பூமி என்னும் சொர்க்கம் 8:

நீண்ட தூக்கம்!

உங்களால் தொடர்ந்து எவ்வளவு நேரம் தூங்க முடியும்? நல்ல குளிர் காலத்தில் இழுத்துப் போர்த்திக்கொண்டு சில மணி நேரம் தொடர்ந்து தூங்க முற்பட்டால் திடீரென்று விழிப்பு ஏற்படும். காரணம் பசி. எழுந்து சாப்பிட்டு விட்டு மேலும் தூங்கலாம். ஆனால் உணவு, தண்ணீர் இல்லாமல் நான்கு நாள், பத்து நாள், முப்பது நாள் என்று தொடர்ந்து உறங்க இயலாது.

 

ஆனால், சில வகைப் பிராணிகளால் உணவு, தண்ணீர் இன்றிப் பல மாத காலம் தூங்கிக்கொண்டு இருக்க முடியும். இதுபோன்ற பிராணிகள் வடதுருவப் பகுதியில் வாழ்கின்றன. அதாவது கனடாவின் வட பகுதி, நார்வே, சுவீடன் நாடுகளின் வட பகுதி, ரஷ்யாவின் வடபகுதி, அலாஸ்கா ஆகியவற்றில் உள்ளன.

 

குளிர் காலம் வந்துவிட்டால் இவை உறங்க ஆரம்பித்து விடுகின்றன. கோடைக் காலம் ஆரம்பிக்கும்போதுதான் விழித்துக்கொள்கின்றன. பிராணிகளின் இந்த உறக்கத்தை ‘நீள் துயில்’ (Hibernation) எனலாம்.

 

குளிர் காலத்தில் எங்கு பார்த்தாலும் ஒரே உறை பனியாக இருக்கும். இரை கிடைக்க வாய்ப்பு இருக்காது. எனவேதான் இவை நீண்ட நாட்கள் உறங்க ஆரம்பித்துவிடுகின்றன. இந்த உறக்கம் இவற்றுக்கு இயற்கை அளித்த தகவமைப்பு.

 

இவை இப்படி உறங்கும்போது சுருண்ட நிலையில் இருக்கின்றன. தட்டி எழுப்ப முடியாது. உடல் வெப்பம் குறைந்துவிடும். இந்தப் பிராணியைத் தொட்டுப் பார்த்தால் ஐஸ் கட்டிபோல் இருக்கும். நாடித் துடிப்பு மிகவும் குறைந்து இருக்கும். சுவாசமும் மிகக் குறைவாக இருக்கும். இதுபோன்ற உறக்கத்தின்போது சிறுநீர் கழிப்பதில்லை. மலம் கழிப்பதில்லை. கோடைக் காலம் வந்துவிட்டால் இவை இயல்பு நிலைக்குத் திரும்பிவிடுகின்றன.

 

மரத் தவளைகள், தரை அணில்கள், வவ்வால், சில வகை எலிகள், ஒரு வகைப் பாம்பு முதலியவை இந்த நீள் துயிலில் ஈடுபடுகின்றன. காமன் பூர்வில் என்ற பறவை சுமார் ஐந்து மாத காலம் இப்படி உறங்குகிறது.

 

மனிதனால் நீள் துயிலில் ஈடுபட இயலாது. நாம் விழித்துக்கொண்டிருந்தாலும் சரி, உறங்கிக்கொண்டிருந்தாலும் சரி நமது உடல் வெப்ப நிலையில் பெரிய வித்தியாசம் இருக்காது. இதயத் துடிப்பில் பெரிய மாற்றம் ஏற்படாது. சுவாசமும் கிட்டத்தட்ட அதே அளவில் இருக்கும். எனவே, நமது உடல் இயக்கம் தொடர்ந்து நடைபெற அவ்வப்போது உணவும் தண்ணீரும் தேவை.

 

வட துருவப் பகுதியில் வாழும் துருவக் கரடி போன்ற பெரிய விலங்குகள் நீள் துயிலில் ஈடுபடுவதில்லை. மாறாக இவை அயர் நிலைக்குச் (Torbor) சென்றுவிடுகின்றன. துருவக் கரடி இதுபோன்று உறங்க ஆரம்பித்து விடும். ஆனால், அந்த உறக்கத்தின் போது தட்டி எழுப்ப முடியும். விழித்துக்கொண்ட பிறகு, மறுபடியும் உறக்கத்துக்குச் சென்றுவிடும்.

 

குளிர் பிரதேச விலங்குகளுக்கு மட்டுமன்றி, பாலைவனப் பகுதியில் வாழும் சில வகைப் பிராணிகளுக்கும் இதுபோன்ற திறன் உள்ளது. சில வகை நத்தைகள், பாலைவன ஆமை, சில வகைத் தவளைகள் முதலியவை பாலைவன மணலுக்குள் புதைந்துகொண்டு உறங்க ஆரம்பித்துவிடுகின்றன. நிபுணர்கள் இதை வேனில் உறக்கம் (Estivation) என்று குறிப்பிடுகின்றனர்.

 

மனிதரிடம் செயற்கையாக இதுபோன்ற நிலையை உண்டாக்க முடியுமா என்று நிபுணர்கள் நீண்ட காலமாகவே ஆராய்ந்து வருகின்றனர். அமெரிக்காவின் நாஸா ஆய்வு மையம் இதில் தீவிர அக்கறை காட்டிவருகிறது. நாஸாவின் சார்பில் ஒரு நிறுவனம் இப்போது ஆராய்ச்சி நடத்திவருகிறது. அதற்குக் காரணம் உண்டு.

 

செவ்வாய் கிரகத்துக்குச் செல்வதானால் குறைந்தது எட்டு மாத காலம் ஆகும். செவ்வாய்க்கான விண்கலத்தில் எட்டு விண்வெளி வீரர்கள் இருப்பதாக வைத்துக்கொள்வோம். எந்த ஒரு நேரத்திலும் இருவர் தவிர, மற்ற அனைவரும் நீள் துயிலில் ஈடுபட முடியும் என்றால் எவ்வளவோ வசதியாக இருக்கும். உணவு, குடிநீர் தேவை பெரிதும் குறைந்துவிடும். நடமாடுவதற்குக் குறைந்த இடம் இருந்தால் போதும். பெரிய விண்கலம் தேவைப்படாது. சிறிய விண்கலமே போதும். இப்படிப் பல வகைகளிலும் செலவு குறையும். நீள் துயில் தொடர்பாக இன்னும் நிறைய ஆராய்ச்சி செய்ய வேண்டியுள்ளது என்று நிபுணர்கள் கூறுகிறார்கள்.

கட்டுரையாளர், எழுத்தாளர்:-தொடர்புக்கு: nramadurai@gmail.com

Read More

சித்தர் சிந்திய முத்துக்கள் ....... 3/53

 

சித்தர் சிவவாக்கியம் -426

பிரான் பிரான் என்று பினாத்துகின்ற மூடரே

பிரானை விட்டு மெம்பிரான் பிரிந்தவாற தெங்ஙனே

பிரானுமாய்ப் பிரானுமாய்ப் பேருலகந் தானுமாய்ப்

பிரானிலே முளைத்தெழுந்த பித்தர் காணுமும்முடல். 

 

உடம்பை விட்டு பிராணன் போகப்போகும் கடைசி நேரத்தில் எம்பிரானே என பினாத்துகின்ற மூடர்களே! உங்கள் உடம்பிலேயே பிராணனை விட்டுப் பிரியாதிருந்த எம்பிரானை உணராமலேயே இருந்தீர்கள். உடம்பை விட்டு உயிர் எவ்வாறு பிரிந்தது என்பதை அறிந்து கொள்ளுங்கள். நம் பிராணனில் இருந்து எம்பிரானே இந்த பேருலகம் எங்கும் தானாகி நின்ற ஈசனால் முளைத்தேழுந்ததே உங்கள் உடம்பு என்பதைக் கண்டு கொண்டு அவ்வீசன் மீதே பித்தாக இருந்து உணருங்கள்..

***************************************************

சித்தர் சிவவாக்கியம் - 430

முந்த வோரெழுத்துளே முளைத்தெழுந்த செஞ்சுடர்

அந்த வோரெழுத்துளே பிறந்த காய மானதும்

அந்த வோரெழுத்துளே யோகமாகி நின்றதும்

அந்த வோரெழுத்தையு மறிந்துணர்ந்து கொள்ளுமே.    

 

ஆதிக்கும் முந்தையான சோதியான ஒரெழுத்திலிருந்து முளைத்து எழுந்த செஞ்சுடராகியது நெருப்பு. அந்த ஒரெழுத்திலிருந்தே நீராக வந்து உயிராகி பிறந்து உடம்பு ஆனது. அந்த உடம்பிலேயே ஒரெழுத்தாக இருந்து அதற்குள் ஏகமாக சிவம் நின்றது. இவ்வாறு ஓரெழுத்தாய் உலகிலும் உயிரிலும் இயங்கும் ஈசனாகிய மெய்ப் பொருளையும் நன்கு அறிந்து உங்களுக்குள் உணர்ந்து கொள்ளுங்கள்.  

***************************************************

சித்தர் சிவவாக்கியம் - 434

ஓசையுள்ள கல்லைநீர் உடைத்திரண்டு செய்துமே

வாசலிற் பதித்த கல்லை மழுங்கவே மிதிக்கிறீர்

பூசனைக்கு வைத்த கல்லில் பூவும் நீருஞ் சார்த்துறீர்

ஈசனுக்கு வைத்த கல் எந்தக்கல்லு சொல்லுமே. 

 

ஓசையுள்ள ஒரே கருங்கல்லை இரண்டு பாகமாக உடைத்து வாசல்படிக் கல்லாகவும் ஒன்றை செதுக்கி சிலயாகவும் செய்து வைக்கின்றீர்கள். வாசலில் வைத்த கல்லை மழுங்கவே காலால் மிதிக்கின்றீர்கள். பூஜைக்கு வைத்த கல்லில் பல வகையான வாசனைத் திரவியங்களையும் நீரில் கலந்து அபிஷேகம் செய்து பூக்களால் அலங்காரம் செய்து வணங்கு கின்றீர்கள். இவைகளில் ஈசன் உகந்திருப்பது எந்தக் கல்லில் என்பதை சொல்லுங்கள். அவன் உனக்குள் இருக்கும் அண்டக்கல்லில் அல்லவோ உகந்து உள்ளான் என்பதை உணர்ந்து தியானியுங்கள்.  

***************************************************

அன்புடன் கே எம் தர்மா & கிருஷ்ணமூர்த்தி

Read More

"ஒவ்வொரு இதயத்தையும், ஒவ்வொரு மனத்தையும்"

 

"ஒவ்வொரு இதயத்தையும், 

                ஒவ்வொரு மனத்தையும்

ஒவ்வொரு ஆன்மாவையும்

               பேராசை தொற்றுகிறது

ஒன்று ஒன்றாக 

              அவனை ஏமாற்றி

ஒய்யாரமாக அவனில் 

              வடுவாக மாறுகிறது"

👵

"சுயநல ஆசைகள்

            எங்கும் வளர்கிறது  

சுதந்திரமாக மனித 

            மனதிலும் பதுங்குகிறது

சுழன்று சுழன்று 

            அவனை கெடுத்து   

சுருக்கி விடுகிறது

           அவனின் இதயத்தை"

 👩

"எமக்கு வேண்டியதை

           நாங்கள் எடுக்கிறோம்

எம்மை பற்றி 

           மட்டுமே சிந்திக்கிறோம் 

எதுக்கு எடுத்தாலும்

           எம்மை முதல்நிறுத்தி

எடுத்த காரியத்துக்கு

          நியாயம் கூறுகிறோம்"

👴

"நாங்கள் மனமற்றவர்

         களாகத் தோன்றுகிறோம்

நாடி வருபவர்களுக்கு 

        கையை விரிக்கிறோம்

நாதியற்ற மக்களை

       வரவேற்பதும் இல்லை 

நாணம் எம்மை 

       வருந்துவதும் இல்லை"

 👼

"நாங்கள் காயப் 

          படுத்திய மக்களை

 நாம் அழித்த 

         எண்ணற்ற உயிர்களை

நாம் விட்டுச் சென்ற 

        அழிவின் பாதையை .

நாங்கள் எனோ 

        இன்னும் உணரவில்லை"

👧

"இருப்பதை விட்டு 

          இல்லாததுக்கு ஏங்குகிறோம்

இல்லாத இடங்களிலும் 

        தேடி பார்க்கிறோம்

இடுகாட்டின் இறுதியிலும் 

       மனிதத்தை புறக்கணிக்கிறோம்

இறுமாப்புடன் எம்மிடம்

       தவறில்லை என்கிறோம்"

 🙈🙉🙊

[கந்தையா தில்லைவிநாயகலிங்கம்]....✍

Read More

வர்ணத்திரைக்காக இவ்வாரம்.....

 

சந்திரமுகி 2-ம் பாகத்தில் அனுஷ்கா

பி.வாசு இயக்கத்தில் உருவாக உள்ள ‘சந்திரமுகி’ படத்தின் 2-ம் பாகத்தில், நடிகர் ராகவா லாரன்ஸ் ஹீரோவாக நடிக்க உள்ளார். நகைச்சுவை வேடத்தில் நடிக்க தன்னை படக்குழுவினர் அணுகி இருப்பதாக வடிவேலு அண்மையில் தெரிவித்திருந்தார்.படத்தில் நடிக்க நடிகை அனுஷ்காவிடம் படக்குழுவினர் பேசி வருவதாக தகவல் வெளியாகி உள்ளது.

 

'பொன்னியின் செல்வன்'

சோழர்களின் காலத்தில் நிகழ்ந்த சில உண்மை சம்பவங்களின் அடிப்படையில் கல்கி எழுதிய புனைவுக் கதையில் மணிரத்னம் இயக்கும் 'பொன்னியின் செல்வன்' படத்தில்  வந்தியத்தேவன் கதாபாத்திரத்தில் நடிகர் கார்த்தியும்  அருள்மொழிவர்மன் கதாபாத்திரத்தில் ஜெயம்ரவியும், அவரது சகோதரி குந்தவை கதாபாத்திரத்தில் திரிஷாவும் நடிக்கிறார்கள்.பொன்னியின் செல்வன்-1  இன்னும் சில மாதங்களில் திரைக்கு வரும் என்று எதிர்பார்க்கப்படுகிறது.

 

 'சினேகா'

தமிழ் திரையுலகில் முன்னணி கதாநாயகியாக இருந்த சினேகா நீண்ட இடைவெளிக்கு பிறகு  ‘சா பூட் திரீ’ என்ற பெயரில் தயாராகும் புதிய படத்தில் நடிக்க ஒப்பந்தம் செய்யப்பட்டு உள்ளார்.  இதில் சினேகா அம்மா கதாபாத்திரத்தில் வருகிறார்.இதில் இயக்குனர் வெங்கட் பிரபுவும் நீண்ட இடைவெளிக்கு பிறகு முக்கிய கதாபாத்திரத்தில் நடிக்கிறார். குழந்தைகளின் யதார்த்த வாழ்வியலை சித்தரிக்கும் படமாக தயாராகிறது.

 

‘ருத்ர தாண்டவம்’

தமிழில் கடந்தாண்டு வெளியாகி மிகப்பெரிய வரவேற்பைப் பெற்ற திரைப்படம் ‘திரெளபதி’. இப்படத்தை இயக்கிய இயக்குனர் மோகன்.ஜி, அடுத்ததாக ‘ருத்ர தாண்டவம்’ என்ற படத்தை இயக்கி இருக்கிறார். ‘திரெளபதி’ பட நாயகன் ரிச்சர்ட் ரிஷி தான் இந்தப் படத்திலும் ஹீரோவாக நடிக்கிறார்.சின்னத்திரை சீரியல்களில் நடித்து பிரபலமான தர்ஷா குப்தா இப்படத்தின் மூலம் ஹீரோயினாக அறிமுகமாகிறார். மேலும் இயக்குனர் கவுதம் மேனன், ராதாரவி, மாளவிகா அவினாஷ் ஆகியோர் முக்கிய கதாபாத்திரங்களில் நடித்துள்ளனர்.

 

‘சூ மந்திரகாளி’

கடவுள் சக்தி, மாய மந்திர சக்தி என நம்புகிற ஒரு கிராமத்து கதையே, ‘சூ மந்திரகாளி’ என்ற பெயரில் படமாகி இருக்கிறது.

இதில் புதுமுகங்கள் கார்த்திகேயன் வேலு, சஞ்சனா புர்லி ஆகிய இருவரும் நடித்துள்ளனர். ஈஸ்வர் கொற்றவை டைரக்டு செய்திருக்கிறார். அன்னக்கிளி வேலு தயாரித்துள்ளார்.

 

‘உடன்பிறப்பே’

 நடிகர்  சூர்யா தயாரிப்பில் உருவாகி உள்ள புதிய படம் ‘உடன்பிறப்பே’. அண்ணன் தங்கை பாசத்தை மையமாக வைத்து உருவாகி இருக்கும் இப்படத்தில் சசிகுமார் அண்ணனாகவும், ஜோதிகா தங்கையாகவும் நடித்துள்ளார். கத்துக்குட்டி படத்தை இயக்கி பிரபலமான இயக்குனர் இரா.சரவணன் இப்படத்தை இயக்கி உள்ளார். மேலும் சூரி, சமுத்திரக்கனி, கலையரசன் ஆகியோர் முக்கிய கதாபாத்திரத்தில் நடித்துள்ளனர். டி.இமான் இசையமைத்துள்ள இப்படத்துக்கு வேல்ராஜ் ஒளிப்பதிவு செய்துள்ளார்.இப்படம் நேரடியாக ஓடிடி-யில் வெளியாகும் என ஏற்கனவே அறிவிக்கப்பட்டிருந்தது.

 

வடிவேலு பாடல்கள்

தமிழ் திரையுலகில் முன்னணி காமெடி நடிகராக இருக்கும் வடிவேலு, அடுத்ததாக சுராஜ் இயக்கும் புதிய படத்தில் நடிக்க உள்ளார்.இப்படத்திற்கு சந்தோஷ் நாராயணன் இசையமைக்க உள்ளாராம். மேலும் இப்படத்தில் வடிவேலு 2 பாடல்கள் பாட உள்ளதாகவும் கூறப்படுகிறது.

 

 'டாக்டர்'

நெல்சன் இயக்கத்தில் உருவாகி உள்ள 'டாக்டர்' படத்தில் சிவகார்த்திகேயன், யோகிபாபு, வினய் இவர்களுடன் தெலுங்கு  படத்தில் நடித்து பிரபலமான பிரியங்கா மோகன்  தமிழில் அறிமுகமாகிறார். நெல்சன் இந்த படத்தை இயக்கி உள்ளார். அனிருத் இசையமைத்துள்ளார். இப்படம் அக்டோபர் 9ஆம் தேதி வெளியாக இருப்பதாக படக்குழுவினர் அதிகாரப்பூர்வமாக அறிவித்து இருக்கிறார்கள்.

 

 'கொரொனா குமார்'

தமிழ் சினிமாவில் முன்னணி நடிகர் சிம்பு. இவரது நடிப்பில் பொங்கலுக்கு ரிலீஸான படம் ஈஸ்வரன். இதையடுத்து,விரைவில் வெளியாக இருக்கும்  'பத்து தல', 'மாநாடு' உள்ளிட்ட படங்களில் நடிகர் சிம்பு நடித்துள்ளார். அடுத்து, 'வெந்து தணிந்தது காடு' மற்றும் 'நதியிலாடும் சூரியன்' உள்ளிட்ட படங்களில் நடித்த சிம்பு ஒப்பந்தம் ஆகியுள்ளார்.இந்நிலையில், கோகுல் இயக்கத்தில் சிம்பு நடிப்பில் தயாராகி வரும் புதிய படத்திற்கு 'கொரொனா குமார்' எனப் பெயர் சூட்டப்பட்டுள்ளது.

 

சினிமா ஆசிரியர் மரணம்

சினிமா பாடலாசிரியரும், எழுத்தாளருமான பிரான்சிஸ் கிருபா உடல்நலக்குறைவால் சென்னையில் மரணம் அடைந்தார்.காமராஜர் வாழ்க்கை வரலாற்று திரைப்படத்துக்கு திரைக்கதை, வசனம் மற்றும் பாடல்களையும் எழுதி இருந்தார். அந்த படத்தில் சிறிய கதாபாத்திரத்தில் நடித்தும் இருந்தார். பிரான்சிஸ் கிருபா திருநெல்வேலி மாவட்டம் நாங்குநேரி அருகே உள்ள பத்தினிப்பாறை கிராமத்தை சேர்ந்தவர். மல்லிகை கிழமைகள், ஏழுவால் நட்சத்திரம், வலியோடு முறியும் மின்னல், சம்மனசுகாடு, நிழலன்றி ஏதுமற்றவன், மெசியாவின் காயங்கள் உள்ளிட்ட கவிதை தொகுப்புகளை வெளியிட்டு உள்ளார். இவர் எழுதிய கன்னி நாவல் இலக்கியவாதிகளால் பாராட்டப்பட்டது. பல்வேறு விருதுகளையும் பெற்றுள்ளார். சொந்த ஊரில் அவரது உடலுக்கு இறுதிச்சடங்கு நடந்தது.

 

தொகுப்பு:செமனுவேந்தன்

Read More