சித்தர் சிந்திய முத்துகள் ...........3/46

 


சித்தர் சிவவாக்கியம் -336

ஆண்மை ஆண்மை ஆண்மை ஆண்மை கூறும் அசடரே

கான்மையான வாதி ரூபம் கால கால காலமும்

பான்மையாகி மோனமான பாசமாகி நின்றிடும்

நான்மையான நரலை வாயில் நங்குமிங்கும் அங்குமே.

     

ஆண்மை ஆண்மையென்று ஆண்மை பேசுகின்ற அசடர்களே! பெண்மை இல்லாத ஆண்மை வந்தது கிடையாது. உங்களின் உடலிலே காணும் ஆதியான வாலை ரூபம்தான் காலா காலமும் யாவருக்கும் இருந்து வருகின்றது. அதுவே பாங்கான வண்ணம் மூன்றாகி பசுபதி பாசமாகி நின்றிடும். அந்த வாலை நாறாத யோனியில் நாற்றம் இல்லாத நரலைவெளி வரும் வாசலில் தங்கி இருப்பதை இங்கும் அங்கும் எங்குமே அவளால் ஆகி நிற்பதை அறிந்து கொள்ளுங்கள்.

 

சித்தர் சிவவாக்கியம் - 339

ஞானி ஞானி என்றுரைத்த நாய்கள் கோடி கோடியே

வானிலாத மழை நாளென்று வாதி கோடி கோடியே

தானிலாத சாகரத்தின் தன்மை கானா மூடர்கள்

முனிலாமல் கோடி கோடி முன்னறிந்த தென்பரே.

   

தன்னையே ஞானி ஞானி என்று சொல்லித் திரிந்து நின்ற பேர்கள் கோடி கோடியாக நாயாகி பிறப்பார்கள். வானில் இல்லாத மழை நீரே அமுரி என்று நாள்தோறும் கூறி அதனை தேடித் தேடி அலையும் வாதிகளும் கோடி கோடியாக வருவார்கள். தன்னந்தனியாக தனக்குள் இருக்கும் தங்கத்தின் தன்மையை அறிந்து காணாத மூடர்கள் தங்கள் முன்னேயே உள்ளதை உணராமல் நாங்கள் அனைத்து இரகசியங்களையும் முன்னமே அறிந்தவைகள்தான் என்று பேசியே மாண்டவர்களே கோடி கோடியாவார்கள்.  

 

 

சித்தர் சிவவாக்கியம் - 340

சூட்சமான கொம்பிலே சுழிமுனைச் சுடரிலே

வீச்சமான வெயிலே விபுலை தாங்கும் வாயிலே

கூச்சமான கொம்பிலே குடி இருந்த கோவிலே

தீட்சையான தீவிலே சிறந்ததே சிவாயமே.    

 

உடம்பில் சூட்சமான இடத்தில் கொம்பாக உள்ள சுழி முனையில் உள்ள தீயான சுடரிலே வீசிக்கொண்டு ஆடிய உயிரில் வாலை தங்கிப் பத்தாம் வாசலில் கூச்சம் மிகுந்திருக்கும் கொம்பிலே குரு குடியிருந்த கோயிலான கோனாகிய இடத்திலே தொட்டுக் காட்டி தீட்சை வழங்கிய சோதி விளங்கிய இடத்தில் சிறந்து இருந்த அது சிவமே என்பதை அறியுங்கள்.

    

கே எம் தர்மா &கிருஷ்ணமூர்த்தி 

பொன்பொழிய ஒரு சுவாமி ........

பொன்னையரும், சின்னையரும்,  கண்ணையரும், அன்னையரும்

 பொன்னூர், நன்னூர் , கண்ணூர்

 என்றென்று எந்நாளும்

கண்ணுயர்த்தும் மண்ணூர் ஒன்றில்,

 பொன் மாளிகை ஒன்றை

பின்வாசல். முன்வாசல்,

 தன் வாசல், பன்வாசல்

 என்றென்று நன்னாக

பொன்னாலே வடிவமைத்து,

தன்னறையும், பின்னறையும்,

சின்னறையும், கன்னறையும்

 மின்னும் பொன்னாலே

அன்றாடம் மிக நிரப்பி,

பொன்மண்டபம் ஒன்றைப்

பொன் சோடனை செய்து,

வண்ணமயமான பொன்தீபம்

 கண்ணில் மின்ன, 

பொன் சாமரை தன்னை

அன்போடு வீசிவிட,

பொன்னாபரணங்கள் நன்னாகவே அணிந்து, பொன்கோல் கரம் கொண்டு,

 பொன் தீபம் ஏற்று,

பொன் மலர் தூவ,

பொன் மாலையிட்டு,

 நன்காவல் சூழ,

உன்னதமான பொன் மேடை தன்னில், சின்னனே இல்லாத பொன் சிம்மாசனத்தில் தன்னாக, பொன்னாக,

கண்ணாக வீற்றிந்து,

தன்னாலே இந்நாளும்,

அந்நாளும், எந்நாளும்

எல்லாமே நன்னாய் முடியும் என்று முன்னாலே நின்னிருக்கும் பன்னாயிரத்தினருக்கு,

பொன் வாய்தனைத்

திறந்து சொன்னாரே என்பதனால்,

 தன்னுள் நின்னிருக்கும்

புண்களையும், பெண்களையும்,

 சிண்களையும் கண்கொண்டும்,

தன்வினை ஒன்றையும்

நீக்கவே இயலாது

துன்பத்தில் கண்கெட்டுநின்றாலும்,

பொன்மலச் செம்மல்

 பொன்வாய் தன்னைத் திறந்து நன்னாக சொன்னாரே என்பதனால்,

நன்னாகக் கண்ணிருந்து சொன்னாலும்,

ஒன்றும் பண்ணாது,

நாமெல்லாம்  எந்நாளும் பின் சென்று, பன்னாட்டு மொழிகளிலே

மென்மைமிகு  பண்பாடல் பல பாடிப், பண்புடனும், அன்புடனும்,

பணிவுடனும் பொன் சாமியின் முன்

 பொன் கேட்டும், மண் கேட்டும்,

பெண் கேட்டும், கண் கேட்டும்

பொன்விழாக் கண்டு 

அன்றாடம் கொண்டாடி

 மன்றாடி வேண்டிடுவோம்!

 

ஒரு வசனம் ஆக்கம்: செல்வதுரை சந்திரகாசன்

வண்ணத்திரையில் இவ்வாரம் ....

 


தியேட்டர் அதிபர்களுக்கு அதிர்ச்சி

கொரோனா ஊரடங்கில் தியேட்டர்கள் பல மாதங்களாக மூடிக்கிடப்பதால் ஓ.டி.டி. தளங்கள் வளர்ச்சி பெற்றுள்ளன. தமிழ், தெலுங்கு, இந்தி, மலையாள மொழிகளில் திரைக்கு வர தயாராக இருந்த முன்னணி நடிகர்களின் பல படங்கள் ஓ.டி.டி. தளங்களில் வெளியாகி தியேட்டர் அதிபர்களுக்கு அதிர்ச்சி ஏற்படுத்தி வருகின்றன.

தியேட்டர் தொழில் முடங்கி விடுமோ? என்ற அச்சம் நிலவுகிறது. ஏற்கனவே தமிழில் சூரரை போற்று, பூமி, க.பெ.ரணசிங்கம், பொன்மகள் வந்தாள், பென்குயின், லாக்கப். டேனி உள்ளிட்ட பல படங்கள் ஓ.டி.டி.யில் வந்துள்ளன. சமீபத்தில் ஆர்யா நடித்துள்ள சார்பட்டா பரம்பரை படமும் ஓ.டி.டி.யில் வெளியானது. நயன்தாராவின் நெற்றிக்கண், ஐஸ்வர்யா ராஜேசின் திட்டம் இரண்டு படங்கள் ஓ.டி.டி.யில் வருகின்றன. அடுத்து விஜய்சேதுபதி நடித்துள்ள லாபம், ஜி.வி.பிரகாசின் ஐங்கரன், சிவகார்த்திகேயனின் டாக்டர் உள்ளிட்ட மேலும் பல படங்களையும் ஓ.டி.டி.யில் வெளியிட முயற்சிகள் நடக்கின்றன.

 

பிச்சைக்காரன்-2’

இசையமைப்பாளராகவும், நடிகராகவும் வெற்றிபெற்ற விஜய் ஆண்டனி, அடுத்து டைரக்டர் ஆகியிருக்கிறார்.

தனது சொந்த பட நிறுவனம் சார்பில், ‘பிச்சைக்காரன்-2’ என்ற படத்தை டைரக்டு செய்கிறார். இந்த தகவலை அவரே தெரிவித்தார்.

 

தாதா 87' ரீமேக்கை எதிர்த்து வழக்கு

சாருஹாசன், ஜனகராஜ், பாலாசிங், மாரிமுத்து ஆகியோர் நடித்து 2019-ல் வெளியான படம் தாதா 87. இந்த படத்தை விஜய் ஸ்ரீ இயக்கி இருந்தார். தற்போது தனது அனுமதி இல்லாமல் தாதா 87 படம் தெலுங்கில் ரீமேக் செய்யப்படுவதாக இயக்குனர் விஜய் ஸ்ரீ வழக்குத் தொடுக்க உள்ளார்.

 

''மின்னல் முரளி''

தமிழ், மலையாளம், இந்தி, தெலுங்கு, கன்னடம் ஆகிய 5 மொழிகளில்,  டோவினோ தாமஸ் நடிப்பில் பசில் ஜோசப் இயக்கத்தில் உருவாகும் படம் ''மின்னல் முரளி''.இதை சூப்பர் ஹீரோ படமாக எடுக்கின்றனர். அஜூ வர்கீஸ், குரு சோமசுந்தரம், ஹரிஶ்ரீ அசோகன் ஆகியோரும் நடிக்கின்றனர்.ஆனால் கொரோனா கட்டுப்பாடுகளை கடைப்பிடிக்காமல் மின்னல் முரளி படப்பிடிப்பு நடத்தப்படுவதாக புகார்கள் எழுந்தன. இதையடுத்து போலீசார் மின்னல் முரளி படப்பிடிப்பு தளத்துக்கு சென்று படப்பிடிப்பை நிறுத்தினர். படக்குழுவினர் மீது வழக்குப்பதிவும் செய்துள்ளனர்.

 

மீண்டும் சாய் பல்லவி

தற்போது தெலுங்கில் அதிக படங்களில் நடித்து வரும் சாய் பல்லவி ட்ரீம் வாரியர் நிறுவன தயாரிப்பில், கெளதம் ராமச்சந்திரன் இயக்கத்தில்,  தமிழில் ஒரு படத்தில் நடிக்க இருப்பதாக தகவல் வெளியாகியுள்ளது. மேலும் தமிழில் தற்போது நயன்தாரா எப்படி நடிகைக்கு மட்டும் முக்கியத்துவம் கொடுக்கும் கதாபாத்திரத்தில் நடிக்கிறாரோ அதேபோல் சாய்பல்லவி கதை தேர்வு செய்துள்ளார் என்பது குறிப்பிடத்தக்கது.

 

தடுமாறும் காவல் அதிகாரி

தமிழ் சினிமாவில் இளம் நடிகராக வலம் வருபவர் அதர்வா முரளி. இவர் விரைவில் வெளியாகவுள்ள "நவரசா" ஆந்தாலஜி திரைப்படத்தில் தைரியம் பற்றிய பகுதியில், இயக்குனர் சர்ஜுன் இயக்கியுள்ள "துணிந்த பின்" கதையில் அனுபவமில்லாமல் தடுமாறும் காவல் அதிகாரி 'வெற்றி' கதாபாத்திரத்தில் நடித்துள்ளார்.

 

கமல்ஹாசன்&விஜய் சேதுபதி

லோகேஷ் கனகராஜ் இயக்கத்தில் கமல் நடிப்பில் உருவாகி வரும் ‘விக்ரம்’ படத்தில் பிரபல நடிகர் இணைந்து இருக்கிறார்.

மாநகரம், கைதி, மாஸ்டர் என ஹாட்ரிக் ஹிட் படங்களை கொடுத்த லோகேஷ் கனகராஜ் அடுத்ததாக இயக்கும் படம் ‘விக்ரம்’. நடிகர் கமல்ஹாசன் ஹீரோவாக நடிக்கும் இப்படத்தில் விஜய் சேதுபதி, பகத் பாசில், நரேன் ஆகியோர் முக்கிய கதாபாத்திரங்களில் நடிக்க ஒப்பந்தமாகி உள்ளனர். இப்படத்தின் படப்பிடிப்பு சென்னையில் விறுவிறுப்பாக நடைபெற்று வருகிறது.

இந்நிலையில், நடிகர் ஜெயராமின் மகன் காளிதாஸ் விக்ரம் படத்தில் இணைந்திருக்கிறார். இதை இயக்குனர் லோகேஷ் கனகராஜ் உறுதிபடுத்தி இருக்கிறார். இப்படத்தில் கமல்ஹாசனுக்கு மகனாக காளிதாஸ் நடிக்க உள்ளதாக கூறப்படுகிறது.

-தொகுப்பு: செ.மனுவேந்தன்


இராவணன் நல்லவனா?..கேள்வி(04...09)

கேள்வி(04):-  ஏன் முனிவர்கள் எல்லாம் இராவணனைப் பார்த்து நடுங்கி விஷ்ணுவிடம் அவதாரமெடுக்கச் செய்யவேண்டும்?

முனிவர்கள் நடுங்கி விஷ்ணுவிடம் முறையிட்டனரா? பிரம்மரிஷி வஷிஸ்டர் நடுங்கியதாக தெரியவில்லை. பரசுராமரும் நடுங்கியதாகத் தெரியவில்லை. ராமன் பிறக்க யாகம் செய்ய வந்தாரே ரிஷ்யசிருங்கர் அவரும் நடுங்கவில்லை.. திரிலோக சஞ்சாரி நாரதரும் நடுங்கவில்லை.. விஷ்வாமித்ரரும் யாகத்திற்கு தசரத ராமனிடம் உதவி கேட்டாரே தவிர விஷ்ணுவை அவதரிக்கச் சொன்னதாக தெரியவில்லை.. ராமனும் காடுகளில் பலப்பல முனிவர்களை கண்டு வணங்கி வாழ்த்து பெற்றதாக அறிகிறோம். இவர்களெல்லாம் ராவணனால் தொல்லை செய்யப்பட்டனரா?

கேள்வி(05):-   முனிவர்களும் தேவர்களும் வாழ முடியாத ஓர் நாட்டை எப்படி சொர்க்க புரியாக ஏற்றுக் கொள்ள முடியும் ?

மனிதர்கள் வாழ்ந்தாலே அது நாடு. முனிவர்கள் தேவர்கள் தேவையில்லை..

 

கேள்வி(06):-இராவணன் ஆரம்பித்து இன்று வரை அங்கே நிம்மதி இல்லை! ஆக ராவணன் ஆட்சி என்று நான் சொன்னதில் தவறேது இருக்கமுடியும்?

 

அது ராவணன் ஆரம்பித்த நிம்மதி சீர்குலைப்பு இல்லை. அனுமன் ஆரம்பித்தது.. இலங்கையை காத்த இலங்கிணியை கொன்றது அனுமன் தானே.. இலங்கையை அதன் பின் பலப்பல மன்னர்கள் ஆண்டிருக்கின்றனர்.

கேள்வி(07):-வெறும் பேச்சினால், அனுமன் கோபத்தைக் கிளறிவிட்டு ஊரையே எரித்த ஓர் உத்தமன் ஆண்ட நாடு எவ்விதமய்யா சொர்க்கம்?

அசோகவனத்தை அழிக்கும் வானரத்தை, அழிக்க நினைப்பது எப்படி கெட்ட செயலாகும்? அது ராவணன் தவறா என்றா சொல்கிறீர் விபீஷணன் தவறல்லவா? யார் வந்து நான் தூதனென்றால் தூதன் ஆகிவிடுவானா? தூதனைக் கொல்லாதே என்று விபீஷணன் சொல்லாவிட்டால் அனுமன் வாலில் தீவைத்திருப்பானா? கேள்வி(08):-ஓர் தூதுவனை எப்படி நடத்த வேண்டுமென்பது கூட அறியாத ஓர் அரசன் நல்லவனா?

அனுமன் தூதுவன் என்று சொல்லிக் கொண்டான்.. ராமன் அரசன் அல்ல.. அரசபதவியை துறந்தவன்.. துறவிக்கு தூதன் ஏது? அயோத்தியின் அரசன் அப்போது செருப்பு.

கேள்வி(09):-முக்காலமும் உணர்ந்த விஷ்ணு, பிற்காலத்தில் இராவணன் கொடியவன் என்று அறிந்திருப்பான்.. அப்படியிருந்தும் ஓர் அவதாரம் எடுத்து இராவணனைக் கொல்ல நேரிடுகையில் எதன் அடிப்படையில் இராவணன் நல்லவனாகிறான்?

விஷ்ணு முக்காலமும் அறிந்தவரென்கிறீர்,ராவணன் என்று கெட்டவன் அறிந்திருக்கிறான்.. அதனால்தான் அவதாரம் எடுத்து வதைக்கிறான் என்றீர்.. எய்யும் அம்பை நோவானேன்.. ராவணனைப் படைத்த பிரம்மாவையே ஒழித்து விடலாமே.. இல்லை இல்லை சனகாதி முனிவர்களின் சாபத்திற்கு ஜெய விஜயர்களுக்கு வழங்கப்பட்ட வரம் என்கிறீரா அப்போது நல்லவர்களுக்கு இன்னல் விளைக்கும் வரம் தந்த விஷ்ணுதானே குற்றவாளி.. ராவணன் எப்படி குற்றவாளி...

 

18 வருடங்களாக தேவாசுர யுத்தம் நடந்தது. அதில் தேவர்கள் பக்கமாக தசரதர் போரிட்டார். சம்பாசுரன் என்ற அசுரனை எதிர்த்துப் போரிட்டபொழுது தேரின் அச்சாணி ஒடிந்து விழ தசரதனின் தேர் நிலைதடுமாறியது. தசரதனுக்கு தேரோட்டிய கைகேயி தன் கைவிரலை அச்சாணியாய் கொடுக்க போரில் தசரதன் வெற்றிபெற்றார். கைகேயியைப் பொற்றி இரண்டு வரம் தர முன் வர கைகேயி அதை நேரம் வரும்போது வாங்கிக் கொள்கிறேன் என்கிறாள்.. 

(கேள்விகள் தொடரும்...)............THAMARAI,VENTHAN