பெற்றோரும் பிள்ளைகளும்


ஒரு தந்தையும் மகளும் ஆற்றின் தொங்கு பாலத்தைக் கடக்க முயற்சி செய்தனர்.
தந்தை சொல்கிறார்என் கையைக் கெட்டியாப் பிடிச்சிக்கோ
மகள் சொல்கிறாள்நீங்க, என் கையைப் பிடிச்சிக்கோங்க
ரெண்டுக்கும் என்னம்மா வித்தியாசம்?” தந்தை கேட்கிறார்.
நான் உங்கள் கையைப் பிடித்தால், ஏதேனும் தவறு நடந்தால் பதட்டத்தில் கையை விட்டுவிட வாய்ப்பு இருக்கின்றது. ஆனால் நீங்கள் பிடித்தால் எந்த ஒரு நிலையிலும் என் கையை விடமாட்டிங்கப்பாஎன்றாள் மகள்.
எந்த ஒரு சூழ்நிலையிலும் பெற்றோர் , பிள்ளையை கைவிடமாட்டார்  என்பதற்கு இது ஒரு உதாரணம். பிள்ளைகள் எப்படி நடந்தாலும் பிள்ளைகளோடு கோவித்துக்கொண்டிராதவர்கள்  பெற்றோர்கள். ஏனெனில் பெற்றோர்களுக்கு  தம் பிள்ளைகள் என்றும் குழந்தைகளே.
ஆனால் ,என்னதான் செய்தாலும் பெற்றோருடன்  சிறுவயதில் வராத கோவம் பிள்ளைகளோ திருமணமாகிவிட்டால் பெற்றோர் நடந்துகொள்ளும் விதத்தில் அவர்களுக்கு பெற்றோர்களுடன் கருத்து வேறுபாடுகளும் தொடர்ந்து கோவம் வருவது வேகமாகவே இருக்கிறது.
மனிதத்தினை மதியாது , உள்ளம் பெருங்கோவில்  ஊனுடம்பு ஆலயம் என்ற திருமூலரின் வாக்கினை உணராது அடுத்தவர் உள்ளத்தினை உடைத்துக் கொண்டு பட்டினியுடன் விரதமிருந்தென்ன, தினசரி ஆலயம் சென்றென்ன,நேர்த்திக்கடன் வைத்தென்ன ,எதுவித பலன் எதுவுமில்லை!

⛪↦↦↦↦↦தொகுப்பு : செ .மனுவேந்தன் 






இந்தியா செய்திகள் 23/july,2019 📺

>

👉 வகுப்பறையில் மாணவர்கள்முன் ஆசிரியை படுகொலை
ராமநாதபுரம் ஓம் சக்தி நகரை சேர்ந்தவரான குருமுனீஸ்வரன், சென்னையில் கட்டிட என்ஜினீயராக வேலை செய்து வந்தார். அவருக்கும், ஆசிரியை ரதிதேவிக்கும் (வயது 33) 8 ஆண்டுகளுக்கு முன்பு திருமணம் நடந்தது. இவர்களுக்கு 5 வயதில் ஹர்சவர்ஷினி, ஹர்சவர்ஷன் ஆகிய இரட்டை குழந்தைகள் உள்ளனர்.
கணவர் சென்னையில் வேலை பார்த்ததால் ரதிதேவி ராமநாதபுரத்தில் உள்ள மாமியார், மாமனாருடன் வசித்து வந்தார். இதற்கிடையே ரதிதேவிக்கும், கணவர் குடும்பத்தினருக்கும் இடையே அடிக்கடி தகராறு ஏற்பட்டுள்ளது. இதனால் அவர் கோபித்துக் கொண்டு, விருதுநகர் மாவட்டம் காரியாபட்டி சித்தனேந்தலில் உள்ள தனது பெற்றோர் வீட்டிற்கு அடிக்கடி சென்றுவிடுவாராம். கடந்த ஓராண்டுக்கு முன்பு ஏற்பட்ட குடும்ப பிரச்சினை காரணமாக ரதிதேவி கணவரை விட்டு பிரிந்தார். பின்னர் குழந்தைகளுடன் தனது பெற்றோர் வீட்டுக்கு வந்துவிட்டார். அங்கேயே ஒரு பள்ளியில் ஆசிரியையாக அவர் வேலைபார்த்தார்.
இந்தநிலையில்தான் ரதிதேவி கடந்த மாதம் திருமங்கலத்தில் உள்ள ஆண்கள் மேல்நிலைப்பள்ளியில் சமூக அறிவியல் ஆசிரியையாக பணியில் சேர்ந்தார்.
சில தினங்களுக்கு முன்பு குருமுனீஸ்வரன் ராமநாதபுரம் வந்தார். அங்கிருந்து தனது மனைவியை தேடி காரியாபட்டி சென்றார். தன்னுடன் குடும்பம் நடத்த வருமாறு அழைத்துள்ளார். அதற்கு ரதிதேவி மறுப்பு தெரிவித்ததாக கூறப்படுகிறது. இதனால் அவர்களுக்கிடையே அன்றைய தினம் வாய்த்தகராறு ஏற்பட்டுள்ளது.
இந்தநிலையில்தான் குரு முனீஸ்வரன் தனது மனைவி வேலை பார்த்துவந்த பள்ளிக் கூடத்துக்கு நேற்று மாலை மோட்டார் சைக்கிளில் சென்றார். பள்ளிக்கூட வளாகத்தில் இருந்து சற்று தொலைவில் மோட்டார் சைக்கிளை நிறுத்திய அவர், ஹெல்மெட்டை தனது கையில் வைத்துக்கொண்டு வந்தார். பள்ளியில் 3-வது மாடியில் உள்ள 8-வது வகுப்பில் ரதிதேவி சமூக அறிவியல் பாடம் நடத்திக்கொண்டிருந்ததை அறிந்த அவர் நேராக அங்கு சென்றார். அவரை பார்த்ததும் ஆசிரியை ரதிதேவி சற்று அதிர்ச்சி அடைந்தார். அவரை நெருங்கிய குருமுனீசுவரன் தனது கையில் இருந்த ஹெல்மெட்டால் ஓங்கி அவரது தலையில் அடித்துள்ளார்.
இதில் ரதிதேவி நிலை தடுமாறினார். வகுப்பறையில் இருந்த மாணவர்கள் அலற தொடங்கினார்கள். உடனே குருமுனீசுவரன் தனது ஹெல்மெட்டுக்குள் மறைத்து கொண்டு வந்த ‘ஸ்குரு டிரைவர்’ மற்றும் கத்தியால் ரதிதேவியை சரமாரியாக குத்தினார்.
இந்த காட்சிகளை கண்ட மாணவர்களால், வெறிச்செயலில் ஈடுபட்ட குருமுனீசுவரனை நெருங்க முடியாமல் போனது. ரத்த வெள்ளத்தில் வகுப்பறையிலேயே ரதிதேவி விழுந்தார். பின்னர் குருமுனீஸ்வரன் அங்கிருந்து வேகமாக நடந்து பள்ளிக்கூடத்தை விட்டு வெளியே சென்றுவிட்டார். இத்தனை காட்சிகளும் ஒரு சில நிமிடங்களில் அரங்கேற்றிவிட்டன.
பள்ளிக்கூட வளாகமே இந்த பயங்கர சம்பவத்தில் அதிர்ந்து போய் இருந்தது. மற்ற வகுப்பறைகளில் இருந்த ஆசிரிய-ஆசிரியைகள் ஓடிவந்து ரதிதேவியை ஆஸ்பத்திரிக்கு கொண்டு செல்ல முயன்றனர். ஆனால் அவர் சற்று நேரத்திலேயே பரிதாபமாக இறந்துவிட்டார்.
இதுபற்றி அறிந்த திருமங்கலம் டவுன் போலீசார் சம்பவ இடத்துக்கு விரைந்து வந்தனர். ஆசிரியை ரதிதேவியின் உடலை பரிசோதனைக்காக திருமங்கலம் அரசு ஆஸ்பத்திரிக்கு அனுப்பி வைத்தனர்.
இது சம்பந்தமாக போலீசார் வழக்குப்பதிவு செய்தனர். போலீசார் தேடிவந்த நிலையில், குருமுனீஸ்வரன் போலீஸ் நிலையத்தில் சரண் அடைந்தார். அவரை போலீசார் கைது செய்து தொடர்ந்து விசாரணை நடத்தி வருகின்றனர். இந்த சம்பவம் மதுரை மற்றும் திருமங்கலத்தில் பெரும் பரபரப்பை ஏற்படுத்தியது.

👉 அ.தி.மு.க. மாணவரணி நிர்வாகி எரித்து கொலை
தேனி மாவட்டம் ஆண்டிப்பட்டி குமாரபுரத்தை சேர்ந்தவர் சதீஸ் குமார்(வயது 26). அ.தி.மு.க. ஒன்றிய மாணவரணி துணை செயலாளராக இருந்தார். மேலும் ரியல் எஸ்டேட் தொழில் செய்து வந்தார். நேற்று முன்தினம் இரவு இவர், மதுரைக்கு செல்வதாக வீட்டில் கூறி விட்டு தனது காரில் புறப்பட்டு சென்றார். பின்னர் அவர் வீடு திரும்பவில்லை. இந்தநிலையில் நேற்று காலையில் டி.வி.ரெங்கநாதபுரம் பகுதியில் உள்ள அவருடைய தோட்டத்தில் சதீஸ்குமாரின் கார் நின்று கொண்டிருந்தது. அதன் அருகே சதீஸ்குமார் உடல் எரிந்த நிலையில் பிணமாக கிடந்தார்.
இதுகுறித்து தகவல் அறிந்த ஆண்டிப்பட்டி போலீசார் சம்பவ இடத்திற்கு சென்று விசாரணை நடத்தினர். சதீஸ்குமாரின் உடல் கிடந்த இடத்தில் இருந்த அவருடைய 2 செல்போன்களை போலீசார் கைப்பற்றினர். முன்விரோதம் அல்லது தொழில் போட்டி காரணமாக சதீஸ்குமார் கொலை செய்யப்பட்டாரா? என்ற கோணத்தில் போலீசார் விசாரித்து வருகின்றனர். மதுரைக்கு செல்வதாக கூறி சென்ற சதீஸ்குமாரை கொலையாளிகள் கடத்தி சென்று வேறு இடத்தில் வைத்து கொலை செய்துள்ளனர். பின்னர் உடலை காரில் கொண்டு வந்து அவருடைய தோட்டத்தில் வைத்து எரித்திருக்கலாம் என்று போலீசார் கருதுகின்றனர். இந்த கொலையில் தொடர்புடையவர்களை போலீசார் வலைவீசி தேடி வருகின்றனர்.

👉 கடத்தப்பட்ட சிறுமி 8 மணி நேரத்தில் மீட்பு
சென்னை அமைந்தகரையில் கடந்த 17-ந்தேதி அன்று கடத்தப்பட்ட அன்விகா என்ற 4 வயது சிறுமியை 8 மணி நேரத்தில் போலீசார் மீட்டனர். கடத்திய குற்றவாளிகளும் கைது செய்யப்பட்டனர். இதன்மூலம் சென்னை பாதுகாப்பான நகரம் என்பது நிரூபணமாகியுள்ளது என்று போலீஸ் கமிஷனர் ஏ.கே.விஸ்வநாதன் பெருமிதத்துடன் கூறினார்.
இதையொட்டி, சிறுமி அன்மிகாவின் தந்தை அருள் ராஜூம், தாயார் நந்தினியும் நேற்று மாலை சென்னை போலீஸ் கமிஷனர் அலுவலகத்துக்கு வந்தனர். போலீஸ் கமிஷனர் ஏ.கே.விஸ்வநாதனையும், குழந்தையை பத்திரமாக மீட்ட தனிப்படை போலீசாரையும் பாராட்டி பூங்கொத்து வழங்கினார்கள்.

👉கஞ்சா புகைத்ததை போலீசில் கூறியதால் தாக்குதல்..!
சென்னை பூக்கடை என்.எஸ்.சி. போஸ் சாலை, பத்ரியன் தெரு சந்திப்பில் சாலையோரம் நிறுத்தப்பட்டிருந்த ஆட்டோ அருகே முகமது சுல்தான் என்பவர் தனது இருசக்கர வாகனத்தை நிறுத்தி உள்ளார்.
அப்போது ஆட்டோவில் இருந்தவர்கள் வெளியே எச்சில் துப்பி உள்ளனர். அது முகமது சுல்தானின் காலிலும், பேண்ட்டிலும் பட்டதால், அவர் ஆட்டோவின் உள்ளே பார்த்துள்ளார். அப்போது ஆட்டோவில் இருந்தவர்கள் கஞ்சா புகைத்து கொண்டிருந்தாக கூறப்படுகிறது.
இதுகுறித்து அந்த பகுதியில் பணியில் இருந்த போக்குவரத்து காவலரிடம் முகமது சுல்தான் புகார் அளித்துள்ளார். இதனையடுத்து அங்கு வந்த  போக்குவரத்து காவலர் அவர்களை எச்சரித்துவிட்டு சென்றுள்ளார்.  இதனையடுத்து, தங்களை பற்றி போலீசிடம் புகார் அளித்த முகமது சுல்தானை, நெரிசலான சாலையில் ஓட ஓட விரட்டி அவர்கள் இருவரும் அடித்துவிட்டு ஆட்டோவில் அங்கிருந்து சென்றுள்ளனர்.
இந்த காட்சிகள் அந்த பகுதியில் அமைக்கப்பட்டிருந்த சிசிடிவி கேமராவில் பதிவான நிலையில், இதுகுறித்து முகமது சுல்தான் பூக்கடை காவல் நிலையத்தில் புகார் அளித்துள்ளார்.
அதன்படி கொலை முயற்சி என வழக்கு பதிவு செய்த போலீசார், தாக்கியவர்களை அந்தபகுதியில் தேடி உள்ளனர். அப்போது அதே பகுதியில் ஆட்டோவை நிறுத்திவிட்டு நடைபாதையில் படுத்திருந்த அவர்கள் இருவரையும் போலீசார் கைது செய்து விசாரணை நடத்தினர்.
அதில் அவர்கள் கண்ணகி நகரை சேர்ந்த ஆட்டோ ஓட்டுநர் ராபர்ட் மற்றும் அவரது நண்பரான சென்ட்ரலை சேர்ந்த தீனா என்பது தெரியவந்தது.

👉 தமிழ் பாடம் நடத்தியவர்களுக்கு, 'நோட்டீஸ்'
ரசு தொடக்க பள்ளிகளில் படித்து, ஆறாம் வகுப்பில் சேர்ந்த மாணவர்களுக்கு, தமிழ் வாசிக்க தெரியாததால், சம்பந்தப்பட்ட பள்ளி ஆசிரியர்களுக்கு, 'நோட்டீஸ்' அனுப்பப்பட்டுள்ளது.
மத்திய அரசின், கட்டாய கல்வி உரிமை சட்டம், தமிழகத்தில், 2009 முதல் அமலில் உள்ளது. இந்த சட்டத்தின் கீழ், 14 வயது வரையுள்ள மாணவர்களுக்கு, இலவச கட்டாய கல்வி வழங்கப்படும். அதனால், எட்டாம் வகுப்பு வரை மாணவர்களுக்கு, தேர்வுகள் எதுவும் இன்றி, தேர்ச்சி செய்யப்படுகின்றனர்.தேர்வுகள் இல்லாததால், அரசு தொடக்க பள்ளிகளில், மாணவர்களுக்கு சரியாக பாடம் நடத்துவதில்லை. மாணவர்களின் கற்றல் திறனில், ஆசிரியர்களும் ஆர்வம் காட்டுவதில்லை. அதனால், ஐந்தாம் வகுப்பு முடித்து, ஆறாம் வகுப்பில் சேரும் பெரும்பாலான மாணவர்களுக்கு, தமிழ் எழுத, படிக்கவே தெரியாத நிலை உள்ளது.
இதையடுத்து, இந்த ஆண்டு, அரசு தொடக்க பள்ளிகளில் படித்து, உயர்நிலை பள்ளிகளில் சேர்ந்த மாணவர்களின் கற்றல் மற்றும் வாசிப்பு திறன் ஆய்வு செய்யப்பட்டது. அதில், பல மாணவர்கள், தமிழ் வாசிக்கவே திணறியது தெரிய வந்தது.அதைத்தொடர்ந்து, அந்த மாணவர்கள் படித்த, தொடக்க பள்ளிகள்; அதன் ஆசிரியர்கள் விபரம் சேகரிக்கப்பட்டு, அவர்களிடம் விளக்கம் கேட்டு, நோட்டீஸ் அனுப்பும் பணி துவங்கியுள்ளது.

👉பக்தர்களிடம் நன்கொடை வசூலித்து முறைகேடு
திருவொற்றியூர், காலடிப்பேட்டை கல்யாண வரதராஜபெருமாள் கோவிலில் ராஜகோபுரம் அமைக்க பக்தர்களிடம் நன்கொடை வசூலித்து முறைகேடு செய்வதாக அளிக்கப்பட்ட புகார் மீது எடுக்கப்பட்ட நடவடிக்கை குறித்த அறிக்கையை தாக்கல் செய்ய வேண்டும் என்று இந்து சமய அறநிலையத்துறை ஆணையருக்கு சென்னை ஐகோர்ட்டு உத்தரவிட்டுள்ளது.

👉 வேலூரில் ரூ.2.38 கோடி பறிமுதல்
வேலூரில் முறையான ஆவணங்கள் இன்றி எடுத்துச்சென்றதாக ரூ.2 கோடியே 38 லட்சம் பணம் பறிமுதல் செய்யப்பட்டுள்ளதாக தமிழக தலைமை தேர்தல் அதிகாரி சத்யபிரத சாகு தெரிவித்துள்ளார்

👉 சென்னை இன்ஜினியர் ஓசூரில் கொலை
காதல் திருணம் செய்த 'சாப்ட்வேர் இன்ஜினியர்' கொலை செய்யப்பட்டு ராயக்கோட்டை அருகே ரயில் தண்டவாளத்தில் வீசப்பட்டார்.
சென்னை அயனாவரத்தைச் சேர்ந்தவர் சையத் தன்வீர் அகமத் 35; சாப்ட்வேர் இன்ஜினியர். இவரும் மதுரையை சேர்ந்த ஷில்பா 32, என்பவரும் கல்லுாரியில் படிக்கும் போது காதலித்துள்ளனர்.சையத்தின் பெற்றோர் சம்மதிக்காத நிலையில் இருவரும் திருமணம் செய்து கொண்டனர். பின் சையத்துக்கு அயர்லாந்து நாட்டில் பணி கிடைத்து மனைவியுடன் அங்கு சென்றார்.தற்போது ஷில்பா ஏழு மாத கர்ப்பமாக உள்ளார். அவரை பிரசவத்துக்காக கிருஷ்ணகிரி மாவட்டம் ராயக்கோட்டையில் தற்போது வசித்து வரும் ஷில்பாவின் தாய் வீட்டில் விடுவதற்காக சையத் அழைத்து வந்தார்.
இருவரும் ஒரு மாதமாக அங்கு தங்கி இருந்தனர். 12ம் தேதி பெங்களூரு சென்று வருவதாக ஷில்பாவிடம் கூறிச் சென்ற சையத் வீடு திரும்பவில்லை. ஷில்பா 13ம் தேதி ராயக்கோட்டை போலீசில் புகார் செய்தார்.
இந்நிலையில் ராயக்கோட்டை ரயில் நிலையம் அருகே தண்டவாளத்தில் ஆண் சடலம் கிடப்பதாக அப்பகுதி மக்கள் போலீசாருக்கு நேற்று தகவல் தெரிவித்தனர்.இதில் இறந்து கிடந்தது சையத் என தெரிந்தது. அவரது உடலில் ஆங்காங்கே வெட்டு காயங்கள் இருந்தன. 'காதல் திருமணம் செய்ததால் சையத் கொலை செய்யப்பட்டாரா?' என போலீசார் விசாரிக்கின்றனர்.

👉 போலீசுக்கு கத்திக்குத்து
திருச்சி, மண்ணச்சநல்லுார் அருகேயுள்ள, உளுந்தங்குடி பாலையநல்லுாரில் வசிப்பவர் ரெங்கராஜ், 55. ரயில்வே போலீசாக, பணியாற்றி வருகிறார்.
இவரது வீட்டை ஒட்டியுள்ள சந்தை பயன்படுத்துவது தொடர்பாக, பக்கத்து வீட்டுக்காரர் கோவேந்திரன், 35, இடையே தகராறு இருந்து வந்தது.நேற்று முன்தினம் அவர்களிடையே, தகராறு ஏற்பட்டது. கோவேந்திரன், கத்தியால், ரெங்கராஜை குத்தினார். படுகாயம் அடைந்த ரெங்கராஜ், மருத்துவமனையில், சேர்க்கப்பட்டார். கோவேந்திரன், அவரது தந்தை வண்ணமணியை போலீசார் கைது செய்தனர்.

👉 அன்னதானம் சாப்பிட்ட மூதாட்டி பலி , பலர் பாதிப்பு 
குமாரபாளையம் கோவில் விழாவில், அன்னதானம் சாப்பிட்ட, 200-க்கும் மேற்பட்டவர்களுக்கு, உடல்நலம் பாதிக்கப்பட்டது; மூதாட்டி பலியானார்.
நாமக்கல் மாவட்டம், குமாரபாளையம் அருகே, வட்டமலை தனியார் கல்லுாரி அருகே, சில நாட்களுக்கு முன், விநாயகர் கோவில் கும்பாபிஷேகம் நடந்தது. தினமும் மண்டல பூஜை நடத்தப்பட்டு, பொதுமக்களுக்கு அன்னதானம் வழங்கப்பட்டு வந்தது.கடந்த, 19ம் தேதி இரவு, இட்லி வழங்கப்பட்டது. ஏராளமானோர் சாப்பிட்டுள்ளனர். இவர்களுக்கு, மறுநாள் காலை முதல், வயிற்று வலி, குமட்டல், வாந்தி, மயக்கம் ஏற்பட்டுள்ளது.வட்டமலையை சேர்ந்த கோபால் மனைவி ரத்னா, 68, என்பவருக்கு மயக்கம் ஏற்படவே, குமாரபாளையம் அரசு மருத்துவமனைக்கு அழைத்து சென்றனர். ஆனால், வழியிலேயே அவர் இறந்தார்.
நேற்று, உடல்நிலை பாதிக்கப்பட்ட, மேலும் 50- பேர், குமாரபாளையம் அரசு மருத்துவமனையில் அனுமதிக்கப்பட்டனர். தொடர்ந்து, 200க்கும் மேற்பட்டவர்கள், மயங்கி விழும் நிலை தொடர்ந்ததால், நடமாடும் மருத்துவக் குழுவினர், சம்பவஇடத்திற்கு சென்று, சிறப்பு முகாம் நடத்தினர்.ஆபத்தான நிலையில் உள்ளவர்களுக்கு, குளுக்கோஸ் ஏற்றப்பட்டது. குமாரபாளையம் அரசு மருத்துவமனையில் சிகிச்சை பெற்று வருபவர்களை, மின் துறை அமைச்சர் தங்கமணி சந்தித்து, ஆறுதல் கூறி, பண உதவி செய்தார்.இது குறித்து, குமாரபாளையம் போலீசார் விசாரணை நடத்தி வருகின்றனர்.

👉 தந்தையை  அடித்து கொலை, கோபக்கார மகன் கைது
கடலுார் மாவட்டம், ஸ்ரீமுஷ்ணம் அடுத்த அந்தோணியார்புரத்தைச் சேர்ந்தவர், மரிய சின்னப்பன், 56; விவசாயி. இவர், மனைவியுடன் நேற்று, வயலுக்கு தண்ணீர் பாய்ச்சிக் கொண்டிருந்தார்.அப்போது, அதே பகுதியில், இவரது மகன் சகாய ஆரோக்கிய அந்தோணி, 25, வேப்பங்கொட்டை பொறுக்கி கொண்டிருந்தார். அவரிடம், 'எங்களோடு வயலில் வேலை செய்யாமல், ஏன் நிற்கிறாய்' என, மரிய சின்னப்பன் கேட்டதால், அவர்களுக்கு இடையே தகராறு ஏற்பட்டது.ஆத்திரமடைந்த சகாயம், அருகில் கிடந்த மரக்கட்டையை எடுத்து தாக்கியதில், மரிய சின்னப்பன் படுகாயம் அடைந்தார். அவரை, சிதம்பரம் ராஜா முத்தையா மருத்துவமனைக்கு கொண்டு சென்றனர். பரிசோதித்த டாக்டர்கள், மரிய சின்னப்பன் இறந்து விட்டதாக தெரிவித்தனர்.ஸ்ரீமுஷ்ணம் போலீசார், சகாயத்தை கைது செய்தனர்.

👉மதமாற்றத்தை கண்டித்து பொதுமக்கள் முற்றுகை
மதுரை:மதமாற்றம் செய்வதை கண்டித்து, மதுரை அருகே, கிறிஸ்துவ மதக் கூடத்தை, அப்பகுதியினர் முற்றுகையிட்டனர்.
மதுரை, பரவை, சத்தியமூர்த்தி நகரில், குறிப்பிட்ட சமுதாயத்தினர் அதிகம் வசிக்கின்றனர். 'இது, மதமாற்றம் செய்ய தடை செய்யப்பட்ட பகுதி' என, அப்பகுதியில், அறிவிப்பு பலகை வைத்துள்ளனர்.இவர்களை, அப்பகுதியைச் சேர்ந்த சிலர், கிறிஸ்துவ மதத்திற்கு மாற்றுவதாகவும், அவர்களின் குழந்தைகளை புகைப்படம் எடுத்து, ஆதரவற்றவர்களாக சித்தரித்து, இணையதளத்தில் காட்டி, வெளிநாடுகளில் இருந்து பணம் பெற்று வருவதாகவும் புகார்கள் எழுந்தன.
இது குறித்து, அதிகாரிகளிடம் புகார் தெரிவித்தும் நடவடிக்கை இல்லை.இந்நிலையில், மதமாற்றத்தில் ஈடுபட்டவர்களை கைது செய்யக் கோரி, நேற்று அப்பகுதியினர், கிறிஸ்துவ மதக்கூடத்தை முற்றுகையிட்டனர். கூடுதல், எஸ்.பி., வனிதா உள்ளிட்ட போலீசார் பேச்சு நடத்தியதால், முற்றுகை கைவிடப்பட்டது.

 👉 மொபைல் போன் வாங்கினால்- ஹெல்மெட் மோசடி
திருவண்ணாமலை மாவட்டம், வந்தவாசியைச் சேர்ந்தவர், சீனிவாசன், 45; மொபைல் போன் கடை வைத்துள்ளார். கிருஷ்ணகிரியைச் சேர்ந்தவர், சுதாகர், 34; ஜியோ நிறுவனத்தின், ஆரணி கிளை மேலாளர்.சுதாகரிடம், மொபைல் போன் விற்பனை தொடர்பாக, சீனிவாசன் மற்றும் பல்வேறு பகுதி ஏஜன்டுகள் வருவது வழக்கம். அவர்களிடம், '500 அல்லது 1,000 ரூபாய்க்கு, ஜியோ மொபைல் போன் வாங்கினால், ஒரு ஹெல்மெட் இலவசம்; விற்பனைக்கு, மொபைல் போன்கள் தேவையென்றால், தொகையை முன்பே கொடுக்க வேண்டும்' என, சுதாகர் கூறியுள்ளார்.
இதன்படி, சுதாகர் மற்றும் அவரது நண்பர் பிரசாந்த் ஆகியோரது வங்கி கணக்குகளுக்கு, 12 லட்சத்து, 90 ஆயிரம் ரூபாயை, ஏப்ரலில், சீனிவாசன் பரிமாற்றம் செய்தார்.இதேபோன்று, பலரிடமும், 1 கோடியே, 51 லட்சம் ரூபாயை சுதாகர் பெற்று, ஜியோ மொபைல் போன் மற்றும் ஹெல்மெட் தராமல், மோசடி செய்தார். பாதிக்கப்பட்ட ஏஜன்டுகள், எஸ்.பி., சிபிசக்கரவர்த்தியிடம் புகார் செய்தனர். மாவட்ட குற்றப்பிரிவு போலீசார் விசாரித்து, சுதாகரை நேற்று கைது செய்தனர்.

👉 மாட்டு வாலை அறுத்து அட்டகாசம்
திருப்பூர் மாவட்டம், காங்கேயத்தை அடுத்த பள்ளக்காட்டு புதுாரைச் சேர்ந்தவர், விவசாயி குப்புசாமி, 45; இவரது தோட்டத்தில், இரு மாடுகளை பராமரித்து, பால் கறந்து, கூட்டுறவு சங்கத்துக்கு கொடுத்து வந்தார்.இரு நாட்களுக்கு முன், இவரது தோட்டத்தில் கட்டி வைத்திருந்த, இரு மாடுகளையும் திடீரென காணவில்லை. சுற்றுப்பகுதி முழுவதும் தேடிய போது, புதர் அருகில், இரு மாடுகளும் படுத்திருந்தன. ஒரு மாட்டின் வால் அறுக்கப்பட்டும், மற்றொரு மாட்டின் நான்கு கால்கள் கட்டப்பட்ட நிலையிலும் இருந்தன. இதை பார்த்து, குப்புசாமி அதிர்ச்சியடைந்தார்.
கால்நடை டாக்டர் வரவழைக்கப்பட்டு, மாடுகளுக்கு சிகிச்சை தரப்பட்டது. காங்கேயம் போலீசில், குப்புசாமி புகார் அளித்துள்ளார். இச்செயலில் ஈடுபட்டவர்கள் யார் என, போலீசார் விசாரித்து வருகின்றனர்.
விவசாயிகள் கூறுகையில், 'காங்கேயம் பகுதியில், அடிக்கடி மாடுகளைக் கடத்தி, கட்டி வைக்கும் சம்பவங்கள் நடக்கின்றன. தற்போது, வாலையும் அறுத்துள்ளனர். இச்சம்பவத்தில் ஈடுபடுவோரை கண்டறிந்து, நடவடிக்கை எடுக்க வேண்டும்' என்றனர்.

👉 தவறி விழுந்து இறந்த எஸ்.ஐ.
கோவை மாவட்டம், பெரியநாயக்கன் பாளையம் அருகே உள்ளது, கதிர்நாயக்கன் பாளையம். இங்கு, மத்திய ரிசர்வ் போலீஸ் படை பிரிவு - சி.ஆர்.பி.எப்., மையம் செயல்படுகிறது. நாடு முழுவதும், மத்திய ரிசர்வ் படைக்கு தேர்வு செய்யப்படும் வீரர்களுக்கு, இந்த மையத்தில், பல்வேறு பயிற்சிகள் அளிக்கப்படுகின்றன.ஹரியானா மாநிலம், புல்வானியைச் சேர்ந்த, எஸ்.ஐ., பங்கஜ், 25, இங்கு பயிற்சி பெற்று வந்தார். 15ம் தேதி, உயரம் தாண்டும் பயிற்சியில் ஈடுபட்டு, தவறி விழுந்தார். பலத்த காயமடைந்த பங்கஜுக்கு, கோவை, தனியார் மருத்துவமனையில் சிகிச்சை அளிக்கப்பட்டது. சிகிச்சை பலனின்றி, நேற்று முன்தினம் இறந்தார்.

👉 டிரைவர் வீட்டில் 80 சவரன் நகை திருட்டு
அரசு பஸ் டிரைவர் வீட்டில், 80 சவரன் நகைகளை திருடிச் சென்றவர்களை, போலீசார் தேடிவருகின்றனர்.
திருச்சி, துறையூரைச் சேர்ந்தவர், அரசு பஸ் டிரைவர், தங்கவேல், 55. இவர், நேற்று முன்தினம் இரவு, மனைவியுடன் வீட்டிற்குள் துாங்கினார்.மாடியில், இவர்களது மகன் துாங்கினார். வீட்டின் பின்புற கதவை தாழிடாமல், வெறுமனேமூடியிருந்தனர்.நள்ளிரவில், பின்புற கதவு வழியாக உள்ளே நுழைந்த மர்ம நபர்கள், பீரோவில் வைத்திருந்த, 80 சவரன் நகை மற்றும், 50 ஆயிரம் ரூபாயை திருடிச் சென்றனர்.நேற்று காலை, திருட்டு சம்பவம் தெரிய வர, துறையூர் போலீசில் புகார் செய்த பின், விசாரணை நடக்கிறது.

👉 கைது செய்யப்பட்ட, 16 பேருடன்,15 பேருக்கு தொடர்பு
வெளிநாடுகளில் நிதி திரட்டி, ஐ.எஸ்., பயங்கரவாத அமைப்பு உதவியுடன், தமிழகத்தில் தாக்குதல் நடத்த, திட்டம் தீட்டியதாக கைது செய்யப்பட்ட, 16 பேருடன், மேலும், 15 பேருக்கு தொடர்பு இருப்பது, அம்பலமாகி உள்ளது.
சமீபத்தில், நாகப்பட்டினத்தைச் சேர்ந்த, அசன் அலி, 28; ஹாரிஸ் முகமது, 32, ஆகியோர், ஐ.எஸ்., பயங்கரவாத அமைப்புக்கு நிதி திரட்டி வருவதாக, என்.ஐ.ஏ., என்ற, தேசிய புலனாய்வு அமைப்பினரால் கைது செய்யப்பட்டனர்.விசாரணையில், இவர்கள், சர்வதேச பயங்கரவாத அமைப்பான, அல் - குவைதாவின் கிளையான, உ.பி.,யை தலைமையிடமாக கொண்டு செயல்பட்டு வந்த, 'அன்சருல்லா' என்ற பயங்கரவாத அமைப்பில், உறுப்பினராக இருந்ததும் தெரிய வந்தது.
இவர்கள், சென்னை, மதுரை, திருவாரூர், தேனி உள்ளிட்ட பகுதிகளைச் சேர்ந்த, 15க்கும் மேற்பட்ட இளைஞர்களை ஐ.எஸ்., உதவியுடன், தமிழகத்தில் தாக்குதல் நடத்த, சதி திட்டம் தீட்டியதும் தெரிய வந்தது. இதையடுத்து, துபாயில் இருந்து வெளியேற்றப்பட்ட, 22 - 35 வயதுடைய, 14 பேரை, டில்லியில், என்.ஐ.ஏ., அதிகாரிகள் கைது செய்தனர்.
ஏற்கனவே கைதான இருவருடன், இவர்களையும் சேர்த்து, 16 பேரையும், எட்டு நாட்கள் காவலில் எடுத்து, விசாரித்து வருகின்றனர்.இந்த வாலிபர்களுடன், மேலும், 15 பேர் தொடர்பில் இருந்தது தெரிய வந்துள்ளது. அவர்கள் யார், பதுங்கி இருக்கும் இடங்கள் குறித்து, என்.ஐ.ஏ., அதிகாரிகள் விசாரித்து வருகின்றனர்.

👉 தமிழ் படிக்காத ஆசிரியர்கள் மீது நடவடிக்கை
தமிழக அரசின் பணியாளர் பணி நிபந்தனைகள் சட்டத்தின்படி, பணியில் சேர்ந்த, இரண்டு ஆண்டுகளுக்குள், தமிழ்நாடு அரசு பணியாளர் தேர்வாணையம் நடத்தும், தமிழ் மொழி தேர்வில் தேர்ச்சி பெற வேண்டும். இந்நிலையில், அரசு உயர்நிலை மற்றும் மேல்நிலை பள்ளிகளில், பிற மொழிகளில் படித்த ஆசிரியர்கள் பலர், பணியில் சேர்ந்துள்ளனர். இவர்கள், பணியில் சேர்ந்த, இரண்டு ஆண்டுகளுக்குள், தமிழ் மொழிக்கான கட்டாய தேர்வை எழுதி தேர்ச்சி பெற வேண்டும் என்ற, நிபந்தனையுடன் பணி வழங்கப்பட்டது.ஆனால், நுாற்றுக்கணக்கான ஆசிரியர்கள், இந்த தேர்வில் தேர்ச்சி பெறாமல், தமிழ் தேர்வில் இருந்து விலக்கு கேட்டு, பள்ளி கல்வித் துறைக்கு, மனுக்கள் அனுப்பியுள்ளனர்.
இது குறித்து, அனைத்து மாவட்ட முதன்மை கல்வி அதிகாரிகளுக்கும், பள்ளி கல்வி பணியாளர் பிரிவு இணை இயக்குனர், நாகராஜமுருகன், சுற்றறிக்கை அனுப்பிஉள்ளார்.அதில், சட்டத்தை பின்பற்றி பணியில் சேர்ந்து, இரண்டு ஆண்டுகளுக்குள், தமிழ் தேர்வை முடிக்காதவர்கள் மீது எடுக்கப்பட்ட நடவடிக்கை விபரங்களை, அறிக்கையாக சமர்ப்பிக்க உத்தரவிட்டுள்ளார்.மேலும், தமிழ் தேர்வை முடிக்காதவர்கள் மீது, நடவடிக்கை மேற்கொள்ளவும் அறிவுறுத்தியுள்ளார்.
இதையடுத்து, முதன்மை கல்வி அதிகாரிகள் மற்றும் மாவட்ட கல்வி அதிகாரிகள் வழியே, அனைத்து பள்ளி தலைமை ஆசிரியர்களுக்கும், சுற்றறிக்கை அனுப்பப்பட்டுள்ளது.அரசின் பணி நிபந்தனை விதிகளின் படி, தமிழ் மொழி படிக்காத ஆசிரியர்கள் மீது, சஸ்பெண்ட் உள்ளிட்ட நடவடிக்கைகள் வேண்டும் என, உத்தரவிடப்பட்டுள்ளது.
தமிழே தெரியாத ஆசிரியர்கள் ஏன் பணியில் அமர்த்தப்படவேண்டும் என்ற கேள்வியும் தமிழகத்தில் எழாமலில்லை. இச்செயலும்  அங்கு தமிழின் அழிவுக்கு வித்திடுகிறது என கருத்துக்கள் கூறப் படுகின்றன.

👉 புதிய கல்விக்கொள்கை-நடிகர் சூர்யாவுக்கு, பாராட்டு
புதிய கல்விக்கொள்கை குறித்து கருத்து தெரிவித்த நடிகர் சூர்யாவுக்கு, வைகோ பாராட்டு தெரிவித்துள்ளார். புதிய கல்விக்கொள்கை குறித்து கருத்து தெரிவித்த நடிகர் சூர்யாவுக்கு, வைகோ பாராட்டு தெரிவித்துள்ளார்.

👉 பார் உரிமையாளர்களிடம் லஞ்சம் வாங்கிய புகார்
பார் உரிமையாளர்களிடம் லஞ்சம் வாங்கிய புகாரின் அடிப் படையில் 7 போலீஸ் அதிகாரிகள் உள்பட 10 பேர் மீது லஞ்ச ஒழிப்பு போலீசார் அதிரடியாக வழக்குப்பதிவு செய்துள்ளனர். இவர்கள் மீது இலாகாப்பூர்வ நடவடிக்கை பாய்கிறது.

👉 மக்கள் தாமாக முன்வந்து நிலம் கொடுக்க வேண்டும்
சாலைகள் அமைப்பதற்கு பொதுமக்கள் தாமாக முன்வந்து நிலம் கொடுக்க வேண்டும் என்று முதல்-அமைச்சர் எடப்பாடி பழனிசாமி வேண்டுகோள் விடுத்தார்.

👉 தமிழக அரசின் கடன் உயர்வு

தமிழக அரசின் கடன் நிலுவை தொகை 3.26 லட்சம் கோடி ரூபாயாக உயர்ந்துள்ளது. உள்ளாட்சி தேர்தல் நடத்தாததால் மத்திய அரசிடம் நிதியுதவி பெற முடியவில்லை' என தணிக்கை அறிக்கையில் கூறப்பட்டுள்ளது.


⛳⛳⛳⛳⛳⛳⛳⛳⛳⛳⛳⛳⛳⛳⛳⛳⛳