டச்சத்து நிபுணர் எமிலி ப்லோக்சாம் கூறுகிறார். தாயிடமிருந்து குழந்தைக்குக் கடத்தப்படும் ஆன்டிபாடிகள், ஆரோக்கியமான குடல் நுண்ணுயிர்கள் ஆகியவற்றை இன்றுவரை ஃபார்முலா பாலில் செயற்கையாக உற்பத்தி செய்யப்படவில்லை.

 

"குழந்தையின் குடல் நுண்ணுயிர்களில் உள்ள ஆரோக்கியமான பாக்டீரியாக்கள், குழந்தையின் நோயெதிர்ப்பு திறனுக்கு அவசியமான புரோ பயோடிக்காக விளங்குகிறது.

 

ஆய்வகங்களில் உற்பத்தி செய்யப்படும் பால்?

தாய்ப்பாலின் அம்சங்கள் சிலவற்றை அப்படியே பிரதிபலிக்க, தாய்ப்பாலை உற்பத்தி செய்யும் செல்களை, ஆய்வகத்தில் வளர்ப்பது ஒரு வழியாக பார்க்கப்படுகிறது. அதனை இப்போதுதான் அறிவியல் ஆராய்ச்சியாளர்கள் ஆய்வு செய்யத் தொடங்கியுள்ளனர்.

 

வட கரோலினாவில் தொடங்கப்பட்டுள்ள பயோ மில்க் என்ற ஆய்வகம், செல் உயிரியலாளர் லைலா ஸ்ட்ரிக்லாண்ட் தன் குழந்தைக்கு போதுமான தாய்ப்பாலை வழங்க முடியாத போது அமைத்த ஆய்வகமாகும். அக்குழுவினர், மனிதர்களின் மார்பகங்களில் உள்ள திசுக்கள் மற்றும் தாய்ப்பாலில் உள்ள செல்களை எடுத்து ஃப்ளாஸ்க்குகளில் வைத்து வளர்க்கின்றனர். பல்வேறு விதமான சத்துக்கள், வைட்டமின்கள் அவற்றுக்கு அளிக்கப்பட்டு, பின்னர் ஒரு இன்க்யூபேட்டர் வழியாக அவை அடைகாக்கப்பட்டு, இயற்கையாக தாய்ப்பாலில் உள்ள கூறுகளை சுரக்க வைக்கின்றனர். எனினும், இத்தகைய பால் சந்தைக்கு வருவதற்கு சில ஆண்டுகள் ஆகும். மேலும், அது தாய்ப்பாலுக்கு இணையான ஒன்றாக இருக்க முடியாது.

 

மேலும், பசுக்கள், ஆடுகள், செம்மறி ஆடுகள், ஒட்டகங்கள் போன்ற பாலூட்டிகளின் பாலில் உள்ள செல்களை ஆய்வகங்களில் வைத்து வளர்த்துவரும், சிங்கப்பூரை சேர்ந்த டர்ட்டிள் ட்ரீ லேப்ஸ், தற்போது மனிதர்களின் பால் கூறுகளையும் ஆய்வகத்தில் வைத்து வளர்க்கத் தொடங்கியுள்ளது.

 

எனினும், தாய்ப்பால் மாறும் தன்மை கொண்டதால், அதன் சில கூறுகள் இன்னும் முழுமையாக புரிந்துகொள்ளப்படவில்லை என, லண்டன் காலேஜ் பல்கலைக்கழகத்தின் குழந்தை ஊட்டச்சத்து நிபுணரான ஃபியூட்ரெல் கூறுகிறார்.

 

"தாய்ப்பால் கொடுப்பதால் தாய் மற்றும் குழந்தைக்கு ஏற்படும் நன்மைகள், அதிலுள்ள ரசாயனங்களால் ஏற்படும் அபாயங்களை விட அதிகமாக இருக்கும் என்பதால், முடிந்தவரை தாய்ப்பால் கொடுப்பதை ஊக்குவிப்பேன்" என, ஊட்டச்சத்து நிபுணர் ப்லோக்சம் என்னிடம் தெரிவித்தார்.

 

நம் குழந்தைகளுக்கு எப்படி பாதுகாப்பான ஊட்டச்சத்தை வழங்குவது என்பது மட்டும் அல்ல இப்போதைய கேள்வி. அவர்களுக்கும் வருங்கால சந்ததியினருக்கும் பாதுகாப்பான, வாழக்கூடிய சூழலை எவ்வாறு வழங்குவது மற்றும் முழு உணவுச் சங்கிலியிலும் மாசுபாட்டைக் குறைப்பது என்பதை பற்றியும்தான்.

 

முதலில் குறைவான தீங்கு விளைவிக்கும் ரசாயனங்களைப் பயன்படுத்துவதன் மூலம் பால் தயாரிப்புதொடங்க வேண்டும் என்பது- ஒரு பதிலாக நிச்சயம் இருக்கும்.

நன்றி:-அனா டர்ன்ஸ்/பிபிசி ஃப்யூச்சர்

பழகத் தெரிய வேணும் – 27


-கேள்விகள் ஏன்? எப்போது?-

பொதுக்கூட்டங்களில், சொற்பொழிவாளர், “ஏதாவது கேட்பதானால் கேளுங்கள்,” என்பார்.

 

பலர் மௌனம் சாதிப்பார்கள். தம் ஐயம் மடத்தனமாக இருந்துவிட்டால் என்ன செய்வது என்ற அச்சமே காரணம்.

 

பள்ளி வகுப்புகளிலும் இதே கதிதான்.

 

பலரும் படிப்பில் சோடை போவது ஏன் தெரியுமா?

 

கேள்வி கேட்டு மாட்டிக்கொள்ள விரும்பாது, அதற்கான பதிலையும் ஆர்வத்துடன் எதிர்பார்க்கும் தன்மை இல்லாததால்தான்.

 

குழந்தைகள் மூன்று வயதிலிருந்து கேள்விகள் கேட்க ஆரம்பிக்கிறார்கள்.

 

வீட்டிலிருக்கும் தாய்மார்கள் வேலை மும்முரத்தில், ‘தொணதொணப்புஎன்று திட்டி குழந்தைகளை அடக்கிவிடுவார்கள்.

 

கேள்வி கேட்பதே தவறுஎன்று அக்குழந்தைகள் மனதில் படிந்துவிட, புதிய சமாசாரங்களை அறிவதில் நாட்டமில்லாமல் வளர்கிறார்கள்.

 

அவள் கேட்டதையெல்லாம் வாங்கிக்கொடுத்தேன். ஏனோ இப்படி இருக்கிறாள்!’ என்று சில பெற்றோர் குறைப்படுகிறார்கள்.

 

குழந்தைகளுக்காகச் செலவிடும் பணம் முக்கியமில்லை. அவர்கள் எதையாவது அறிய ஆர்வம் காட்டுவார்கள். அப்போது மேலெழும் ஆர்வத்திற்குத் தடைவிதிக்காது, அவர்களுடைய சந்தேகங்களை அவ்வப்போது தீர்த்துவைக்க நேரத்தையும் ஒதுக்கவேண்டும்.

 

கதைகள்:

1. மூன்று வயதுச் சிறுமி தன் தாயின் மார்பகத்தைச் சுட்டிக் கேட்டாள், “ஏன் ஒனக்கு மட்டும் இது பெரிசா இருக்கு? நான் அப்படி இல்லியே!”

வயதுக்கு மீறிய கேள்வி என்று கருதி, தாய் கோபிக்கவில்லை. புரியாத விஷயங்களைத் தெரிந்துகொள்ள வேறு என்ன வழி?

நீயும் பெரியவளா ஆனா, என்னைப்போல இருப்பே!” என்று சமாதானப்படுத்தினாள்.

 

2. ஆறு வயதுச் சிறுவன் ஒருவன் தன் வீட்டுக்கு வந்திருந்த பெண்ணைப் பார்த்து, “ஒங்க கைக்கு அடியிலே ஏன் இப்படி வளர்ந்திருக்கு?” என்று கேட்டான். (அவள் கையில்லாத ரவிக்கை அணிந்திருந்தாள்).

தாய்க்குத் தர்மசங்கடமாகப் போய்விட்டது. அதை மறைக்க, ‘ரொம்ப அசடாப் போயிட்டே!’ என்று மகனைப் பார்த்துக் கத்தினாள்.

குழந்தைகளுக்குத்தான் அப்படி இருக்காது. பெரியவர்களுக்கு..,” என்று அவனுக்குப் புரியும் விதத்தில் விளக்கியிருக்கலாம். ஆனால், அவளைப் பொறுத்தவரை, இதெல்லாம் கெட்ட சமாசாரம். (இயற்கை வளர்ச்சியை இப்படி மறைத்தே குழந்தைகளின் ஆர்வத்தைத் தூண்டிவிடுகிறோம்).

 

3. ஏழு வயதுச் சிறுவன் தன் தாயைக் கேட்டான், “அம்மா! ஏன் சில பேர் பிரஷர் குக்கரைப் பயன்படுத்துகிறார்கள்?”

அவர்கள் வீட்டில் குடியிருந்த நான் சமையலுக்கு அதைப் பயன்படுத்துவதைப் பார்த்துக் கேட்டிருக்கிறான்.

தனக்குத் தெரியாது என்பதை ஒத்துக்கொள்ள விரும்பாத தாய், அறியும் ஆர்வம் இருந்த மகனைக் கண்டித்தாள்: “நீ கேக்கறதுக்கெல்லாம் பதில் சொல்லிக்கிட்டு இருந்தா விடிஞ்சுடும், போ!”

நான்தான் கேள்விகளுக்குப் பதிலளிக்கும் ஆசிரியை ஆயிற்றே! “விரைவாக வேகும்,” என்று இரண்டே வார்த்தைகளில் விளக்கினேன்.

பையனது முகம் சுண்டிப்போயிற்று. தன் அம்மாவுக்குத் தெரியாதது வேறொரு அம்மாவுக்குத் தெரிந்திருக்கிறதே என்ற வருத்தம்தான்.

 

எங்கள் அம்மாக்கள் முட்டாள்கள். அதனால்தான் நாங்கள் இப்படி இருக்கிறோம்!’ என்று என் மாணவிகளில் சிலர் தன்னிரக்கத்துடன் கூறியிருப்பது நினைவில் எழுந்தது.

 

தற்காலத்தில், நாம் அறிய வேண்டுவன எல்லாவற்றையும் தெரிந்துகொள்ள கணினி வழிவகுக்கிறது. அது மட்டும் போதுமா?

 

முதன்முறையாக வெளியூருக்கோ, வெளிநாட்டுக்கோ செல்லுமுன் பயண ஏடுகளைப் புரட்டிப் பார்ப்போம். சென்றபின், அங்கு பார்க்கவேண்டியவை வேறு ஏதாவது உள்ளதா என்று அங்குள்ளவர்களைக் கேட்டும் தெரிந்துகொள்ளலாம்.

 

ஆனால், சகபயணிகளின் உயிரை வாங்கி தம் அறிவைப் பெருக்கிக்கொள்ள நினைப்பவர்கள் பிறரது அமைதியைக் குலைப்பவர்கள்.

 

கதை:

நானும் என் மகளும் கிழக்கு மலேசியா (போர்னியோ) சென்றிருந்தோம். அங்கிருந்து கடலில் படகுப் பயணம்ஒரு காட்டுப் பகுதியில் தங்குவதற்கு.

எங்களுடன் ஒரு வெளிநாட்டுப் பெண்ணும் படகில் இருந்தாள். அறிமுகம் முடிந்ததும், ஓயாது ஏதேதோ கேட்டபடி இருந்தாள்.

அநாவசியமாக எதையாவது கேட்டு வைப்பவர்களுக்குப் பதிலில் அக்கறை கிடையாது. அது பொழுதைப் போக்க ஒரு வழி. அவ்வளவுதான்.

இந்துப் பெண்கள் கல்யாணமானதும்தான் சிவப்பு நிறப் பொட்டு அணியலாம் என்று கேள்விப்பட்டேன். அப்படியா?”

தைப்பூசம் எதற்காகக் கொண்டாடுகிறார்கள்?” என்று விசாரித்தபடி இருந்தாள்.

எனக்கோ, ரம்மியமான சூழ்நிலையைப் பார்த்து ரசிக்க முடியாது போகிறதே என்ற எரிச்சல்.

இறுதியில், பொறுக்க முடியாது போக, “Not now!” என்றேன் கறாராக.

அதன்பின் அவள் வாயைத் திறக்கவில்லை.

 

அப்படியில்லாது, ஒரு விஷயத்தில் உண்மையான ஆர்வத்துடன் கேட்பவருக்கோ பெரும்பாலும் தக்க பதில் கிடைக்கும்.

 

ஆனால், நம் கேள்வியால் அவரது அறிவை எடைபோடுகிறோமோ என்று தவறாக எண்ணிவிடுபவர்களும் உண்டு.

 

கதை:

நான் ஒரு காமெரா வாங்கி வைத்து, புத்தகங்களிலிருந்து புகைப்படக்கலையைக் கற்க முயன்று கொண்டிருந்தேன்.

காதரின் என்ற அமெரிக்க மாது தன் குழுவுடன் சேர ஒரு காமெரா இருந்தால் போதும், புகைப்படக்கலையைக் கற்கலாம் என்று தினசரியில் விளம்பரப்படுத்தி இருந்தாள்.

விடுவேனா! வாரத்தில் சில நாட்கள் அவர்களுடன் நான் கோலாலம்பூரில் பல இடங்களையும் சுற்றிப்பார்த்தேன்.

மற்றவர்கள் அனைவரும் சிறு வயதிலிருந்தே ஓரிரு முறை உபயோகப்படுத்திவிட்டு எறியும் புகைப்படக் கருவியைப் பயன்படுத்தி இருந்தவர்கள்.

எனக்கோ எதுவும் புரியவில்லை. புத்தகங்களில் பயிலாததைப்பற்றி கேள்விமேல் கேள்வி கேட்டபடி இருந்தேன்.

குழுத் தலைவி காதரின் விளையாட்டாக, “எனக்கு உன்னைப் பிடிக்கவில்லை. நீ நிறைய கேள்விகள் கேட்கிறாய்!” என்று குற்றம் சாட்டினாள்.

எனக்கு எதுவுமே தெரியாது. அதனால்தான்,” என்று ஒத்துக்கொண்டேன், பரிதாபகரமாக.

ஒரு நாள் இந்துக்கோயில் ஒன்றில் படம் பிடிக்கச் சென்றபோது, எங்களுடன் இணைந்து வந்த அயல்நாட்டுக்காரர்களுக்குஅவர்கள் கேளாமலேயேபார்த்ததையெல்லாம் விளக்கினேன்.

மகிழ்ந்த காதரின் என்னை அழைத்து, போட்டிகளில் பரிசுகள் வாங்கும் அளவிற்கு நிறைய கற்றுக்கொடுத்தாள். அவள் தன் நாட்டிற்குத் திரும்பிய பின்னரும் எங்கள் நட்பு நீடித்தது.

 

என்னதான் நடந்துவிடப்போகிறது?

 

நமக்குள் இக்கேள்வியைக் கேட்டுக்கொண்டால், இக்கட்டான சூழ்நிலைகளில் மனம் குழம்பும்போது உடனே நிம்மதி கிடைக்கும்.

 

கதை:

ஒரு பெண்நல்ல கலராகஇல்லாவிட்டால் அவளைப் பெண்பார்த்துவிட்டு, நிராகரிக்கும் ஆண்களைத்தான் அந்த பாட்டி பார்த்திருக்கிறாள்.

அதனால், தன் மகளுடைய சிறு குழந்தைகளைப் பார்த்ததும் அவளுக்குத் துக்கம் பெருகியது.

ரெண்டும் கறுப்பாப் பொறந்திருக்கே! இந்தப் பொண்களுக்கு எப்படித்தான் கல்யாணம் பண்ணிவைக்கப் போகிறாளோ!’ என்று அவர்களைப் பெற்ற மகளுக்காக வருந்தினாள்.

 

எதிர்காலத்தில் என்ன வேண்டுமானாலும் நடக்கலாம்.

 

அவர்களைவிட நிறம் மட்டமான ஆண் கிடைக்கலாம்.

 

புற அழகைவிட அவர்களுடைய அறிவாற்றலைப் பெரிதாக எண்ணும் மாப்பிள்ளைகள் கிடைக்கலாம்.

 

அவ்வளவு ஏன், பெரிய படிப்புப் படித்து, உத்தியோகமே வாழ்க்கை என்று வாழக்கூட நினைக்கலாம் அப்பெண்கள்.

 

எப்போதோ நடக்கலாம் என்பதை எண்ணி இப்போதே வருந்துவானேன்!

 

பரீட்சையில் சரியாக எழுதவில்லையே, பாசாகித் தொலைக்காமல் இருந்தால் என்ன செய்வது!’

 

பரீட்சை முடிவு வருவதற்குள் அநாவசியமாக அதைப்பற்றி எண்ணிக் குழம்புவானேன்! அப்படியே தேர்ச்சி பெறாவிட்டால், இன்னொரு முறை எழுதிவிட்டுப் போகிறது!.

 

என்ன நான் சொல்வது?

நிர்மலா ராகவன்-/-எழுத்தாளர் / சமூக ஆர்வலர்-/- மலேசியா.