புழுவாய்ப் பிற!.............

                                                  

காற்றினிலே மிதந்து வந்த அந்தப் பேச்சொலியை நம்ப முடியாத மண்புழு, புல் தரையின் ஊடாகத் தன் தலையை உயர்த்தித் தன் உணர்விகளை அந்த ஒலி வந்த பக்கம் திருப்பியது. புழு  இனத்தின் பெயரைத் தன்னிச்சியாகப் பயன்படுத்தி, முழுப்  புழுக் குலத்தையுமே இழிவு படுத்தும் அந்த ஆவேச உரை எங்கிருந்து வருகிறது என்று அறியும் ஆவலில், தலையை சற்று அதிகமாகவே உயர்த்தியது. இத்தருணம். ஒரு இரக்கமற்ற மனித இராட்சத பாதமொன்று  அதன் மேல் அழுத்தவே, அது சட்டென்று தலையை உள்ளே இழுத்தாலும், தலைதான் தப்பியது, வால் சற்று துண்டிக்கப்பட்டது. ஆனாலும், அது தானாகவே குணமாகிவிடும் என்பதால், அந்த  வேதனையையும் பொருட்படுத்தாது, மீண்டும் உயர்ந்து  உன்னிப்பாகச்   செவி மடுத்தது.

தூரத்தில் பல்லாயிரக் கணக்கான பக்தர்களின் மத்தியில் சிவசீலர் சிவானந்தர் அவர்கள், தாம் மானிட ஜென்மம் கிடைத்த பெரும் பாக்கியம் பற்றி விளாசிக் கொண்டிருக்கிறார். அவர் தன் உரையில், ".........இறைவன் எங்களைக் கிடைத்ததற்கும் அரிய, ஆறறிவு கொண்ட மானிடராகப் படைத்திருக்கிறார். கேவலம் ஈனப் புழுக்களாகவோ  அல்லது காட்டு மனிதர், விலங்குகள் ஆகவோ படைக்காது, எங்களை  இந்த  உயர்குல  ஜீவனாகப்  படைத்தது நாம் செய்த புண்ணியமே.  இப்பிறவி அவர்  கொடுத்ததன் நோக்கம், இறைவனை வணங்கி முத்தி இன்பம் பெறுவதற்கே ஆகும். ஆதலால், நாம், ஆணவம் விடுத்து,  பேராசை நீக்கி, கொலை, களவு, பொய் விடுத்து, பிறர்மேல் அன்பு செலுத்தி,   பிற  உயிர்களை   நம்முயிராய் மதித்து, தான தர்ம கைங்கரியங்களில் ஈடுபட்டு  இறைவனின் பாதங்களை அடைவோமாக ....."

'அட கடவுளே' என்று புழு ஒலியுனர்விதனை அமுக்கிக்  கொண்டது. "யார், யார் எவரைப் பற்றி, என்னதான் கதைப்பது என்று விவஸ்தையே இல்லாமல் போய் விட்டது. கேவல குணங்கள் முழுவதும் செறிந்து  அடங்கிய மனிதன் தன்னைத் தானே புகழ்ந்து தம்பட்டம் அடிக்கிறான். விலங்குகள் கொண்டிருக்கும் அபரிதமான புலனறிவுகளில் ஒரு சிறிதளவே கொண்டுள்ள மனிதன் எந்த வகையில் சிறந்தவனாம்? "  புழு புழுங்கியது.  "ஆறறிவாம் ஆறறிவு! எம்மக்குள்ள  மெய்யறிவு அவனுக்குள்ளதா? நாம் மண்ணாசை, பொன்னாசை, பெண்ணாசை கொண்டு தினந்தோறும் அலைந்தோமா? பல் சுவை உணவு தேடி ஊர் ஊராய் திரிந்தோமா? மண்தானே நம் உணவு.  நாம் கொள்ளையும் அடிப்பதில்லை. கொலையும் செய்வதில்லை.பெரும்பதவி தேடிப்  பன்னாடும் செல்வதில்லை. பெரு மனையும்  தேவையில்லை. பெருமூர்தி கொண்டதில்லை. விலை  உயர்ந்த துணிகளும்  தான், அணிகளும்  தான் எம்மவர்க்குத் தேவை இல்லை.  மதுவகையைத்   தொட்டதில்லை.  பிறர் மாதைத்  தீண்டவில்லை. புகைப்பழக்கம்  எதுவுமில்லை. ஆணவம் கொண்டதில்லை. மாயையில் விழுந்ததில்லை. நாம் எல்லாம் ஒரு குலமே. எல்லோரும் அன்பர்களே. தாயுமானவரும், அருணகிரியாரும் கூறியவாறு எந்தவொரு  துர்க்குணமும் இல்லாது சும்மாவே இருப்பதனால் நாம் தானே நிச்சயமாய்  சிவகதியை அடைந்திடுவோம்! தம் விதியை அறியாத பெருமூளை சுமந்திருக்கும் வெறும்  மனிதன்  பிதற்றுகிறான்,  'ஈனப்புழு'  என்று உயர் இனமாம் எமை நோக்கி! “

இந்த வேளையில் ஒரு சின்ன இராட்சதம் தடியொன்றை வீசவே புழு இரண்டு பட்டது. அதையும் பொருட்படுத்தாத புழு  இறைவனை நோக்கி வேண்டியது:

"இந்தப் பேராசை கொண்ட, வெறி பிடித்த, சுயநலம் மிக்க  இந்த அரைகுறை அறிவுடை  மனித ஜெந்துகள், பற்பல பிறப்புகள் கண்டு,  கடைசியில் நற்புழுவாக  உயர் ஜென்மம் எடுத்து,  சிவகதி  அடைய  அளுள் செய்வாய் என்  இறைவா"  எனக்கூறியபடி தன இனத்தவருடன் சும்மா இருக்க  மண்ணினுள் மறைந்தது.

"பேராசை கொண்ட அரை மனிதன் நல் வாழ்க!" - புழுப்புராணம் 48 . 
.. - செ.சந்திரகாசன்

Read More

கல்யாணத்தின் பின் காதல்? [short movie]

Oh Kadhal Ithu Thana -  New Tamil Romantic Short Film 2018 || by Chudar KVS

Read More

கல்லூரியில் நமது வாழ்க்கை

ஒரு மனிதன் சிறப்பாக சமூகமயமாவது என்றால் என்ன?[பகுதி 02]

[பகுதி 01]அலுவலகத்தில் பழகுதல்

[பகுதி 02]கல்லூரியில் நமது வாழ்க்கை

[பகுதி 03]சமூகத்தில் பழகுதல்

வேறு சில ஆலோசனைகள்

ஒருவர், தான் படிக்கும் கல்லூரியில், நண்பர்களை உருவாக்கிக் கொள்வதென்பது, ஒருவகையில் கடினம் மற்றும் ஒருவகையில் எளிது. ஆனால், பெரும்பாலானோருக்கு, எளிதில் பிறரிடம் பழகுவதென்பது, ஒரு கஷ்டமான காரியமாகவே உள்ளது. ஆனால், அந்த கடினத்தை, நாம் விரைவில் எளிதாக்கலாம். உங்களுடன், பள்ளிப் பருவத்திலிருந்தே படித்து அல்லது உங்கள் பக்கத்து வீட்டில் அல்லது ஊரில் வசித்த நண்பர் யாரேனும், உங்களது கல்லூரியில் சேர்ந்திருந்தால், புதிய சூழலுக்கு பழகிக்கொள்ள அவர் உதவலாம்.

புதிய மாணவர்களுக்கான party மற்றும் அவர்களுக்கான வாரஇறுதி விழா போன்ற நிகழ்வுகளிலும், கல்லூரியில் நடக்கும் வேறுபல நிகழ்ச்சிகளிலும் கலந்துகொள்வதன் மூலமாக, உங்களது வளாகத்தில், உங்களுடன் இருக்கும் பிற நண்பர்களைப் பற்றி நீங்கள் அறிந்து கொள்ளலாம்.

இதுபோன்ற சூழல்களை சிறப்பாக பயன்படுத்திக் கொள்வதன் மூலமாக மட்டுமே, கல்லூரி வளாகத்தில், உங்களுக்கென சிறப்பான நண்பர்களை உருவாக்கிக் கொள்ள முடியும். உங்கள் நண்பர் ஒவ்வொருவருடனும், தேவையான நேரத்தை செலவழியுங்கள். புராஜெக்ட்டை ஒன்றாக அமர்ந்து செய்தல் மற்றும் வெளியில் உணவருந்த செல்லுதல் போன்ற நடவடிக்கைகளின் மூலமாக, நட்பு வட்டத்தை பலப்படுத்தலாம்.

இத்தகைய நடவடிக்கைகளை மேற்கொள்ளும் அதேநேரத்தில், ஒருவரின் அந்தரங்கத்தில் தேவையில்லாமல் தலையிடுவது மற்றும் எப்போது பார்த்தாலும் அவரின் அருகிலேயோ அல்லது தேவையில்லாமலோ பேசிக்கொண்டேயிருந்து, சலிப்படைய வைத்தல் ஆகியவற்றை தவிர்க்க வேண்டும்.

உங்கள் நடவடிக்கைகள், இருவருக்குமே பாதகம் விளைவிக்காதவாறு இருத்தல் வேண்டும். சிறிய உரையாடல் எனும் கலையை, சற்று நேரம் எடுத்தே கற்றுக்கொள்ள வேண்டியுள்ளது. புன்னகை ஒன்றுதான் உடனடி மற்றும் சக்திவாய்ந்த ஆயுதம்.

உங்களின் ஈகோவை ஒதுக்கி வைத்துவிட்டு, எத்தனை பேருடன் நீங்களாக சென்று பேச முடியுமோ, அத்தனை பேருடனும் பேசலாம். ஏனெனில், உங்களைப் போலவே, பலரும், தானாக முன்வந்து பேசுவதற்கு தயக்கத்துடனேயே இருப்பார்கள். எனவே, நாமாக முன்வந்து பேசுதல் என்பது, பல நேரங்களில் நன்மை பயக்கும்.

அதேசமயம், ஒருவரிடம் பழகியவுடனேயே, மிகச்சில நாட்களிலேயே, அவரை உற்ற நண்பன்(best friend) என்று கூறிக்கொள்ள வேண்டாம். அது தேவையில்லாத வேலை. அனைவருமே உற்ற நண்பர்களாக இருக்க வேண்டிய தேவையில்லை. ஓரளவு நல்ல நண்பர்களாக இருந்தாலே பெரிய விஷயம்.

[பகுதி 03 தொடரும்..]

Read More

அனுபவ தத்துவ முத்துக்கள்

 இல்லறம் ஒரு நல்லறம் என்பதாலேயே ஆத்திசூடியும் ,திருக்குறளும் அதற்கு முதலிடம் கொடுத்தது. அவ் இல்லறத்தில் வாழ்ந்து இறந்தோரை நினைவுகூர்தல் வாழும் இல்லத்தார்களின் ஓர் கடமையென திருவள்ளுவர் தனது பொய்யாமொழியில் 43 ஆவது குறளில் கூறுகிறார்.

------------------------------
அன்பினால் நாயின் வாலைக்கூட ஆட்டிட முடியும். உணர்வற்ற ஜடங்களை பணம்,பொருள் போன்ற சடப்பொருட்கள் கொண்டே அசைக்க முடியும்.
---------------------------------------

ஒரு மனிதனிடம் சிக்கனம் இருக்கலாம். கஞ்சத்தனம் இருக்கவே கூடாது.

-------------------------------------------

நன்றி கெட் டவர்கள், நம்பிக்கைத் துரோகிகள் ,சுயநலவாதிகள் இவர்களெல்லாம் மிருக இனத்திலும் கீழானவர்களே!

--------------------------------------------

ஒரு இனத்தை அழிக்க வேணுமெனில் முதலில் அதன் மொழியை அழிக்க வேண்டும்.ஆனால் நாம் எம்மொழியினை அழித்துக்கொண்டு ஆள்பவன் எம் இனத்தினை அழிக்கிறான் என்று கூக்குரலிடுவது அர்த்தமற்றது.
-------------------------------------------
இருக்கும் உறவினை முறித்துக்கொள்ளல் எளிது. அதனைப் புதுப்பித்தல் என்பது கடிதிலும் கடிது
-------------------------------------------
இன்ப காலத்தில் இணைந்து சிரித்தவர்கள் துன்ப காலத்தில் தூர நின்று வேடிக்கை பார்ப்பார்களாயின் அவர்கள் அனைத்துஜீவராசிகளிலும் பார்க்க த்தாழ்ந்தசாதிகளேயாவார்..

Read More