ஒரு டொக்டருக்கு மணமகள் தேவை

 

டொக்ரர் வரதராஜன்  அப்பொழுதுதான் கடினமான ஆப்பரேசன் ஒன்றினை வெற்றிகரமாக முடித்துக்கொண்டு களைப்புடன் வந்து தனது அலுவலக அறை சோபாவில்  அமர்ந்துகொண்டார்.

 

''உள்ளை வரலாமா சேர்?'' என்று கேட்டுக்கொண்டு அவரது பதிலை எதிர்பாராமலே, அவருடன் கூடவே அவ் வைத்தியசாலையில் பணிபுரியும் உதவியாளர் [attendant] வாஸந்தியும்  அருகில் உள்ள சோபாவில்  வந்து அமர்ந்துகொண்டாள்.

 

 ''என்ன சேர், களைச்சிட்டீங்களா? '' என்றவள் எழுந்து அங்கிருந்த ப்பிறிட்ஜ்ஐத்  திறந்து ஒரு கிளாசில் ஒறேன்ஜ் ஜூஸினை வார்த்து கொடுத்தபோது அதை வாங்கிய வரதராஜன் அவளை உற்று நோக்கினார்.

 

அழகுடன், பண்போடு பழகும் வாஸந்தி, அருகிலுள்ள ஒரு பின் தங்கிய கிராமத்தில், ஒரு தாழ் சாதிக் குடும்பத்தில் பிறந்தவள். அக் கிராமத்திலே ஓரளவு படித்து அரச வேலை என்று ஒன்று செய்வது என்றால் அவள் ஒருத்தி தான்.

 

''என்ன சேர், யோசிக்கிறியள்? இது உங்கட ஜுஸ்தான்நான் வேறை ஒண்டையும் கலக்கேல்லை'' என்றவாறு சிரித்துக்கொண்டாள் வாஸந்தி.

 

சேர்ந்தே சிரித்துக்கொண்ட வரதராஜன்  தொடர்ந்தார், ''இல்லை வாஸந்தி, நான் படிச்சு முடிச்சு 15  வருஷமாயிற்று, நான் இன்னும் ........'' 

 

இடையில் குறுக்கிட்ட வாஸந்தி.

 

''15 வருசமாய் வேலையும் செய்யிறன். 10 வருசமாய் வீட்டில பெண்ணும்  பார்க்கினம், சாதி பார்த்தும், சாதகம் பார்த்தும், சீதனம் பேசியும்  கல்யாணம் எல்லாம் குழம்பிக்கொண்டே போய்க்கொண்டு இருக்கு. இப்போ எனக்கு வயதும் 39 ஆகுது. இதைத் தானே 100 நாள் சொல்லிப் போட்டியள் எனக்கு''.

 

ஜூஸினை குடித்து முடித்ததும், அதை வாங்கி வைத்த வாஸந்தியிடம்,

 

''ஏன் வாஸந்தி", சற்று தயக்கத்ததுடன், ''ஏன்  நீ என்னை கல்யாணம் பண்ணக்கூடாது?.  என்று மனதில் இருந்த நீண்ட நாள் ஆசையைப் படாரென்று போட்டு உடைத்து வைத்தார் வரதராஜன்.

 

பெரிய ஒரு ஜோக்கொன்றைக் கேட்டதுபோல் விழுந்து,விழுந்து சிரித்தாள் வாஸந்தி.

''ஏன் சேர், உங்களுக்கென்ன பைத்தியமாஇப்பதானே சொன்னனீங்கள், உங்க வீட்டில சாதி பார்க்கினம் எண்டு, அதிலையே நான் அவுட்.  அடுத்தது சாதகம், நான் செவ்வாய் தோஷம். அதிலையும் நான் அவுட். மற்றது சீதனம், நினைக்கவே முடியாது, இப்ப முற்றிலும் நான் அவுட்! ஏதாவது நடக்கிற விசயமாய்ப் பேசுங்களேன்!.

 

என்றவாறே , கலங்கிய கண்களுடன் பொய்யாகச்  சிரித்தாள் வாஸந்தி.

 

''ஏன் வாஸந்தி , இப்ப ஓர் ஆப்பரேஷன் செய்து முடித்தனே, அவள்.... உங்கட சாதி தானே?"

 

தலை குனிந்தவள் கண்களைத் துடைத்தவாறே '' ஓம் டொக்ரர் '' எனத் தன் குரலைத் தாழ்த்திக் கொண்டாள்.

 

''ஒரு நாளைக்கு இப்பிடி எத்தனை சாதிக்காரர் வருகினம். அவர்களை எல்லாம் சாதி பார்த்தா தொட்டு, அளைந்து வைத்தியம் செய்கிறோம். இல்லை, ஒரு சாதி குறைஞ்ச சமுதாயத்துல பிறந்து வந்த டொக்டர் வேலை செய்தால், வைத்திய சாலைக்கு உயர் சாதி நோயாளர்கள் என்ன வராமலா இருக்கிறார்கள்?"

 

"அடுத்தது சாதகம்; சாதகம் பார்த்து செய்து இங்கை எத்தனைபேர் இணைஞ்சு வாழ்ந்திருக்கினம் எண்டு காட்டு பார்க்கலாம்?".

 

"இந்தப் பாழாய்ப்போன சீதனம்; இப்ப பெண்களும் வேலைக்குப் போய் உழைக்கிறார்கள்தானே. திருமணம் செய்தபின்னரும் இருவரும் உழைக்கத் தானே போகிறோம், டொக்டர்மார் பெரிய சம்பளக்காரர் எண்டால் பிறகு ஏன் சீதனமாயும் இன்னும் வேணும் எண்டு கேட்டு அலையவேணும்?"  என்று மனதில் உள்ளதை உளறிக் கொட்டினார் வரதராஜன்.

 

''உங்க வீட்டிலை இதுக்கு ஒருபோதும் சம்மதிக்க மாட்டினம். டொக்ரர் உத்தியோகம் எண்டா  எங்கையும் மதிப்புத் தானே சேர். கல்யாணம் எண்டு போனால், ஊருக்குள என்றால் சாதி பார்க்கிற சமூகம் எல்லே எங்கட தமிழ் சனம். வேறு நாடு, வெளி இனத்தவர்கள் என்றால் என்ன சாதியெண்டாலும் செய்து வைப்பினம்; ஊருக்குளை என்றால் அவையளின்ரை சாதியை விட்டு அங்காலை போக மாட்டினம்".

 

தொடர்ந்தாள் வாஸந்தி,

 

"அதோடை உங்கடை  வீட்டில நீங்க கடைசிப் பிள்ளை. உங்களுக்கு முதல் 5 சகோதரங்கள் ரீச்சர், எஞ்சினியர், ஜட்ஜ் போலீஸ், நேர்ஸ் ஆக இருந்தும், ஒரு கலியாணவீடு மற்றும் கொண்டாட்டங்கள்ளை உங்கட அப்பா அம்மா தங்களை அறிமுகம் செய்யேக்கை, உங்கட 5 சகோதரர்களையும் பற்றி ஒன்றுமே சொல்லாமல் விட்டு விட்டு,  'எங்கட கடைசி மகன் ஒரு டொக்டர்என்றுதானே சொல்லுறவை. அப்பிடியானவை உங்கள இழக்க விரும்ப மாட்டினம் தானே".

 

சிந்தித்தவர் ''ஏன் வாஸந்தி!.. என்னை இழக்கவும் விரும்பாயினம் எண்டு சொல்லுறியே, அந்த வீக் பொயிண்ற் ஒன்று போதாதா அவர்களைச் சமாதானப் படுத்த?''

 

நாணத்துடன்  ''என்ன சேர், எதோ முடிவான மாதிரிக் கதைக்கிறியள்''

 

''சரி,சரி உந்த சேர் எண்டு சொல்லுறத விட்டுட்டு, வீட்ல போய் யோசிச்சு நல்ல ஒரு முடிவு வந்து  நாளைக்கு  சொல்லு. ஏனெண்டா எனக்கு வயது வட்டுக்கை போவிட்டுது. இனி அப்பா, அம்மாவை நம்பி இருந்து சரிவராது'.'

 

தயக்கத்துடன் '' இது..வந்து  ...அவசர முடிவில்லையே சேர்?''.

 

''இல்லையம்மா இல்லை, இது என்ரை நீண்ட கால எண்ணம்" என்று அவர் கெஞ்சும் குரலில் அம்மா  என விழித்துக்கொண்டதும், அவள் முகத்தில் பளிச்சிட்ட பிரகாசமான சந்தோஷம்நிச்சயம் அவர்களை திருமண வாழ்வில் இணைத்துக்கொள்ளும்.

 

டொக்ரர் என்றால் நிறையவே எதிர் பார்க்கும் எமது சமுதாயமும், இவர்கள் வாழ்வினைக் கண்டு நிச்சயம் பாடம் கற்றுக்கொள்ளும்!.

 

   💏 கதை:செ.மனுவேந்தன்


 

 

நயன்தாரா -மூக்குத்தி அம்மன்:விமர்சனம்


 எல்.கே.ஜி. படத்திற்குப் பிறகு ஆர்.ஜே. பாலாஜி நாயகனாக நடித்திருக்கும் படம். தன் பக்தன் ஒருவன் மூலம் போலிச் சாமியாரை கடவுளே அம்பலப்படுத்துவதுதான் கதை.

நாகர்கோவிலில் வசிக்கும் ஏங்கல்ஸ் ராமசாமி (ஆர்.ஜே. பாலாஜி) ஒரு உள்ளூர் டீவியின் செய்தியாளர். தந்தை ஓடிப்போய்விட்டதால், தாயும் (ஊர்வசி) மூன்று சகோதரிகளும் இவரது வருமானத்தை நம்பியே வாழ்கிறார்கள். வாழ்க்கையின் கடுமை தாங்காமல் குலதெய்வம் மூக்குத்தி அம்மனை (நயன்தாரா) வேண்டி அழுகிறான் ஏங்கல்ஸ். அவன் முன்பாகத் தோன்றும் அம்மன், தான் இருக்குமிடத்தை திருப்பதி போல பிரபலமாக்கும்படி கூறுகிறாள்.

 

இதற்கிடையில் நாகர்கோவிலில் 11 ஆயிரம் ஏக்கரை சுருட்ட முயல்கிறது ஒரு கும்பல். அதன் பின்னணியில் ஒரு பெரிய சாமியார் (அஜய் கோஷ்) இருக்கிறார். தன் குடும்ப பிரச்சனைகளை சமாளித்தபடி, அந்த சாமியாரை அம்பலப்படுத்தி எப்படி நிலத்தை காப்பாற்றுகிறார் ஏங்கல்ஸ் என்பதே மீதிக் கதை.

 

படம் துவங்கி இடைவேளைவரை விறுவிறுப்பாகவே நகர்கிறது படம். ஆனால், போலிச் சாமியாரை அம்பலப்படுத்தும்படி மூக்குத்தி அம்மன் சொன்னதும் நடக்கும் நிகழ்வுகளில் பெரிய சுவாரஸ்யம் ஏதும் இல்லை. மிகப் பெரிய சக்தி வாய்ந்த சாமியாரை வீழ்த்த எவ்வளவு வியூகம் வகுக்க வேண்டும்? அதற்குப் பதிலாக சின்னச்சின்னதாக ஏதோ செய்கிறார்கள். தொலைக்காட்சி பேட்டி ஒன்றில் சாமியாரை மடக்குகிறார் கதாநாயகன். பிறகு ஒரு கட்டத்தில் போலிச் சாமியாரும் பக்தர்களும் கூடியிருக்கும்போது அம்மனே நேரில் வந்துவிடுகிறது. இதை அம்மன் முதலிலேயே செய்திருக்கலாமே என்று தோன்றுகிறது.

 

போலிச் சாமியாரை அம்பலப்படுத்தும் காட்சிகளுக்குப் பெரிதாக மெனக்கெடவில்லையென்றும், பாலாஜி பேசும் சில 'சுருக்' என்ற வசனங்களில் அதை ஈடுகட்டியிருக்கிறார்கள்.


படத்தின் நாயகனாக வரும் ஆர்.ஜே. பாலாஜி மிகச் சிறப்பாக நடித்திருக்கிறார். வேகமாக, சத்தமாகப் பேசுவதுதான் அவரது பாணி என்று அறியப்பட்டிருந்த நிலையில், இந்தப் படத்தில் வேறு முகத்தைக் காட்டியிருக்கிறார். தன் குடும்ப கஷ்டத்தைத் தாங்காமல் புலம்பும் இடங்களில் ஒரு கீழ் மத்தியத்தர இளைஞனை கண்முன் நிறுத்துகிறார்.

 

நாயகனின் தாயாக வரும் ஊர்வசி, ஒவ்வொரு படத்திலும் தனது முந்தைய படங்களைத் தாண்டிச் செல்கிறார். படத்தின் பிற்பகுதியில் தன் மகன் தன்னைத் திட்டிய பிறகு, ஊர்வசி அதற்கு அழுதபடி பதிலளிக்கும் நீண்ட காட்சி, அவர் நடித்த காட்சிகளிலேயே சிறந்த ஒன்று என்று சொல்லலாம்.

 

மூக்குத்தி அம்மனாக நடித்திருக்கும் நயன்தாராவுக்கு கையில் சூலாயிலத்தோடு வந்து சில நிமிடங்கள் பேசிப்போவதைத் தவிர பெரிதாக வேலை ஏதும் இல்லை. வில்லனாக நடித்திருக்கும் அஜய் கோஷின் நடிப்பும் நன்றாகவே இருக்கிறது.

 

பின்னணி இசை நன்றாக இருக்கிறது. பாடல்களில் எல்.ஆர். ஈஸ்வரி பாடும் 'மூக்குத்தி அம்மனுக்கு' பாடல் படத்தோடு பொருந்துகிறது.

 

படத்தின் முதல் பாதியிலிருந்த விறுவிறுப்பு இரண்டாம் பாதியிலும் இருந்திருந்தால், இன்னும் அட்டகாசமாக இருந்திருக்கும்.

 

--முரளிதரன் காசிவிஸ்வநாதன்/BBCTAMIL  

 

குறிப்பு 1:அம்மனாக நயன்தாராவா? என்ற பல்வேறு விமர்சனங்களின் தாக்குதல்களுடன் படப்பிடிப்புடன் ஆரம்பமான ''மூக்குத்தி அம்மன்''   சிறந்த வசூலுடன் இன்று காட்சியளித்தாலும், மதம் பரப்புவதற்காக ,நோய் தீர்ப்பதாக கூறி நாடகமாடும் பொய்யான மதபோதகராக நடித்த மனோபாலாவின் காட்சிகளை படத்திலிருந்து அகற்றியது ஏற்றுக்கொள்ளமுடியாத ஒன்றாகும்.  

ஆனால் அவர்கள் அகற்றிய அக்காட்சி மட்டும் இன்று சமூக வலைத் தளங்களில் ''மூக்குத்தி அம்மன்'' படத்தினை விட அதிக இரசிகர்களின் பார்வையினை எட்டியுள்ளது என்பது மறுக்கமுடியாத உண்மையாகும்.

குறிப்பு 2:திரைப்படக் கதையின் நோக்கம் போலிச்சாமியார்களை அம்பலப்படுத்துவதேயாகவே புரிகிறது. இத்திரைப் படத்திற்காக வருத்தப் பட வேண்டியவர்கள் போலிச்சாமியார்களும் போலிப் பக்தர்களுமே  மட்டுமே அல்லாது ஏனையவர்கள் அல்ல.

-செ.மனுவேந்தன் 

 

 

இல் வாழ்வில் ஆழமான அன்புடையோர் யார்?

 


காதல். பொதுவாக மனிதர்கள்,  விலங்குகள் என அனைத்து உயிரினங்களிலும் ,அவை தோன்றிய காலத்திலிருந்தே அவ்வவ் இனங்களின் விருத்திக்காக இயற்கையாகவே அவர்களின் உணர்வோடு பின்னிப்பிணைந்தவை. இக்காதல் படைத்த வரலாறுகளும் ,காவியங்களும் நினைவுச் சின்னங்களும் இன்றும் என்றும் மனித குலத்தில் வியப்புடன் நோக்கப்படுகின்றன.

காட்டு வாழ்க்கையிலிருந்து  நகர வாழ்க்கைக்கு மாறிய மனிதனின் பரிணாம வளர்ச்சி ,வாழ்க்கையினை நெறிப்படுத்த காரணமானது. அதன் பலனாக திருமணம், இல்வாழ்க்கை என மக்களை ஒரு கட்டுப்பாட்டில் பண்பான சமுதாயத்தினை உருவாக்க வழி கோலியது. இருந்தாலும் கல்யாணத்தின் முன் காதல் என்பது எந்த ஒரு இனத்திலிருந்தும் மறைந்து போகவில்லை என்பது கவனிக்கத்தக்கது.

 

காதல் என்ற போர்வையில் இன்று இலங்கை , இந்தியாவில் பெண்கள் வஞ்சிக்கப்படுவதும் , தற்கொலைகளும் அதிகரித்து கொண்டிருப்பது குறித்து நாம் தீபத்தில் ஏற்கனவே ஒரு தலைப்பில் அலசியிருந்தோம். அஃது இருக்க,

 

''மனிதர் உணர்ந்து கொள்ள இது மனித காதல் அல்ல '' என்பதுபோன்ற பல்வேறு கற்பனை / கானல் நீர் உணர்வுகளுக்குள் உள் வாங்கப்பட்ட  இளையோரின்   காதலுக்குமுன் ➝ எமது முன்னோர்கள் 'காதலுக்கு கண்ணில்லை' என்று கூறியது முற்றிலும் உண்மையாகவே உள்ளது. இன்று இளையோர் காதலிப்பதற்கு சமூக வலைத்தளங்களும் ,  , தொலைபேசிகளும்  உபயோகிக்கும் வசதி கையுக்குள் குவிந்து இருப்பதினால், காதலிப்பதற்கு அக்காலம் போல் கண் அவசியமற்றுப் போய்விட்டாலும், ஒருவரை ஒருவர் உயர்த்திப் பெருமையோடு  அறிமுகம் செய்வதற்காக , ஆணும், பெண்ணும் தங்களைப் பற்றிய உண்மைகளை மறைத்தே காதலிக்கிறார்கள். அதாவது இன்றய  காதலுக்கு கண் மட்டுமல்ல ,[ஏமாறப்படுவதால்] காதும் இல்லை என்றே கூறவேண்டும்.

 

காதலிக்கும்போது தொலைபேசியூடு பல்வேறு சமூக வலைத்தளங்கள்  வழியே   விழுந்து,விழுந்து கருத்துகளைப் பரிமாறிக்கொண்ட  காதலர் நிலை , திருமணத்தின்பின் அவர்கள் உணர்வில் குடும்பஸ்தர் என்ற உணர்வே மேலோங்கி இருக்கும் நிலையில் , அவர்கள் உரையாடல்கள், நெருக்கங்கள் ,அணுகுமுறைகள், இதனால் வரும் உணர்வின் பெறுபேறுகள் , காதலித்த காலத்தினை விட முற்றிலும் வேறாகவே தோன்றும். காதலிக்கும் போது பொய்யாக காட்டிக் கொண்ட  விருப்பு ,வெறுப்புகள் கூட திருமணத்தின் பின் வெளிப்பட்டுவிடும்.

 

 இவை  அவர்களுக்கிடையில்  வெறுப்புணர்வுகளையும் , இடைவெளிகளையும் அதிகரிக்கும். இக்கருத்தினை 100 வீதமான காதலருக்கு இருக்கும் என்று நான் கூறவில்லை. உண்மைகளைப் பரிமாறிக் காதலிக்கும் ஒரு சில சோடிகளைத் தவிர ,பெரும்பாலும் இந் நிலையினை அவதானிக்கக் கூடியதாகவே உள்ளது .

 

இப்படியான சூழ்நிலைகள் பேச்சுத் திருமண வாழ்வில்  தோன்றுவதற்குச் சந்தர்ப்பமே இராது. ஏனெனில் கல்யாணத்தின் பின் அவர்களுக்கிடையில் ஒளிவு மறைவு இருக்க வேண்டிய அவசியம் இல்லை.பொய்யாக நடித்து ஒருவரை ஒருவர் தங்களைப் பெருமைப்படுத்த வேண்டிய தேவையும்  இல்லை. எனவே இங்கேதான் உண்மையான காதல் பிறக்கிறது. கணவனும் மனைவியும் ,ஒருவர்  ஒருவரின் விருப்பு ,வெறுப்பு, தேவைகள் உணர்ந்து நடக்க ஆரம்பிக்கின்றனர். காதல் மேலும் ஆழம் காண்கிறது.


செ.மனுவேந்தன்

கொரோனா வைரஸ் அலைகள்" / பகுதி 04

"முதல் மற்றும் இரண்டாவது 

கொரோனா வைரஸ் அலைகள்" 

 


3] சூடான வானிலை கோவிட் 19 ஐ குறைக்க உதவுகிறதா ?

 

சில சுவாச நோய்கள், உதாரணமாக சளி மற்றும் குளிர் காச்சல் போன்றவை குளிர் மாதங்களில் பொதுவானவை [Some respiratory illnesses, like colds and influenza (flu), are more common in the colder months]. ஆனால் கோடை காலத்தில் அவை பெரிதாக தென்படுவதில்லை. எனவே கோவிட் 19 அப்படி அமையலாம் என்ற ஒரு எதிர்பார்ப்பு ஆரம்பத்தில் பல வல்லுனர்களிடம் இருந்தது என்னவோ உண்மைதான்.

 

4]  வல்லுநர்கள், ஏன் கோவிட் 19 இன் இரண்டாவது அலை பற்றி  கவலைப்படுகிறார்கள்?

 

உண்மையில் டிசம்பர் 2019 இல் ஆரம்பித்த கொரோனா வைரஸின் கெடுபிடிகள், உலகின் பல பாகங்களில் மார்ச் 2020 அளவில் அதி தீவிரமாகி, பல நாடுகள் மக்களை முடக்கினார்கள். ஆகவே தனிமை படுத்துதல், நடமாட்டத்தை கட்டுப்படுத்துதல் மற்றும் சுகாதார நடைமுறைகளை கட்டாயம் கைபிடித்தல், ஓரளவு வெற்றி கொடுத்து, கொரோனா வைரஸ் ஒரு கட்டுப்பாட்டிற்குள் வந்தது போல் தோன்றியது, அரசும் கொஞ்சம் கொஞ்சமாக ஜூன் / ஜூலை 2020 அளவில் தளர்வு ஏற்படுத்தியது, ஆனால் மனித நடத்தை ஒரு முக்கிய பங்கைக் கொண்டுள்ளது என்பதை எல்லோரும் மறந்து விட்டார்கள். நாம், சமூக இடைவெளி குறைவதையும், முகமூடி அணிவது குறைவதையும் கண்டோம். அது மட்டும் அல்ல, கோடையில் அதிகமான கொண்டாட்டங்கள், திருவிழாக்கள் நடை பெறுவதும் வழக்கம். கோடை நல்ல வானிலை என்பதால், மக்கள் நடமாட்டமும் கூடியது. உதாரணமாக கடற்கரை, மதுக் கடை பொது விடுதி [Pub] போன்றவைகள் நிறைந்து வழிந்தன. எனவே இந்த மக்களின் நடத்தை மாற்றங்களின் தாக்கத்தை, அக்டோபர் / நவம்பர் 2020 அளவில், நாம் அனுபவிக்க வேண்டி வரலாம் என்பதே, வல்லுனர்களின் இன்றைய கவலை ஆகும்.

 

5] கொரோனா வைரஸின் இரண்டாவது அலையின் விளைவு மோசமாக இருக்குமா ?

 

அவ்வாறு இருக்கவே, இன்றைய நிலையில், சந்தர்ப்பம் அதிகமாக உண்டு, ஏனென்றால், கொரோனா வைரஸால் பாதிக்கப்பட்ட ஒருவர், தான் பாதிப்புக்கு உள்ளாகி உள்ளார் என அறியமுன், இது சில கிழமைகள் எடுப்பதால், அதற்கு முதல், அதை பலருக்கு கடத்துவதற்கு சந்தர்ப்பம் பல இருப்பதாலாகும். அது மட்டும் அல்ல, இந்த கோவிட் 19 வைரஸ், மற்ற சுவாச மூலம் பரவும் வைரஸ்களுடன், உதாரணமாக குளிர் காச்சல் வைரஸ் [other respiratory viruses like influenza] உடன் சேர்ந்து அக்டோபர் / நவம்பர்  2020 க்கு அல்லது அதற்கு பிறகு தாக்கும் பொழுது என்ன நடக்கும் என்பது பெரும் கேள்விக் குறியாகவே உள்ளது? மேலும் குளிர் காலம் வர, மக்கள் கூடுதலாக அடைக்கப்பட்ட , காற்றோற்றம் குறைந்த  வீட்டிற்குள், அதிக நேரம் செலவிடுவார்கள். இதுவும் கொரோனா வைரஸ் கடத்தலை அதிகரிக்கலாம்.

 

6] எவருக்கும் இரண்டு தடவை கொரோனா வைரஸ் தொற்றலாமா ? 

 

இதுவரை செய்த ஆய்வுகளில் இதற்கு பதில் இல்லை. இதைப்பற்றிய ஆய்வுகள் நடந்து கொண்டு இருக்கின்றன.

 

7] எப்பொழுது சமூகத்தில் நோய்த் தடைக் காப்பு நிலை [herd immunity / மந்தை எதிர்ப்பு சக்தி], கொரோனா வைரஸுக்கு எதிராக ஏற்படும் ?

 

வல்லுனர்களின் தரவுகளின் படி, குறைந்தது 70% மக்கள் சனத் தொகை, கொரோனாவிற்கு எதிரான நோய் எதிர்க்கும் தன்மையை கொண்டால் மட்டுமே [about 70% of the population needs to be immune to this coronavirus] இது சாத்தியம் ஆகும். இன்னும் நாம் அந்த இலக்கை அடையவில்லை. அது மட்டும் அல்ல, பொதுவாக எல்லோருக்கும் கிடைக்கக் கூடியதாக இன்னும் தடுப்பூசியும் [A widely available, safe and effective vaccine] வரவில்லை என்பது மற்றும் ஒரு குறையாகும்.  

 

8] எப்படி ஒருவர் கொரோனா வைரஸ் நோயின் அறிகுறி தென்பட்டால், வீட்டில் கையாளுவது ? 

 

இன்று கொரோனா வைரஸுக்கு என்ற ஒரு குறிப்பிட்ட சிகிச்சை ஒன்றும் இல்லை, எனினும் நீங்கள் ஓரளவுக்கு அதன் அறிகுறிகளை கட்டுப்பாட்டுக்குள் கொண்டுவரலாம் அல்லது அதன் வேதனையை எளிதாக்கலாம். உதாரணமாக, உங்களுக்கு உயர் வெப்ப நிலை [high temperature] இருந்தால், கட்டாயம் நீங்கள் போதுமான அளவு  ஓய்வு எடுக்க வேண்டும், போதுமான அளவு திரவம், குறிப்பாக நீர் அருந்தவேண்டும், நீங்கள் சங்கடமாக இருப்பதாக உணர்ந்தால், paracetamol அல்லது ibuprofen  எடுக்கலாம்,

 

அதேமாதிரி, நீங்கள் இருமலில் அவதிபட்டால், முதுகில் படுப்பதை தவிர்த்து, ஒரு பக்கமாக படுங்கள், அல்லது நிமிர்ந்து இருங்கள் [Lie on your side or sit upright], ஒரு தேக்கரண்டி தேன் [a teaspoon of honey] இருமலை எளிதாக்கலாம், ஆனால் சிறு குழந்தைக்கு கொடுக்க வேண்டாம். அப்படியே, நீங்கள் மூச்சு விடுவது கஷடமாக இருந்தால், உங்கள் அறையை வெப்பம் தனிக்கக் கூடியதாக, அல்லது ஓரளவு குளிராக சரிபடுத்தவும் அல்லது ஜன்னலை திறந்து விடவும். கட்டாயம் விசிறி [fan] பாவிக்க வேண்டாம், அது வைரஸை பரப்பி விடும். கட்டாயம் பீதியடைய வேண்டாம், அது உங்களை மோசமாக்கிவிடும். மூச்சு விட திணறுவது, கட்டாயம் கொரோனா வைரஸின் திவீரத் தன்மையை உணர்த்தும். அப்படியானால் உடனடியாக மருத்துவ ஆலோசனையைப் பெற்று, அதன் படி உடன் நடவடிக்கை எடுக்க வேண்டும்.

 

வைரஸ்கள் காலப்போக்கில் பரிணாமம் அடைகின்றன. அது மரபணு திடீர்மாற்றம் [Mutation] அடைகின்றன. இதில் என்ன அதிசயம் என்றால், இவையும் இயற்கை தேர்வு அடிப்படையில் மாற்றமடையக் கூடியவை [They may also evolve through “natural selection”]. எனவே, சிலவேளை, இந்த மரபணு திடீர்மாற்றம், வைரஸ் தப்பிப்பிழைக்கவும் மற்றும் இனப்பெருக்கம் செய்யவும் ஒரு சிறந்த வாய்ப்பை ஏற்படுத்தி கொடுக்கலாம் [but sometimes a mutation gives a virus a better chance of surviving and reproducing]. அது மட்டும் அல்ல, இந்த திடீர் மாற்றம், வைரஸை விலங்குகளில் இருந்து மனிதருக்கு தொற்ற வழிசமைக்கலாம் அல்லது கலங்களுக்குள் நுழைய உதவும் அதன் [வைரஸின்] மேல் உள்ள பாதுகாக்கும் உறையில் உள்ள கூர்முனைகளின் வரிசையில், மாற்றங்களை ஏற்படுத்தி, அதனால், அதன் திறனை மேம்படுத்தி, நுரையீரல் கலத்திற்குள் நுழையலாம் அல்லது நோயெதிர்ப்பு அமைப்பால் உடலில் உற்பத்தியாகும் பிறபொருளெதிரியை [ஆன்டிபாடியை]  தவிர்க்கும் தன்மை கொண்டதாக மாறிவிடும் [a random change in the make-up of the spikes, the projections covering the virus that help it enter cells, might improve its ability to enter a lung cell or to avoid antibodies produced by the immune system]. இது அதனின் ஒரு ஆபத்தான இயல்பு ஆகும். மேலும், ஜெர்மனி நாட்டில் உள்ள, பீலவில்ட்  [Bielefeld] நகரில், 22 / 09/ 2020, அன்று நடந்த குடும்ப நிகழ்வு ஒன்றில் கலந்து கொண்ட, புலம் பெயர் தமிழர்களில், 40 இற்கு மேற்பட்டோருக்கு கொரோனா இருப்பது உறுதிப்படுத்தப் பட்டது ஒரு உதாரணமாகும். ஆகவே நீங்கள் இயன்றவரை இதை தவிர்க்கும் முறைகளை கட்டாயம் கடைப்பிடித்து உங்களையும் வாழவைத்து மற்றவர்களையும் வாழவிடுங்கள்! 

 

இந்து புராண, 'சூரன் - ஸ்கந்தன்' கதை பொதுவாக எல்லோருக்கும் தெரியும். இங்கு சூரன் ஒவ்வொரு முறையும் மாறு வேடங்களில் சண்டையிட்டான். எந்த வேடத்திற்கும் கலங்காமல் ஸ்கந்தக் கடவுள் போர் செய்ய ..... கடைசியில், வடிவத்தை மாற்றிக்கொண்டு மாமரமாக மாறினான். மரமாக நிற்கும் போதே சூரனுடைய ஆர்ப்பாட்டமும் தன்னால் முடியும் என்னும் அசைவுகளும் அடங்கிவிட்டன. அப்படித்தான் கொரோனா வைரஸின் செயலும். அது காலம், சூழ்நிலைக்கு ஏற்ப திடீர் மாற்றம் அடைந்து மீண்டும் மீண்டும் தாக்க முயலும். அது என்று, மாமரத்தை போல், ஒரு அசைவை அல்லது ஆர்ப்பாட்டத்தை இழக்கிறதோ, அன்று கோவிட் 19 முற்றாக அழிந்தது எனலாம் !!      

  

நன்றிகள்   

[கந்தையா தில்லைவிநாயகலிங்கம்]

✋✋முற்றும்✋✋