பாரம்பரியத்தின் உன்னதம்: வாழை இலையில் சாப்பிடுவதன் நன்மைகள்!
இன்றைக்கு "நாகரிகம் முன்னேறிவிட்டது" என்று கூறி, நம் முன்னோர்கள் அறிவியல் பூர்வமாகக் கண்டுபிடித்துச் செயல்படுத்திய எத்தனையோ அற்புதப் பாரம்பரியங்களை நாம் தொலைத்துவிட்டோம். அதில் மிக முக்கியமானது வாழை இலையில் உணவருந்தும் பழக்கம்!
வாழை இலையில் சாப்பிடுவதால் நமக்குக் கிடைக்கும் நன்மைகளும், அதன் பின்னணியில் உள்ள அறிவியலும் என்னவென்று பார்ப்போம்.
1. மிகச் சிறந்த நச்சு முறிப்பான் (Natural Germ Killer)
வாழை இலை ஒரு இயற்கையான கிருமிநாசினி ஆகும். சுடச்சுடச் சமைத்த பொங்கலையோ, சூடான சாதத்தையோ வாழை இலையில் பரிமாறும்போது, அந்தச் சூட்டில் இலையின் மேற்பரப்பில் உள்ள ‘பாலிஃபெனால்’ (Polyphenols) போன்ற இயற்கையான ஆன்ட்டி-ஆக்ஸிடன்ட்கள் உணவோடு கலக்கின்றன. இது உடலுக்குள் செல்லும் நச்சுக்களை அழித்து, நோயெதிர்ப்புச் சக்தியை அதிகரிக்கச் செய்கிறது.
2. தீக்காயமும் இயற்கை மருத்துவமும்
தீக்காயம் பட்டவர்களை வாழை இலையில் கிடத்துவதை நீங்கள் பார்த்திருக்கலாம். வாழை இலை படுக்கை, வாழைத்தண்டுச் சாறு, வாழைக்கிழங்குச் சாறு ஆகிய அனைத்துமே சிறந்த நச்சு முறிப்பான்களாகப் பயன்படுகின்றன. இன்றைக்கும் கிராமப்புறங்களில் பாம்பு கடித்துவிட்டால், முதலுதவியாக வாழைத்தண்டுச் சாற்றைப் பருகக் கொடுக்கும் பழக்கம் உண்டு.
3. தமிழரின் வாழ்வியலும் வாழை மரமும்
காடும் காடு சார்ந்த நிலத்திலும் வாழ்ந்த தமிழன், எந்தவித நச்சையும் முறிக்கத் தயார் நிலையில் இருக்க வேண்டும் என்பதற்காகவே மக்கள் கூடும் இடங்களில் வாழை மரத்தைப் பயிரிட்டு வைத்தான்.
திருமணப் பந்தலாக இருந்தாலும் சரி,
திருவிழாக் கூட்டங்களாக இருந்தாலும் சரி,
இறுதி ஊர்வலப் பாடையாக இருந்தாலும் சரி, மக்கள் திரளும் இடங்களில் வாழை மரம் முதன்மையாக நிற்கிறது. இது வெறும் சடங்கு அல்ல; அவசரக் கால நச்சு முறிப்புக்கான முன் எச்சரிக்கை அமைப்பாகும்.
4. உணவில் மறைந்திருக்கும் நச்சுகளுக்குத் தீர்வு
முற்காலத்தில் இருட்டில் சமைக்க நேர்ந்து, உணவில் எதிர்பாராத விதமாக ஏதேனும் பூச்சிகளோ நச்சோ கலந்திருந்தால், அதை உடனடியாக முறிக்கும் வல்லமை வாழை இலைக்கு உண்டு. அதனால்தான், நம் முன்னோர்கள் வாழை இலையை முதன்மையான உணவுத் தட்டாகப் பயன்படுத்தினார்கள்.
5. இயல்பான சுகாதாரம் – அறிவியல் உண்மை!
நாம் வீட்டில் பயன்படுத்தும் எவர்சில்வர் அல்லது பிளாஸ்டிக் தட்டுகளை எவ்வளவோ சோப்பு போட்டு, வெந்நீர் ஊற்றி அலசினாலும் நோய்க்கிருமிகள் வரத்தான் செய்கின்றன.
ஆனால், திருமண வீடுகளிலோ அல்லது திருவிழாக்களிலோ வாழை இலையில் சாப்பிடும்போது கவனித்திருக்கிறீர்களா? இலையில் தூசி இருந்தாலும், ஏதோ பெயருக்குக் கொஞ்சம் தண்ணீர் தெளித்துத் துடைத்துவிட்டு உடனே சாப்பிட அமர்ந்துவிடுகிறோம். தெளிக்கும் தண்ணீரில்கூட அசுத்தம் இருக்கலாம். இருப்பினும், அங்கு யாருக்கும் வயிற்றுக் கோளாறோ நோயோ வருவதில்லை!
காரணம் என்ன தெரியுமா? வாழை இலையின் மேற்பரப்பில் உள்ள மெழுகு போன்ற படலமும் (Natural Wax coating) அதன் மருத்துவக் குணமும்தான்! எந்தவொரு கிருமியையும் கட்டுப்படுத்தும் ஆற்றல் அதற்கு உண்டு.
சிந்திக்க வேண்டிய ஒன்று:
இன்றைக்குக் பிளாஸ்டிக் தட்டுகளையும், வேதிப்பொருட்கள் நிறைந்த பேப்பர் இலைகளையும் தேடி ஓடும் நாம், உடலுக்கும் சுற்றுச்சுழலுக்கும் நன்மை தரும் இந்த வாழை இலை கலாச்சாரத்தை மறந்தது எத்துணை பரிதாபம்!
நம் பாரம்பரிய உணவுகளோடு, அந்த உணவை உண்ணும் பாரம்பரிய முறையையும் மீட்டெடுப்போம்; ஆரோக்கியமாக வாழ்வோம்!
0 comments:
Post a Comment