சிரிக்க சில நிமிடம்

 

01

மகன் : அப்பா விண்ணப்ப படிவத்தில 'தாய் மொழி'  எண்டு கேட்டிருக்கு.எப்பிடியப்பா  எழுதுறது?

தந்தை: ரொம்ப, ரொம்ப நீளம் எண்டு எழுது.

 

02

லீலா: அந்த டாக்டருக்கு சொந்தம் எண்டு சொல்லிக் கொள்ள  யாருமே இல்லையாமே?

மாலா: எப்பிடி இருப்பார்கள்? சொந்தங்கள் எல்லாருக்கும் கொரோனாத் தடுப்பூசி போட்டது இவர்தானே!!

 

03

போலீஸ்:உங்க மனைவியை கடத்தியவர்களிடம் இருந்து போன் வந்ததா? என்ன சொன்னார்கள்?

வந்தவர்: இரவு ஒரு மணிக்குள்ள சொன்ன பணத்தை, சொன்ன இடத்தில கொண்டுவந்து தராட்டில் , என் பொண்டாட்டியை என் வீட்டிலையே கொண்டுவந்து விட்டிடுவோம் என்று மிரட்டுறாங்கள் சேர்.

 

04

செந்தில்: .போலீசுக்காரர்  வீட்டிலதான் கபாலி திருடப் போவான் அண்ணை!!

கவுண்டன்: அட மடையன். மாட்டிக்குவானே!

செந்தில்: அதுதான் இல்லையே!!, அங்கதான் மாட்டிக்கிட்டாலும், மாமூல் தர வந்தான் எண்டு சமாளிச்சுவிடுவானே!!

 

05

டாக்டர் : உங்க மாமி உயிரோட இருக்கிறதே ஆச்சரியமான விஷயம்.

மருமகள் : அதான் இப்ப உங்க கிட்ட வந்துட்டோமே.

 

06

தந்தை: என்னடா மார்க் ஷீட்டல 1 மார்க் வாங்கிட்டு வந்திருக்க?

மகன்: விலை வாசி ஏறிப் போச்சுப்பா... எதையுமே வாங்க முடியல...

 

07

தந்தை: என்ன ராஸ்கல்... பாடத்தைப் படிக்காம சினிமா பாட்ட பாடிக்கிட்டு இருக்க...

மகன்: தமிழ் வாத்தியார் தான்பா பத்துப் பாட்டை மனப்பாடம் பண்ணிட்டு வரச் சொன்னாரு.

 

09

ஆசிரியை: ஏன் சார் அந்தப் பையன அப்படிப் போட்டு அடிக்கிறீங்க?

ஆசிரியர்: பின்ன என்னங்க ... கட்டபொம்மனை எங்கே தூக்கில் போட்டாங்கன்னு கேட்டா... கழுத்தில்தான்னு சொல்றான்.

 

10

நர்ஸ் : டாக்டர் அந்த பேஷண்டோட ரத்த அழுத்தம் குறைந்து கொண்டே போகிறது. என்ன மருந்து கொடுப்பது என்றேத் தெரியவில்லை.

டாக்டர் : மருந்தெல்லாம் ஒண்ணும் வேண்டாம். அவரோட பீஸ் பில்லைக் காட்டுங்கள் போதும்.

 

11

ஆசிரியர்1: ரௌடியோட பையன ஸ்கூல்ல சேர்த்தது தப்பா போச்சு!

ஆசிரியர் 2: ஏன்?

ஆசிரியர்1:தலைய சீவிகிட்டு வாடான்னா யார் தலையன்னு கேக்கறான்.

 

12

அ‌ம்மா : செ‌ல்‌வி மீன் தொட்டிக்கு தண்ணி விடு.

செ‌ல்‌வி : நேத்திக்கு ஊத்துன தண்ணியையே அது இன்னும் குடிக்கல‌ம்மா.

 

13

ஆசிரியர் : உன் பக்கத்தில தூங்கறவனை எழுப்பு

மாணவன் : நீங்க தானே தூங்க வெச்சிங்க. நீங்களே எழுப்புங்க.

 

14

சோமு : அ‌ந்த டா‌க்ட‌ர் ரா‌சியான டா‌க்ட‌ர்னு எ‌ப்படி சொ‌ல்ற?

பாபு : எ‌ங்க தா‌த்தாவை அ‌ந்த டா‌க்ட‌ரிட‌ம் அ‌ட்‌மி‌ட் செ‌ய்த மூ‌ன்று நா‌ளி‌ல் அவரோட சொ‌த்து எ‌ல்லா‌ம் எ‌ங்க அ‌ப்பாவு‌க்கு வ‌ந்து‌வி‌ட்டதே.

 

15

மயூரி: இ‌வ்வளவு பெ‌ரிய க‌ப் வா‌ங்‌கி இரு‌க்‌கியே? எ‌ந்த போ‌ட்டி‌க்காக?

கியூரி: பா‌ட்டு‌ப் போ‌ட்டி‌யில

மயூரி: வெ‌ரி கு‌ட்... ந‌ல்லா பாடு‌வியா?

கியூரி: இ‌ல்ல.... நா‌ன் பாடினத ‌நிறு‌த்த‌த்தா‌ன் இ‌ந்தக்  க‌‌ப்பே‌ கொடு‌த்தா‌ங்க.

 

16

மாணவன்1 : இது ஏதோ கழுதை போட்ட கணக்குப் போல இருக்கு!!

மாணவன்2 :ஏன் அப்படி சொல்ற!

மாணவன்1:நிறைய இடத்தில் ஒதைக்குது.

 

 [tamil- jokes, comedy, sirippu, nakaichchuvai] 

தொகுப்பு:செ.மனுவேந்தன்

Read More

"தமிழர்களின் பண்டைய நான்கு கற்கள்"/பகுதி 02

அரைவைக் கல் / அம்மி

அம்மி என்பது கருங் கற்களினால்  செய்யப் பட்ட, மருந்து அல்லது சமையலில் பயன்படும் பொருட்களை அரைப்பதற்கு உதவக் கூடிய, சமதளமாக அமைந்த ஒரு கருவியாகும். அம்மிக் கல்லில் பொருளை இட்டு அரைக்க உருளை வடிவில், குழவி என்று அழைக்கப்படும், ஒரு கருங்கல் பயன்படுகின்றது. இந்தக் குழவியை இரு கைகளாலும் பற்றி, உருட்டியும் இடித்தும் இழுத்தும் பொருட்கள் அரைக்கப் படும். இது தொல் பழங்காலத்தில் இருந்து பயன் பாட்டில் இருந்து வரும் ஒரு கற் கருவி ஆகும். அம்மியும் குழவியும் பயன்படப் பயன்பட மழுமழுப்பாகி விடும், இதனால், பொருட்கள் சரியாக அரை படாது. எனவே, கல் தச்சர் ஒருவரைக் கொண்டு, உளியால் பொள்ளி நுண்ணிய சிறு சிறு குழிகள் ஆக்குவர் (பொள்ளுதல் = குழி இடுதல்). இதற்கு அம்மி பொளிதல் என்று பெயர். அம்மியையும் குழவியையும் இவ்வாறு பொளிதலால் உராய்வு நன்றாக ஏற்பட்டு, பொருட்கள் நன்றாக அரைபடும்.

 

கவிஞர் வைரமுத்து, தன்னுடைய  கவிதை ஒன்றில்:     

“கொத்தமல்லி வறுத்து வச்சு, குறுமிளகாய் ரெண்டு வச்சு,

சீரகமும் சிறுமிளகும், சேத்து வச்சு நீர் தெளிச்சு.

கும்மி அரச்சி, நீ கொழ கொழன்னு வழிக்கயில,

அம்மி மணக்கும், அடுத்த தெரு மணமணக்கும்,”

என்று சொல்லுகிறார். ஆமாம், இந்த வரிகளில் உள்ளது போல அம்மியில் அரைக்கும் போது அதன் வாசம் தனி வாசம் தான் !

 

வேட்டையாடி உணவு சேகரிக்கும் மக்கள் [Hunter-gatherers], விவசாயம் ஆரம்பிப்பதற்கு வெகு காலம் முன்பே, 32,000 ஆண்டுகளுக்கு முன்பே, ஒரு வகை பல்லரிசி [ஓட்ஸ் / oats] சாப்பிட்டார்கள் என இன்று அறிய முடிகிறது என இத்தாலியில் உள்ள புளோரென்ஸ் பல்கலைக்கழகத்தை சேர்ந்த மர்தா மரியொட்டி லிப்பியும் அவரது சகாக்களும் [Marta Mariotti Lippi at the University of Florence in Italy and her colleagues] ஆய்வு மூலம் கண்டு பிடித்துள்ளார்கள். தென் இத்தாலியில் அவர்களால் கண்டு எடுக்கப்பட்ட அரைக்கும் கல்லில் மாத்தானியம் [starch grains on an ancient stone grinding tool from southern Italy] கண்டு பிடிக்கப் பட்டுள்ளது. இதில் இருந்து நாம் அறிவது அம்மி போன்ற ஒன்று அல்லது அம்மியின் முன்வடிவம் 32,000 ஆண்டுகளுக்கு முன்பே பயன்படுத்தப் பட்டுள்ளது என்பதே ஆகும்.

 

பொதுவாக அரைக்கும் கல் அல்லது மூல வடிவ அம்மிக்கல் தானியங்கள், கொட்டைகளை அரைத்து மாவாக்குவதுடன் அல்லது சிறு துண்டுகள் ஆக்குவதுடன், விலங்குகளின் எலும்பை உடைத்து எலும்புநல்லி அல்லது எலும்பு மச்சையை (Bone marrow) பிரித்தெடுக்கவும் குருத்தெலும்பு மற்றும் பல்லிகள் போன்ற சின்ன விலங்குகளை பொடியாக்கவும் அல்லது  நொறுக்கவும் [for pulverising cartilage and small animals such as lizards] பாவிக்கப்பட்டு இருக்கலாம் என இன்று அறிய முடிகிறது. உதாரணமாக, பூர்வ எகிப்திய கல்லறைகளிலிருந்து எடுக்கப்பட்ட சிறிய சிலைகள், பண்டைய காலத்தில் தானியத்தை அரைப்பதற்கு அம்மிக்கல் போன்ற ஒன்று பாவிக்கப் பட்டதை எடுத்து காட்டுகிறது. இங்கு இரண்டு கற்கள் இருந்தன; ஒரு சரிவான அடிக் கல்லும், சிறிய மேல் கல்லும் இருந்தன. பொதுவாக ஒரு பணிப்பெண் இந்த அம்மிக்கு முன் மண்டியிட்டு அமர்ந்து மேல் கல்லை இரண்டு கைகளிலும் பிடித்துக் கொள்வாள். கற்களுக்கு இடையே இருக்கும் தானியம் அரைபடும்படி முழு பலத்தையும் பிரயோகித்து மேல் கல்லை அடிக் கல்லின் மீது வைத்து முன்னும் பின்னும் நகர்த்துவாள் என்பதை அந்த சிலை [படம் - 10] எமக்கு சொல்லுகிறது.

 

கிறித்தவ மற்றும் யூதர்களின் திருநூலாகிய திருவிவிலியத்தில் (பழைய ஏற்பாடு) இரண்டாவது நூலாக இடம் பெறும் யாத்திராகமம் / விடுதலைப் பயணம் [Exodus / The Book of Exodus is the second book of the Bible]:11:5 "அப்போது, எகிப்து தேசத்திலுள்ள மூத்த மகன்கள் எல்லாரும் செத்துப் போவார்கள். சிம்மாசனத்தில் உட்கார்ந்திருக்கிற பார்வோனின் மூத்த மகன் முதல் மாவு அரைக்கிற அடிமைப் பெண்ணின் மூத்த மகன் வரை எல்லாரும் செத்துப்போவார்கள்." என்று கூறுகிறது. இதில் இருந்து நாம் அறிவது பண்டைய  எகிப்தில் முழு நேர மாவு அரைக்க அடிமைப் பெண்களை நியமித்து இருக்கிறார்கள் என்பது ஆகும். அது மட்டும் அல்ல, இவர்கள் மணிக்கணக்காக மண்டியிட்டு அமர்ந்து இருந்து அரைத்தது, கட்டாயம் அவர்களின்  உடலை பாதித்தும் இருக்கும். இதை மெய்ப்பிப்பது போல, பண்டைய சிரியாவில் கண்டு எடுக்கப் பட்ட எலும்புக் கூடுகளை ஆராய்ந்த போது அவை சாதாரண நிலையில் இல்லா திருப்பது தெரிய வந்து உள்ளது. முழங்கால் மூட்டுகளில் விரிசல், முதுகெலும்பின் கடைசியிலுள்ள முள்ளெலும்பில் பாதிப்பு, கால் பெருவிரலில் கடுமையான எலும்பு சார்ந்த மூட்டழற்சி (Arthritis) போன்ற தொடர் அழுத்த பாதிப்புகள் (repetitive stress injuries) அவர்களுக்கு ஏற்பட்டிருக்க வேண்டும் என்ற முடிவுக்கு புதைப்படிவ ஆய்வாளர்கள் இன்று வந்துள்ளார்கள்.

 

தென் இந்தியா அல்லது இலங்கை இந்து தமிழர்கள், தம் திருமண விழாக்களில் அம்மி மிதித்தல் என்ற ஒரு நிகழ்வை ஆயிரம் ஆண்டுகளுக்கு மேலாக கொண்டாடி வருகிறார்கள். உதாரணமாக கி.பி. 6ஆம் நூற்றாண்டு - 9 ஆம் நூற்றாண்டு நாலாயிரத் திவ்வியப் பிரபந்தத்தில்:

"செம்மை யுடைய திருக்கையால் தாள்பற்றி,

அம்மி மிதிக்கக் கனாக்கண்டேன் தோழீநான்"

என்ற வரி இதை உறுதி படுத்துகிறது. மணப் பெண் மன உறுதிக்காக அம்மியை மிதிக்க வைப்பது என பொதுவாக கூறப் பட்டாலும், அன்றைய கால கட்டத்தில் அம்மியையும் பெண்ணையும் பிரிக்க முடியாமல் இருந்தது உண்மையே. அன்று அம்மியும் குழவியும் இல்லாத வீடே கிடையாது எனலாம், பெண் என்பவள் மனைவியாக, தாயாக வீட்டை , சமையலை கண்காணிப்பதில் முழுநேரம் ஒதுக்கிய காலம் அது. அன்றைய சமையலில் பிரிக்க முடியாத சமையல் உபகரணம் கட்டாயம் அம்மியாகவே இருந்து இருக்கும். அரைத்தல், பொடியாக்குதல், நொறுக்குதல் என பலவகை செயல் பாடுகளுக்கு அது பெண்களுடன் இணைந்தே இருந்திருக்கும். எனவே மணமுடித்து புது குடித்தனம் போகும் மணப்பெண்ணுக்கு  ஒரு சமூக மற்றும் கலாச்சார ரீதியாக இணைக்கப் பட்ட அம்மியை ஞாபக படுத்தும் ஒரு சடங்காகவும் இது இருந்து இருக்கலாம் ?. அதற்கு வலு சேர்க்க, புராண காரணங்கள் சேர்க்கப் பட்டு இருக்கலாம் ? 

தமிழனுடன் அம்மி எவ்வளவு தூரம் அன்று இணைந்து இருந்தது என்பதற்கு நாம் இன்னும் ஒரு உதாரணம் கூறலாம்.

"ஆடிப்பட்டம் தேடிவிதை

ஆடிக்காற்றில் அம்மியும் பறக்கும்"

"அடிமேல் அடி வைத்தால் அம்மியும் நகரும்"

போன்ற பழமொழிகளையும் கூறலாம்.  இதில் ஒன்று நீங்கள் கவனிக்க வேண்டியது, ஆட்டுக்கல் , உரல் போன்றவை சமயலுடன் இணைந்து இருந்தாலும் அது இங்கு பேசப் படவில்லை என்பதே ஆகும். இது தான் அம்மியின் முக்கியத்தை எடுத்து காட்டுகிறது. அது மட்டும் அல்ல முதல் தோன்றியதும் அம்மியின் மூல முன் வடிவமே [proto grinding-slab or ammikkal] ஆகும் !

[கந்தையா தில்லைவிநாயகலிங்கம்]

பகுதி 03 வாசிக்க அழுத்துங்கள்-Theebam.com: "தமிழர்களின் பண்டையநான்கு கற்கள்"/பகுதி03:

ஆரம்பத்திலிருந்து வாசிக்க அழுத்துங்கள்-

Theebam.com: "தமிழர்களின் பண்டைய நான்கு கற்கள்" / பகுதி 01:

➡➡➡➡➡➡➡➡

படம் /  Photo 01 - அம்மியும் குழவியும்

படம் /  Photo 02 - a ] தினை, ஒரு வகை சோளம் மற்றும் மக்காச்சோளம் [millet, sorghum, and maize] போன்றவற்றை அரைக்க பயன் பட்ட  பிரகாசமான படிவுப் பாறையில் அமைந்த அரைக்கும் அடுக்குகள் [அம்மி]  / Gneiss grinding-slab used for processing millet, sorghum, and maize. b ] கை கற்கள் [அம்மிக் குழவி]. இதில் வலது பக்கம் இருப்பது, சோளத்தின் ஆரம்ப [முதல்]  அரைத்தலுக்கான மிகவும் கரடு முரடான கட்டமைப்பை கொண்டது ஆகும். இடது பக்கம் இருப்பது, தினை மற்றும் சோளத்தின் இரண்டாவது அரைத்தலுக்கான மிகவும் அழுத்தமான கட்டமைப்பை கொண்டது ஆகும். / Flat-handstones; tool on the right is more roughly textured, and used for initial grinding of sorghum, tool on the left is more smoothly textured, and used for millet and the second grinding of sorghum. [Found in Africa]

படம் /  Photo 03 -  உணவை அரைப்பதற்குப் பயன்படுத்தப்படும் கற்கள் / Stones used for grinding food

படம் /  Photo 04 -  அரைக்கும் கல் - ஆஸ்திரேலியன் அருங்காட்சியகம் / Grindstones  - Australian Museum

படம் /  Photo 05 -  அரைக்கும் கல்,  க்ரோட்டோ பக்லிக்சி, இத்தாலி. மாத்தானியம் அதன் மேற்பரப்பில்  படிந்து இருந்தது காணப் பட்டது  / A grinding stone from Grotta Paglicci, Italy, and a starch grain that was found embedded in its surface. Sources: Stefano Ricci, Marta Mariotti Lippi / University of Florence

படம் /  Photo 06 -  கி மு 2345 முதல் கிமு 2181 வரை ஆட்சி செய்த எகிப்தின் ஆறாம் வம்ச காலத்தில், வேலைக்காரி ஒருத்தி சோளம் அரைக்கும் சிலை / Servant grinding corn / Sixth Dynasty of Egypt  [ca. 2345 BC–ca. 2181 BC ]

🥌🥌🥌🥌🥌🥌🥌🥌🥌🥌

Read More

கொரோனா: நான்காவது டோஸ் தடுப்பூசி இப்போது தேவையா?

மருத்துவ வல்லுநர்கள் சொல்வதென்ன?

சில நாடுகளில் பூஸ்டர் டோஸ் தடுப்பூசிக்கு பின் கூடுதலாக வழங்கப்படும், நான்காவது டோஸ் தடுப்பூசி இப்போதைக்குத் தேவை இல்லை என பிரிட்டனைச் சேர்ந்த சில மருத்துவ நிபுணர்கள் கூறுகின்றனர். அப்படியானால் பூஸ்டர் டோஸ் தடுப்பூசியே போதுமானதா?

வயதானவர்களுக்குக் கூட, ஒமிக்ரான் திரிபினால் ஏற்படும் கடுமையான உடல்நலக் குறைவு மற்றும் நோய்வாய்ப்படுவதற்கு எதிராக அதிக பாதுகாப்பை பூஸ்டர் டோஸ், வழங்குகிறது என்கிறார்கள் மருத்துவ வல்லுநர்கள்.

 

பிரிட்டனின் சுகாதார பாதுகாப்பு முகமையின் தரவுகளின்படி, 65 வயது மற்றும் அதற்கு மேற்பட்டோர், பூஸ்டர் டோஸ் செலுத்திக் கொண்டு மூன்று மாதங்களுக்கு பிறகும், கொரோனாவால் பாதிக்கப்பட்டு மருத்துவமனையில் அனுமதிக்கப்படுவது, 90 சதவீதம் தவிர்க்கப்படுகிறது.

 

லேசான கொரோனா அறிகுறிகளுடன் கூடிய தொற்றுக்கு எதிரான பாதுகாப்பு பெரிதாகக் குறையவில்லை. அது சுமார் மூன்று மாதங்களில் 30% மட்டுமே குறைந்துள்ளது.

 

இதுவரை இரு டோஸ் கொரோனா தடுப்பூசி மட்டுமே செலுத்திக் கொண்டவர்கள், பூஸ்டர் டோஸ் செலுத்திக் கொள்வது ஏன் அவசியம் என்றும் தரவுகள் கூறுகின்றன.

 

இரு டோஸ் தடுப்பூசி செலுத்திக் கொண்ட பிறகு கொரோனாவால் தீவிர நோய்வாய்ப்படுவதற்கு எதிரான பாதுகாப்பு மூன்று மாத காலத்துக்குப் பிறகு 70 சதவீதமாகவும், ஆறு மாதங்களுக்குப் பிறகு 50 சதவீதமாகவும் குறைகிறது.

 

இதுவரை இருடோஸ் தடுப்பூசி மற்றும் பூஸ்டர் டோஸ் செலுத்திக் கொள்ளாதவர்கள் அதைச் செலுத்திக் கொள்ள முன்னுரிமை வழங்கப்பட வேண்டும் என பிரிட்டன் அரசுக்கு தடுப்பூசி கொள்கை தொடர்பாக ஆலோசனை வழங்கும் ஜே.சி.வி.ஐ (தடுப்பூசி மற்றும் தடுப்பூசிக்கான கூட்டுக் குழு) கூறுகிறது.

 

அதீத பரவும் திறன் கொண்ட, உலக அளவில் கொரோனாவால் பாதிக்கப்படுவோரின் எண்ணிக்கையை அதிகரித்து வரும் ஒமிக்ரான் திரிபை சமாளிக்க, இஸ்ரேல் போன்ற சில நாடுகள் நான்காவது டோஸ் கொரோனா தடுப்பூசி செலுத்தத் தொடங்கியுள்ளன.

 

"கொரோனாவால் எளிதில் பாதிக்கப்படக் கூடிய வயதானோர் குழுக்களுக்கு கூட, கடுமையாக நோய்வாய்ப்படுவதில் இருந்து, பூஸ்டர் டோஸ் தொடர்ந்து சிறப்பான பாதுகாப்பை வழங்கி வருவதாக தற்போதைய தரவுகள் கூறுகின்றன" என்கிறார் ஜே.சி.வி.ஐ குழுவின் தலைவர் பேராசிரியர் வெய் ஷென் லிம்.

 

"இது மிகவும் ஊக்கமளிப்பதாக இருக்கிறது. மேலும் பூஸ்டர் டோஸின் மதிப்பை வலியுறுத்துவதாக இருக்கிறது.

 

"ஒமிக்ரான் திரிபு தொடர்ந்து பரவி வரும் நிலையில், கடுமையாக நோய்வாய்ப்படுவதற்கு எதிராக பாதுகாப்பை அதிகரித்துக் கொள்ள, அனைவரும் முன் வந்து பூஸ்டர் டோஸையும், இரு டோஸ் தடுப்பூசியைச் செலுத்திக் கொள்ளவில்லை என்றால், அதை செலுத்திக் கொள்ளவும் அனைவரையும் கேட்டுக் கொள்கிறேன்" என்கிறார் பேராசிரியர் வெய் ஷென் லிம்.

 

'சரியான நேரமல்ல'

வயதானவர்கள் மோசமாக நோய்வாய்ப்படுவதற்கு எதிராக பாதுகாப்பு குறைவாக இருப்பதாக தரவுகள் கூறினால், உடனடி நடவடிக்கை தேவை என ஜே.சி.வி.ஐ அமைப்பின் துணைத் தலைவர் பேராசிரியர் ஆண்டனி ஹார்ண்டென் கூறினார்.

 

"இப்போதைக்கு எல்லா சமிக்ஞைகளும் நன்றாகவே இருக்கின்றன" என பிபிசி ரேடியோ 4ன் சமீபத்திய நிகழ்ச்சி ஒன்றில் கூறினார். "ஒவ்வொரு மூன்று மாதத்துக்கும் ஒரு தடுப்பூசியைச் செலுத்துவது, தடுப்பூசி திட்டத்துக்கு ஒத்து வராது" என்றும் கூறினார்.

 

கொரோனாவால் பாதிக்கப்படக் கூடிய மக்களுக்கு நான்காவது டோஸ் தடுப்பூசி செலுத்துவதற்கு சரியான நேரம் மிகவும் அவசியம் என்கிறார்.

"நான்காவது டோஸ் தடுப்பூசி செலுத்த இந்த ஆண்டின் எதிர்வரும் காலம் சரியாக இருக்கலாம்... ஆனால் இப்போது சரியான நேரமல்ல என்று நாங்கள் கருதுகிறோம்" என்றார் ஆண்டனி ஹார்ண்டென்.

 

ஆனால், கொரோனாவால் மோசமாக பாதிக்கப்பட வாய்ப்புள்ள நோயாளிகள், நோயெதிர்ப்பு மண்டலம் முழுமையாக செயல்படாதவர்கள், வழக்கமான மூன்று டோஸ் தடுப்பூசிக்கு பதிலாக நான்கு டோஸ் தடுப்பூசியைச் செலுத்திக் கொள்வது நல்லது.

 

கொரோனா தடுப்பூசிகள் சிறப்பாக செயல்பட்டு வந்தாலும், அதிக எண்ணிக்கையில் கொரோனா தொற்று பரவி வருவதால், சிலருக்கு உடல் நலக்குறைவு ஏற்பட்டு, மருத்துவமனை சிகிச்சைகள் தேவைப்படுகின்றன.

 

பிரிட்டன் முழுக்க வேறுபடும் கொரோனா விதிமுறைகள் மக்களை நிச்சயமற்ற தன்மையை உணரச் செய்வதாக தான் நம்புவதாக ஸ்வான்சீ பல்கலைக்கழகத்தின் உளவியல் விரிவுரையாளர் டாக்டர் சைமன் வில்லியம்ஸ் பிபிசியிடம் கூறினார்.

 

கொரோனா வைரஸின் ஒமிக்ரான் திரிபு அலையில் பாதிக்கப்பட்டு, மருத்துவமனைகளில் அனுமதிக்கப்படுவோரின் எண்ணிக்கை அதிகரிப்பு, குறிப்பாக வயதானவர்கள் எண்ணிக்கை கவலையளிப்பதாக பிரிட்டனின் சுகாதாரச் செயலர் சஜீத் ஜாவேத் கூறுகிறார்.

 

"மருத்துவமனையில் அனுமதிக்கப்படுவோரின் எண்ணிக்கை அதிகரிப்பதை இப்போதும் நாங்கள் தொடர்ந்து பார்க்க முடிகிறது. குறிப்பாக வயதானவர்கள் எண்ணிக்கை அதிகரிப்பது கவலைக்குரியதாக இருக்கிறது" என்கிறார் அவர்.

 

"தேசிய சுகாதார சேவையின் நிலையைப் பார்க்கும் போது, நாம் நேர்மையாக இருக்க வேண்டும் என்று நான் கருதுகிறேன். அடுத்த சில வாரங்களில் தேசிய சுகாதார சேவை மிகவும் சிக்கல் நிறைந்த ஒன்றாகலாம்" என்றார் சஜித் ஜாவேத்.

 

ஒருபக்கம் மக்கள் கொரோனாவால் பாதிக்கப்பட்டு மருத்துவமனைகளில் அனுமதிக்கப்படுவது அதிகரிக்கிறது என்றால், மறுபக்கம் கொரோனா தொடர்பாக இங்கிலாந்தில் சுகாதாரப் பணியாளர்கள் வருகை கணிசமாகக் குறைந்துள்ளது. இப்பிரச்னை கடந்த டிசம்பர் மாத தொடக்கத்திலிருந்து தொடர்கிறது.

 

ஜனவரி 2ஆம் தேதியுடன் நிறைவடைந்த வாரத்தில், இங்கிலாந்தில் தினமும் சுமார் 36,000 மருத்துவப் பணியாளர்கள் கொரோனா காரணங்களால் ஒவ்வொரு நாளும் பணிக்கு வரவில்லை. இது மொத்த மருத்துவ பணியாளர்கள் எண்ணிக்கையில் கிட்டத்தட்ட நான்கு சதவீதம் என்பது குறிப்பிடத்தக்கது.

 

மற்ற உடல்நலக் குறைவு காரணங்களைச் சேர்த்தால் இந்த எண்ணிக்கை ஒன்பது சதவீதமாக அதிகரிக்கிறது.

 

மிஷெல் ராபர்ட்ஸ்

சுகாதார ஆசிரியர், பிபிசி நியூஸ் இணையம்

Read More