"காதல் வேண்டாம் போ" [சிறு கதை]



மாலை நேரம் மகாவலி ஆறு, பேராதனை வளாகத்தினூடாக, இன்று ஏனோ மெதுவாக ஓடுகிறது. தனது மனதை யாரிடமோ பறி கொடுத்தது போல தட்டுத் தடுமாறி ஓடிக்கொண்டு இருக்கிறது. சூரியன் தனது கதிர்களை மடக்கிக் கொண்டு ஆற்றில் குளிக்க போய் கொண்டு இருக்கிறான். பறவைகள் மரக் கிளைகளை நோக்கி ஆரவாரமாக பறந்து கொண்டு இருக்கிறது. வண்டுகள் மலர்களை சுற்றி ரிங்காரம் இடுகின்றன. காதலர்களை வரவேற்பது போல சந்திரன் பிரகாசமாக ஒளி பரப்பிய படி மேகத்தினுடாக எட்டிப் பார்க்கின்றான்.

 

ஒவ்வொரு நாளும் இந்த நேரம் தனது காதலனுடன் ஆற்றங்கரையில் உலா வரும் மூன்றாம் ஆண்டு கலைப் பீட மாணவி தமிழ்செல்வியை இன்று அங்கு காணவில்லை? கற்பாறைகளுக்கிடையில், தன்னை மேல் அங்கியால் இறுக்கமாக போர்த்துக் கொண்டு மகாவலியை  வெறுத்து பார்த்துக் கொண்டு நின்றாள் அவள். வாடைக்காற்றும் இன்று  கொஞ்சம் குளிராக வீசுகின்றது. அவள் நற்றிணை 174 சிலவரிகளை முணுமுணுத்துக் கொண்டிருந்தாள். 

 

"வீழாக் கொள்கை வீழ்ந்த கொண்டி

மல்லல் மார்பு மடுத்தனன்

புல்லு மற்று எவனோ அன்பு இலங்கடையே?"

 

அவள் மனதில் அமைதி இல்லை. யாரோ ஒரு முதலாம் ஆண்டு மருத்துவ பீட மாணவி ஜெயந்தியை, பகிடிவதை செய்யும் பொழுது தன் காதலன் நண்பியாக்கி விட்டான் என்ற செய்தி  அவளை துளைத்துக்கொண்டு இருந்தது. இங்ஙனம் வேறு ஒருவளிடம் அன்பு வைத்தவனுக்கு என்மேல் எப்படி அன்பு, கனிவு தோன்றும்?; அன்பு இல்லாமல் காமத்தை தணிக்க என்னை அவன் தழுவிக் கொள்வதனாலும் நான் வேறு வழி இன்றி அவனைத் தழுவிக் கொள்வதனாலும் என்ன பயன்? மீண்டும் மகாவலியை வெறுத்து பார்த்தாள். அவள் கண்களில் இருந்தே மகாவலி ஊற்று எடுப்பது போல் இருந்தது!

 

சட்டென்று யாரோ  அவளின் பட்டு போன்ற  நீண்ட கூந்தலை மெல்ல வருடுவதை உணர்ந்தாள். திடுக்கிட்டு திருப்பி பார்த்தாள். அவளின் வஞ்சக காதலன் தான் அங்கு நின்றான். அவள் துள்ளி எழும்பி , அவன் கையை தட்டிவிட்டாள். தனக்கேற்றவனாக கருதிய தலைவனை இன்று கோபத்துடன் பார்த்தாள். அவளின் சங்கு கைவளையல் மெல்ல நழுவி ஆற்றில் விழுந்தன. அதை அவள் பொருட்படுத்தவில்லை. அது அவளுக்கு இனி முக்கியமும் இல்லை.

 

ஆனால் அவளின் காதலனோ, தனக்கு கிடைத்த சந்தர்ப்பம் இதுவென, ஆற்றில் குதித்து, அதை எடுத்து, அவளை பின் தொடர்ந்து சமாதானப் படுத்த பல பொய்கள் சொல்ல தொடங்கினான். அவளுக்கு  சிரிப்பு தான் வந்தது. தன் காதலனை காண, தினம் சீவி சிங்காரித்து பொன்மகளென வரும் இவள் இன்று மகா காளியே வந்தது போல, தீ பாயும் கண்களுடன் அவனை பார்த்தாள். உன் புது காதலிக்கு இது என் பரிசு என்று சொல்லி அந்த வளையலை தட்டிவிட்டாள்.

 

அவள் கலைப்பீட மாணவி அல்லவா, அவள் மனதில் சிலப்பதிகாரத்தின் சில கானல் வரிகள் அம்பு போல் அவள் நெஞ்சை குத்திக்கொண்டு இருந்தன. ஐயனே. கடலில் தோன்றும் சங்கையும் முத்துக்களையும் பார்த்து வானத்து நிலாவும் மீன் கூட்டமும் என்று எண்ணிக்கொண்டு ஆம்பல் ஏமாந்து பூக்கும் போல் நான் ஆகிவிட்டேனே ? [விரி கதிர் வெண் மதியும் மீன் கணமும் ஆம் என்றே, விளங்கும் வெள்ளைப்புரி வளையும் முத்தும் கண்டு-ஆம்பல் பொதி அவிழ்க்கும்] அவள் தன்னையே நொந்தாள், அவன் ஏதோ  சொல்லி சொல்லி சத்தியங்களும் செய்ய தொடங்கினான். அவள் அது எதையும் ஏறிட்டுக்கூட பார்க்கவில்லை. ஐயனே, மாதரார் கண்களையும், மலர்ந்த நீல மலர்களையும் பார்த்து எது உண்மையான பூ என்று தெரியாமல் வண்டு ஊசலாடும், அப்படி என் நிலையும் வந்து விட்டதே! [மாதரார் கண்ணும், மதி நிழல் நீர் இணை கொண்டு மலர்ந்த நீலப் போதும், அறியாது-வண்டு ஊசலாடும்]

 

'அச்சம், மடம், நாணம், பயிர்ப்பு' இவையெல்லாம் களவியலுக்கு மட்டும் தான்!. அது அவளுக்கு நன்றாக தெரியும். கரப்பான் பூச்சியைப் பார்த்தால் விளக்குமாறால் ஒரு  போடு போடும் அவள், காதல் களவியலில் அதே கரப்பான் பூச்சியைப் பார்த்ததும் "ஐயோ! கரப்பான்".. என அலறி காதலன் மேல் சாய்ந்த காலம் இன்று மலையேறி விட்டது. நேராகவே கண்ணகி போல் வாதாட தொடங்கினாள்!

 

இனி தன் சமாளிப்புக்கள், வேடங்கள் சரிவராது என உணர்ந்த அவன், அவள் செருப்பு எடுத்து, துரத்தும் முன், தானாக அவள் மேல் பொய்க்குற்ற சாட்டுக்கள் சுமத்தி நழுவி சென்றான். ஆனால் அவள் துணிந்து விட்டாள். ஏய்  'காதல் வேண்டாம் போ' டா என ஒருமையில் முதல் முதல் விறல் சுட்டிக் காட்டி அவனை திட்டியே விட்டாள்!              

 

அவனும் அங்கு நின்றால் பிரச்சனை வளரும் என்று அஞ்சி, உடனடியாகவே தன் விடுதிக்கு திரும்ப தொடங்கினான். ஆனால்  அவள் மனது ஓயவில்லை. அது தன் பாட்டில் சில வரிகளை இயற்றிக்கொண்டு தன்னை ஆறுதல் படுத்திக்கொண்டு இருந்தது! 

 

"காதல் இல்லை கனிவும் இல்லை

காத்தரமான ஒரு வாழ்வும் இல்லை

காலம் முழுதும் அவன் ஏமாற்றி

காமம் தணிக்கும் உடல் நானல்ல !"

 

என்றாலும்:

 

"அன்பு வேண்டி உள்ளம் போராடுகிறது

அணைப்பு தேடி உடல் போராடுகிறது

அயர்ந்து தூங்க கண் போராடுகிறது

அலுப்பு தட்டி உயிர் போராடுகிறது !"

 

அவள் தன் கட்டிலில், உடை கூட மாற்றாமல்  அப்படியே உறங்கி விட்டாள்!    

 

:-[கந்தையா தில்லைவிநாயகலிங்கம்-/-அத்தியடி, யாழ்ப்பாணம்]

பார்வையாளர் பார்வையில் ஈழத்தவர் திரைப்படத்துறை

விஞ்ஞானத்தில் பலபெரும் புதுமைகளைப் படைத்து முன்னேறிவிட்ட மேற்கத்தைய நாடுகள் வரை புலம் பெயர்ந்து வாழ்ந்து கொண்டிருக்கும் ஈழத்தவர், ஏற்கனவே தம் சொந்த உறவுகளையும் இழந்து காலம் காலமாகக் ஊரில் கூடி வாழ்ந்த உறவுகளையும்,கூட்டு வாழ்க்கையினையும் தொலைத்துமேற்படி நாடுகளில்,

பலவகையான கலாச்சாரங்களைக் கொண்ட பல்லினங்களுக்கு மத்தியில், , ஒத்துபோக முடியாத காலநிலை,ஒத்துக் கொள்ள முடியாத கலாச்சார சூழ்நிலை,புரிந்து ஒத்துப் போக முடியாத உறவுகளும்அடுத்த தலைமுறையினர் அளிக்கும் புரிந்து கொள்ள முடியாதவகையிலான சிக்கல்கள்    எனப்பல வகையில், நாம் பரம்பரைபரம்பரையாக வாழ்ந்த வாழ்க்கைக்கு மாறான கடும் சிக்கல்களுக்கெல்லாம் முகம் கொடுத்துக் கொண்டு, இவற்றுக்கு மத்தியில் இங்கு குடியேறிய ஆரம்ப காலத்தில் சிலகாலம் சற்று மனம்தளர்ந்து வாழ்ந்தாலும் பின்னர் கண்விழித்துக்கொண்ட தமிழினம் கல்வி, தொழில்,கலை சார்ந்த பல்துறைகளிலும்  பிரகாசிக்க ஆரம்பித்துள்ளமை, நாமும் ஏனைய இனங்களிற்கு இணையாக வளர்ந்துகொண்டி ருக்கிறோம் என்பதனை பெருமையுடன் பறைசாற்றுகிறது.

அவற்றினுள் ஒன்றான ஈழத்தவர் திரைப்படத்துறையும் புதிய தொழில்நுட்பமூடாக மீண்டும்வளர்ந்துகொண்டிருப்பதுதமிழர்களாகிய எங்கள் காதில் இதமான செய்திகளாகவே உணரப்படுகின்றன. ஈழத்தில் நாங்கள் வாழ்ந்த காலம்வரையில் ஈழத்துக் கலைஞர்களின் பெரும் முயற்சியில் சில ஆண்டுகளுக்கு ஒருமுறை வெளிவரும் விரல்விட்டு எண்ணக்கூடிய ஒரு சில தமிழ்த்திரைப்படங்கள் நஷ்டக் கடலில் மூழ்குவதும்,அக்கலைஞர்களின் உற்சாகம் இழக்கப்படுவதுவும் அதனால் திரைப்பட முயற்சி சிலகாலம் இல்லாது போவதுவும் ,மீண்டும் அம்முயற்சி ஆர்வம் கொண்ட கலைஞர்களினால் படம் எடுக்கப்படுவதும், இல்லாது போவதுவுமாக அதுவும் இன்றைய சின்னத்திரை நாடகங்கள் போன்று ஒரு தொடர்கதையாகவே போய்க்கொண்டு இருந்தது தமிழ்த் திரைப்பட இரசிகர்கள் மறந்திருக்க மாட்டார்கள்!

ஈழத்துத் திரைப்பட வளர்ச்சி ஆமை வேகம்...இல்லை,இல்லை நத்தை வேகத்தில்தான் அக்காலத்தில் நகர்ந்துகொண்டிருந்தது என்பது ஈழத்துக் கலைஞர்களுக்கு மட்டுமல்ல அக்கலைகளில் அக்கறைகொண்ட தமிழ் இரசிகர்களுக்கும்  கவலையே கொடுத்தது. ஈழத்து த்திரைப்பட வளர்ச்சிக்கு முட்டுக்கடையாக விளங்கியது என்னவெனில் இந்தியத்தமிழ் திரைப்படத் துறையின் அசுரவளர்ச்சி என்று கூறி நாம் நழுவுதல் நியாயமுமாகாது. ஏனெனில் அவர்களின் வளர்ச்சிக்குக் காரணம் அவர்களின் திரைப்படத்தினை கண்டுகளிக்க உலகம் வாழ் தமிழர் அனைவருக்கும் வாய்ப்புக்கள் கிடைத்தன. எனவே அதிக இரசிகர்களை இந்தியச் சினிமா உலகம் சம்பாதித்துக் கொண்டது.இதனால் திரைப்பட துறையினருக்கு அத்துறையினால் அதிக இலாபம் கிடைத்தது.எனவே அத் திரையுலகம் வளர்ச்சிகண்டது.

ஆனால்,ஈழத்து திரைப்படம் இலங்கை என்ற சிறு வட்டத்துள்ளே  அன்று சுழன்றதாலும்,அதிலும் ஈழம் வாழ் தமிழரிலும் குறிப்பிட்ட ஒருசில  பகுதியினரே பார்க்க முன்வந்தந்ததாலும் அத்துறைக்கும் இந்தியத் திரைப்படத் துறைக்கும் இடையில் பாரிய இடைவெளி வளர்ந்துகொண்டே இருந்தது என்பது மறுக்கமுடியாத உண்மையாகும்.

இருந்தாலும் இன்று உலகம் முழுவதும், ஈழத்தமிழர்  பரந்துவாழும் நிலையில், நவீன தொழிநுட்ப வசதிகள் கையில் கிடைக்கக் கூடிய வாய்ப்பினால் ஈழத்தவர்  திரையுலகம்  தரமான திரைப்படங்களை ஈழத்து உணர்வுகளுடன் வெளியிட்டுக்கொண்டிருப்பது  ஈழத்து திரைப்பட வரலாற்றில் நல் எதிர்காலம் நோக்கிய பெரும்  சாதனையாகும்.

இவற்றில் கனடாவிலிருந்து கலைஞர் திவ்வியராஜன், டென்மார்க்கிலிருந்து கலைஞர் சண்.சுப்பிரமணியம் அவர்களது தயாரிப்பில் வெளிவந்த தமிழ்த் திரைப்படங்கள் குறிப்பிடக்கூடியவை.

ஈழத்தமிழர் அனுபவித்த,அனுபவித்துக் கொண்டிருக்கும் இன்னல்கள் கணக்கில் அடங்காதவை. அவைகள் திரைவடிவில் உலகத்தின்முன் வெளிக்கொணரப்படல் வேண்டும்.

 தவித்து வாழும் தமிழரை ஏமாற்றி தவிச்ச முயலடிக்கும் கூட்டங்களும் நம் மத்தியில் வளராமல் இல்லை. மக்களுக்கு அவர்களின் போலி முகத்திரைகளை கிழித்துக்காட்டி   உண்மை நிலைகளை எடுத்துச்சொல்லும் ஊடகமாக ஈழத்து திரைத்துறை வளரவேண்டும்.

இந்நிலையில்   மேலும்  பல திரைப்படக் கலைஞர்கள் நம் மத்தியில் உதயமாக வேண்டும். மேலும் பல நல்ல திரைப்படங்கள் வெளியாகட்டும் . வாழ்த்துகள்

பார்வை:செ.மனுவேந்தன்

நம்மை நோக்கி வரும் புதுமைகள்


அறிவியல்=விஞ்ஞானம்

புதிய சில்லு, புதிய பாய்ச்சல்


கூகுள் அண்மையில்
'பிக்செல் 7 மற்றும் பிக்செல் 7 புரோ' ஆகிய ஸ்மார்ட் போன்களை அறிமுகம் செய்தது. அவற்றினுள் இருப்பவை 'டென்சார் ஜி2' என்ற புதிய சிலிக்கன் சில்லு. ஒன்றை கவனித்தீர்களா? ஆப்பிள் முதல் சாம்சங் வரை அனைத்தும், இயந்திர கற்றல் என்ற மென்பொருளில் இயங்கக்கூடிய சில்லுகளை அறிமுகம் செய்யத் தொடங்கிவிட்டனர். ஏனெனில், குரல் தேடல் முதல் டிஜிட்டல் உதவியாளர் வரை பல புதிய தொழில்நுட்பங்களுக்கு சக்திவாய்ந்த சில்லுகள் தேவை. அதற்குத்தான், கூகுள் தன் சொந்த தயாரிப்பான டென்சார் ஜி2 சில்லினை அறிமுகப்படுத்தியுள்ளது. முந்தைய சில்லினைவிட ஜி2 சில்லு 70 சதவீதம் வேகமாக இயங்குகிறது. மேலும், 50 சதவீதம் குறைவாக மின்சாரத்தை உறிஞ்சுகிறது. ஒருவர் பேசுவதை இன்னொரு மொழியில் மொழிபெயர்ப்பது, கேமராவில் செறிவான படங்களைத் தருவது என்று புதிய சில்லின் புதிய திறன்கள் நிறையஉண்டு.

 

வானில் ஒரு மின் விமானம்.


உலகின் முதல் மின்சார பயணியர் விமானம் வெற்றிகரமாக வானில் பறந்து வெள்ளோட்டம் பார்த்தது. அமெரிக்காவின் வாஷிங்டன் மாநிலத்தில் நடந்த, இவியேஷன் நிறுவனத்தின், 'ஆலிஸ்' என்ற மின்சார விமானம், வானில் 3,500 அடி உயரத்தில் எட்டு நிமிடம் வெள்ளோட்ட சோதனை நடத்தி, மீண்டும்தரையிறங்கியது.

இவியேஷனின் ஆலிஸ், ஒரு முறை மின்சாரமேற்றினால், 250 மைல்கள் தொலைவுக்கு பறக்கும். அதுமட்டுமல்ல, ஆலிஸ் விமானத்தில், இரண்டு விமானிகளும், ஒன்பது பயணியரும் பயணிக்கலாம்.

பேட்டரி தொழில்நுட்பம் வேகமாக முன்னேறி வருவதால், விரைவில் மின்சார விமானங்கள் மட்டுமே வானில் பறக்க வேண்டும் என்ற நிலை வரும். அப்போது, முதல் விமானமாக இவியேஷனின் ஆலிஸ் இருக்கும். ஏற்கனவே, நடுத்தர தொலைவு விமான சேவைகளுக்காக, 70 ஆலிஸ் விமானங்களுக்கு ஆர்டர்கள் வந்துள்ளன. இதனால், 2026 வாக்கில் பயணியர் மற்றும் சரக்கு போக்குவரத்து சேவையில் ஆலிஸ் முன்னணி வகிக்கும் என, வல்லுனர்கள் கருதுகின்றனர். ...

 

நவீன பாய்மரக் கப்பல்


இயந்திரங்களின் பலத்திற்கு ஈடில்லை என்ற கருத்தியலில்தான், நவீன கப்பல் போக்குவரத்து உருவானது. ஒரு நுாற்றாண்டு கடந்த பின், மீண்டும் ஆதிகால பாய்மரங்களை, நவீன கப்பலில் பொறுத்தியுள்ளது, சீன நிறுவனம் ஒன்று.

வழக்கமான டீசல் இயந்திரம் பொருத்தியகப்பலில், கூடுதலாக 40 மீட்டர் உயர நான்கு பாய்மரங்களை அந்நிறுவனம் சேர்த்துள்ளது. பாய்மரங்களை, கணினிகள் கட்டுப்படுத்தும். தேவையில்லாதபோது, பொத்தானை அழுத்தினால் இந்த கார்பன் இழை பாய்மரங்கள் சுருங்கிவிடும்.

அண்மையில் மத்தியக் கிழக்கிலிருந்து, துாரக்கிழக்கு கரை வரையிலான பயணத்தில் இந்த பாய்மரங்கள், 10 சதவீத டீசலை மிச்சப்படுத்தின. ஒரு பயணத்திற்கு, 2,900 டன்கள் கார்பன்-டை-ஆக்சைடு காற்றில் கலப்பது தவிர்க்கப்படும்.

 

தென்றல் தரும் மின்சாரம்.


சிங்கப்பூரிலுள்ள நான்யாங் தொழில்நுட்ப பல்கலைக்கழக விஞ்ஞானிகள், சிறிய அளவில் உள்ள கருவி மூலம், குறைந்த வேகத்தில் வீசும் காற்றிலிருந்து மின்சாரத்தை எடுக்க முடியும் என்று காட்டியுள்ளனர்.

இக்கருவி 15 செ.மீ.,க்கு 20 செ.மீ., அளவு உள்ளது. இதை கட்டடத்திற்கு வெளியே காற்றோட்டமான இடத்தில் வைத்துவிட்டால் போதும். காற்று லேசாக வீசினாலும் இந்தக் கருவி அசைந்து அதிரும். மூன்று வேறு விதமான பொருட்களால் ஆன கருவி அசைவதால், 'டிரைபோ எலெக்ட்ரிக்' விளைவு மூலம் மின்சாரம் உற்பத்தியாகும். ஒரு சோதனையில், நொடிக்கு நான்கு மீட்டர் வேகத்தில் வீசிய காற்றில், நான்யாங் விஞ்ஞானிகளின் கருவி தயாரித்த மின்சாரத்தின் மூலம் 40 சிறிய எல்.இ.டி., விளக்குகள் எரிந்தன.

கட்டடங்களுக்கு வெளியே பொருத்தினால், 24 மணி நேரமும் கணிசமான மின்சாரத்தை இக் கருவிகள் உற்பத்தி செய்துதரும்.


உடல் நலம் காட்டும் உடை.

ஒருவர் எங்கிருந்தாலும் அவரது உடல்நிலையை கண்காணிப்பதற்கான தொழில்நுட்பங்கள் வரத் தொடங்கிவிட்டன.

அதில் ஒன்று தான் அணியும் உடைகளையே உடல் நலம் அறிய உதவும் கருவிகளாக மாற்றம் நுட்பம் லண்டனில் உள்ள இம்பீரியல் கல்லூரியின் ஆராய்ச்சியாளர்கள் 'பெக்கோடெக்ஸ்' என்ற ஒரு வகைத்  துணியை உருவாக்கி உள்ளனர்.  இந்த துணி முழுவதும் பருத்தி இழைகளால் ஆனது என்றாலும் இதன் ஊடுபாவாக பத்துவகை மின்னணு உணரிகள் வைத்து ஏற்பட்டது. இதனால் ஒருவரது உடல் நிலை குறித்த அறிகுறிகளை தொடர்ந்து கண்காணித்து அறிய முடியும். இந்த உணரிகள் தரும் தகவல்களை மொபைல் செயலி மூலம் சேகரித்து அறியலாம்.

பிரதியாக்கம் -செ.மனுவேந்தன்

மகாவம்சத்தில் புதைந்துள்ள….[ பகுதி 21]

உண்மைகளும் வரலாற்று சான்றுகளும்...


சிங்கள அறிஞர் முதலியார் குணவர்தன, ஆனந்தா பாடசாலையில், 28.09.1918 , சிங்களத்தின் இலக்கணம் திராவிடம் என்கிறார் [Sinhala scholar Mudliyar Gunawardena at a lecture delivered at Ananda College on 28.09.1918 had stated "....the science of exmination of the structure of a sentence is called its grammar. The grammar of the Sinhala language is Dravidian...] பேராசிரியர் J. B. திஸ்ஸநாயக்க, தனது "சிங்களத்தை புரிந்து கொள்ளுதல் " என்ற புத்தகத்தில், பக்கம் 118 இல், தெற்காசியாவின் மொழிகளில், சிங்களம் ஒரு தனித்துவமான இடத்தைப் பிடித்துள்ளது என்றால் அதற்க்கு காரணம் அது இந்தோ ஆரியன் மற்றும் தமிழுடன் கொண்டிருந்த நெருங்கிய உறவு என்கிறார் ["Prof. J. B. Dissanayake in his book "Understanding the Sinhalese" at page 118 states "....Sinhala occupies a unique position among the languages of South Asia because of its close affinity, with two of the major linguistic families of the Indian sub continent Indo-Aryan and Dravidian..."]. இதில் இருந்த நாம் இலகுவாக ஊகிக்கலாம், சிங்கள எழுத்து கட்டாயம் ஆரிய மொழியும், திராவிட மொழியும் தெரிந்த ஒருவரோ அல்லது பலராலோ தான் உண்டாக்கப் பட்டு இருக்கும் என்பது. மேலும் அரபு நாட்டில் இருந்து இலங்கைக்கு ஏழாம் நூற்றாண்டில் குடியேறியவர்களின் சந்ததி, இன்று முஸ்லீம் என்றும் சோனகர் என்றும் அழைக்கப் படுபவர்கள், எல்லோரும் வீட்டில் தமிழ் பேசுபவர்களாகவே மாறினார்கள். காரணம் தமிழ் தான் அங்கு பாவனையில் இருந்துள்ளது.? சிங்களம் இலங்கையில்  பாவனையில் இருந்திருந்தால், கட்டாயம் சோனகர் சிங்களமே பேசி இருப்பார்கள்.  மற்றும் விஜயபாகுவின் அரச கட்டளைகள் (A.D. 1056-1111) சிங்களத்திலும் தமிழிலும் இருப்பது குறிப்பிடத் தக்கது [Arab settlers came to Ceylon about 7th century A.D. Their descendants are now called Muslims and Moors. They learned Tamil because that would have been the language in use. Also Royal edicts of Vijayabahu (A.D. 1056-1111) were in Sinhala and Tamil]. இது விஜயபாகுவின் ஆட்சியில் பெரும் தொகையான குடிமக்களாக தமிழர்கள் இருந்ததையும் எடுத்து காட்டுகிறது.

 

தீபவம்சம், மகாவம்சம் இரண்டையும் ஒப்பிட்டு பார்த்தால், மகாவம்சம் அதில் இருந்து கொஞ்சம் கொஞ்சமாக விலகி தமிழருக்கு எதிரான போக்கை கையாளுவதை காணலாம். உதாரணமாக, கி மு 237 இல் இருந்து கி மு 215 வரை ஆட்சி செய்த சேனன் மற்றும் குத்திகன் ஆகிய இரண்டு தமிழர்களையும் தீபவம்சம் ராஜகுமாரர்கள் [princes] என கூறும் அதே வேளையில், அதற்குப் பிறகு எழுதப்பட்ட மகாவம்சம், அவர்கள் இருவரையும் குதிரை வியாபாரியின் மகன்மார்கள் [sons of a horse trader] என்றும், வெளியில் இருந்து வந்தவர்கள் என்றும்  கூறுகிறது. இது, வரலாற்றில் எந்த பெரிய வேறுபாடு ? உங்களுக்கு தலை சுத்துகிறதா? ஆனால் தீபவம்சம் அவர்கள் சோழநாட்டில் இருந்தோ அல்லது தமிழகத்தில் இருந்தோ வந்தவர்கள் என்று கூறவே இல்லை. அதே போல எல்லாளனை தமிழ் இளவரசன் என்றோ அல்லது சோழநாட்டில் இருந்து வந்தவன் என்றோ தீபவம்சம் கூறாத வேளையில், தீபவம்சத்தை 150 / 200 ஆண்டுகளின் பின் விரிவாக்கிய மகாவம்சம் முரண்பாடான கருத்தை அங்கு பதிவிடுகிறது. தீபவம்சம் தமிழர் விரோத வெறுப்பைக் பொதுவாக எங்கும் கக்கவில்லை. ஆனால் அது புத்த மதத்தில் மட்டுமே கவனம் செலுத்தியது. அபய [Abhaya] அல்லது துட்டகைமுனுவின் தந்தையின் பெயர் காக்கவன்ன [Kakkavanna]. அதே போல வன்னியை ஆண்ட கடைசி தமிழ் மன்னனின் பெயர் பண்டாரவன்னியன், அவனை காட்டிக்கொடுத்தவனின் பெயர்    காக்கவன்னியன். பெயர் காக்கவன்ன  குரல் ஒலியில் காக்கவன்னியனுடன் ஒன்றாகிறது [phonetically similar]. அது மட்டும் அல்ல, தீபவம்சம் காக்கவன்னவுக்கும், மூத்தசிவ அல்லது தேவநம்பிய தீசனுக்கும் இடையில் என்ன உறவு என்று கூறவும் இல்லை.

 

மகாவம்சத்தில், சிங்கத்துடன் வங்க நாட்டு இளவரசி புணர்ந்து இரு மனித பிள்ளைகளை பெற்றார் என்றும், அந்த சகோதரங்கள் தங்களுக்குள் திருமணம் செய்து விஜயன் பிறந்தான் என்றும் கூறுகிறது. உங்களில் பலர் அடிப்படை உயிரியல் கட்டாயம் படித்திருப்பீர்கள் என்று நம்புகிறேன். ஒரு ஆண் சிங்கமும் ஒரு மனித பெண்ணும் புணர்ந்து சந்ததி உண்டாக்கும் என்பது நடைமுறை சாத்தியம் இல்லை. உதாரணமாக, சிங்கம் 36 குரோமோசோம்கள் / உடல் அணுக்களில் காணப்படும் மரபுத்திரிகள் கொண்டு உள்ளது , அதேவேளை மனிதன் 46 குரோமோசோம்கள் [Lions have 36 chromosomes and humans have 46 chromosomes.] வைத்திருக்கிறான். அத்துடன் அவைகளின் வகைகளும் முக்கியம் [the types of chromosomes are also important.] எனினும், சிங்கப்புலி அல்லது லைகர் (Liger) என்பது ஆண் சிங்கம் (Panthera leo) மற்றும் பெண் புலி (Panthera tigris) இவைகளுக்கிடையே ஒரு கலப்பினச் சேர்க்கை மூலம் உருவாகிய கலப்பு உயிரினமாகும். இதற்கு காரணம் இந்த இரு இனத்தின் பெற்றோர்கள் பந்தேரா எனும் ஒரே பேரினத்தைச் சேர்ந்தவை என்பதால், மற்றும் அவைகளின் குரோமோசோம்கள் மிகவும் ஒத்த தன்மையாக இருப்பதால் ஆகும், அப்படியே புலிச்சிங்கம் அல்லது வேயரிமா (Tigon) ஆகும். அத்துடன் இவை பெருபாலும் மலட்டுவாகவும் [sterile] இருக்கின்றன. இன்னும் ஒரு உதாரணமாக, குதிரையையும், கழுதையையும் எடுத்தால், அவை முறையே 38, 36 குரோமோசோம்கள் கொண்டுள்ளன. அவைகள் புணர்ந்து கோவேறு கழுதை [mules] பிறக்கிறது. அது எப்பொழுதும் மலடும் ஆகும். சிங்கத்தையும் , மனிதனையும் இனி கருத்தில் கொண்டால், இங்கு குரோமோசோம்கள் வேறுபாடு பத்து ஆகும். எனவே எந்த சந்தர்ப்பத்திலும் சந்ததி உண்டாகாது. அப்படி என்றால், விஜயன் என்று உண்மையான ஒருவர் இருக்க முடியாது? இது நான் சொல்லவில்லை. அறிவியல் சொல்லுகிறது!  கழுதையும் குதிரையும் ஒரே பேரினம் [genus], ஆனால் வெவ்வேறு இனங்கள். குரோமோசோம்கள் சொற்ப வித்தியாசம். எனவே தான் கோவேறு கழுதை முற்றிலும் மலடாகவே பிறக்கிறது. மனிதனும் சிங்கமும் ஒரே பேரினமும் இல்லை [do not even belong to same genus] . எனவே, சாகசப் பெண்ணை [adventurous woman] சிங்கம் உண்பதுதான் இறுதியாக நடந்து இருக்கும்!

 

-::[கந்தையா தில்லைவிநாயகலிங்கம்,-/-அத்தியடி, யாழ்ப்பாணம்]

பகுதி: 22 தொடரும்..