சித்தர் சிந்திய முத்துக்கள் .............3/31

 

சிவவாக்கியம்-192

அன்னம் இட்ட பேரெலாம் அநேக கோடி வாழவே
சொன்னம் இட்ட பேரெலாம் துரைத்தனங்கள் பண்ணலாம்
விண்ணம் இட்ட பேரெலாம் வீழ்வார் வெந் நரகிலே
கன்னம் இட்ட பேரெலாம் கடந்து நின்ற திண்ணமே!!

அரும்பசிக்கு அன்னதானம் செய்தவர்கள் கோடி வளம் பெற்று பல்லாண்டு காலம் வாழவேண்டும். அன்னதானம் செய்வதற்கு பொருள் வேண்டி செல்வந்தர்களிடம் சென்று உதவி கேட்டால் அவர்கள் அதிகாரம் செய்து இல்லை என்று விரட்டலாம். அன்னதானம் செய்வதை குற்றம் என்று சொல்லி வில்லங்கம் செய்பவர்கள் பாழும் நரகக் குழியில் வீழ்ந்து அல்லலுறுவார்கள். அனைத்து உயிரிலும் ஆண்டவன் இருப்பதை அறிந்து அவனைத் தனக்குள்ளேயே கண்டு கள்வர்கள் கன்னமிடுவதைப் போல் யோக ஞான சாதனத்தால் தியானிப்பவரால் பத்தாம் வாசலைக் கடந்து கடவுளை அடைவது நிச்சயம்.

*******************************************

 
சிவவாக்கியம்-194 

பிறந்த போது கோவணம் இலங்கு நூல் குடுமியும்
பிறந்துடன் பிறந்ததோ பிறங்கு நாள் சடங்கெலாம்
மறந்த நாலு வேதமும் மனத்துளே உதித்ததோ
நிலம் பிளந்து வான் இடிந்து நின்றது என்ன ஈசனே!!!

பிறந்தபோதே கோவணமும் பூணூலும் குடுமியும் கூடவே பிறக்கின்றதா? பிறக்கும்போது இறைவனைத் தவிர வேறு எதையும் கொண்டு வருவது இல்லை என்பதை மறந்துவிட்டு வெறும் சடங்குகளை எல்லாம் குரங்குப் பிடியாக பிடித்துக் கொண்டு அதிலேயே மனம் வைத்து ஈசனை அறியாமல் இருக்கின்றார்கள். நான்கு வேதங்களும் மனதினுள்ளே உதித்ததா? அறிவிலே உதித்ததா? பிரம்மாவும், விஷ்ணுவும் தானே பெரியவன் என்ற சர்ச்சையில் எச்சன் நிலத்துக்கும் வானுக்கும் லிங்கோத்பவராக நின்று தானே அநாதி என நிரூபித்ததை அறிந்து அவ்வீசனை உங்களுக்குள் உணர்ந்து அவனை ஆயா தவம் செய்ய முயலுங்கள்.  

*******************************************

 
சிவவாக்கியம்-195 

துருத்தியுண்டு கொல்லன் உண்டு சொர்ணமான சோதியுண்டு
திருத்தமாய் மனத்தில் உன்னித்திகழ ஊதா வல்லிரேல்
பெருத்ததூண் இலன்கியே பிழம்பதாய் விரிந்திடும்
திருத்தமான சோதியும் நீயும் அல்லது இல்லையே !

நாம் விடும் மூச்சில் வாசியைக் கண்டு அதனை யோகமாக்கி செய்ய உடம்பு உண்டு. அதில் உள்ள ஆன்மாவில் பொன்னார் மேனியாகிய ஈசன் விளங்கும் சோதி உண்டு. இந்த வாசி யோகத்தை தினமும் முறை பிசகாமல் மனதில் நிறுத்தி இறைவனை எண்ணி ஊத ஊத மனம் இலயமாகி பெருத்த தூணாக மறைக்கும் நந்தி விலகி நெருப்பாறு ஒளிபிழம்பாக விரிந்து நிற்கும். அங்கு மயிர்பாலம் எனும் பிரம்மாந்திரத்தில் ஏறிக் கடந்தால் கோடி சூரியப் பிரகாசமான சோதியில் சிவனும் சீவனுமின்றி வேறு எதுவுமில்லை. நீயே அந்த பரம்பொருள் என்பதை உணர்ந்து யோக தியானமும் செய்து ஈசனைச் சேருங்கள்.

 

********************** அன்புடன் கே எம் தர்மா. 

Read More

முருங்கை மரம்

கனடாவிலிருந்து ஊருக்கு வந்து  நின்ற கருணைராணிக்கு   ஆலயத்தில் அப்படி ஒரு சம்பவம்  நடக்கும் என்று அவள் கனவிலும் நினைத்திருக்கவில்லை.துக்கம் அவள்  தொண்டையை அடைத்தது. நடந்தது இதுதான்..

ஊரில் அம்மன் கோவில் திருவிழாவும்அவ்வேளை களை கட்டியிருந்தது. வருடந்தோறும் இடம்பெறுவது போலவே இவ் வருடமும் பல்வேறு நாடுகளிலிருந்தும் திருவிழாவினை மையப்படுத்தி ஊர் வந்து சேர்ந்த பல்வேறு  உறவினர்களும் தங்கள் வெளிநாட்டு வசதிகளை விதம் விதமான புடவைகளாலும், தங்கநகைகளாலும்    போட்டிபோட்டு   வெளிப்படுத்திக்கொண்டிருந்தனர்.

 

இவற்றையெல்லாம் கண்டும் காணாது இருந்த கருணைராணிக்கு ,திருவிழாக் கூட்டத்தினுள் , நீண்ட நாட்களின்பின் அவள் கண்ணில்பட்ட ஜீவநாயகியைக் கண்டதும், வெறுப்புடன்  முகத்தினை வேறு பக்கம் மாற் றிக்கொண்டாள்.

 

அவள் வெறுப்புக்குக் காரணமில்லாமலில்லை. யுத்தகாலத்தில் இருவரும் ஊரில் அக்கம் பக்கம் வீடுகளில் வசித்த  காலத்தில் ,பக்கத்து ஊரில் விழும் செல் தாக்குதல் காரணமாக ஓடிவரும் உறவுகள் தம் வீட்டுக்குள் வராமலிருக்க கதவைப்பூட்டி, படலைக்குப் பூட்டும் இட்டு,  விளக்குகளையும் அணைத்து ஒளித்து  வாழ்ந்து வந்தவள். அதுமட்டுமல்ல தனது செயலினைக் கெட்டித்தனமாக வெட்கமின்றிப் பெருமையுடன் பேசித்திரிந்தவள்.

வெளிநாடு ஒன்றுக்குச்  சென்றும் கூட திருந்தாதவள்.  அவள் வாழும் நாட்டில் ,  ஊரில் யுத்தத்தினால் பாதிக்கப்படவைகளுக்காக நிதி சேகரிப்புக்காக எந்த உதவியும் அவள் செய்வதில்லை என்று அறிந்திருக்கிறாள்.

 

கண்டும் காணாது இருந்த கருணைராணியின் அருகில் வந்தவள் அவள் கையினைப் பார்த்து ''என்ன கருணை, அம்மாளுக்கு  அர்ச்சனை செய்யேலையோ'' என்றவள் திரும்பிச்சென்று 5000.00 ரூபாய் கட்டி ஒரு அர்ச்சனைத் தட்டினை கொண்டுவந்து கருணைராணியிடம் நீட்டி கருணைராணியில் கையில் திணித்தபோது,  அவள் திடீரென விலகியதும், அத்தட்டுக்  கீழே வீழ்ந்துவிட்டது.  கருணைராணியைபற்றி அவதூறாகப் பேசுவதற்கு ஜீவராணிக்கு அவல் கிடைத்தமாதிரி. அவள் மேலும் தாறுமாறாகப் பேசிக் கொண்டு சென்றுவிட்டாள்.

 

யாரிடம் முறையிடுவாள் கருணைராணி. மனச்சாட்சி உள்ள கருணைராணிக்குத் துக்கம் தாங்க முடியவில்லை. ஆலய வாசலில் அமர்ந்துகொண்டு தான் வணங்கும் அம்மனிடமே கண்ணீர் மல்க முறையிட்டாள்.

''அம்மாளே , நான் இதுவரையில் எவருக்கும் தீங்கு விளைவிக்கவில்லை.அன்புள்ள சீவன்களை அவர்கள் அன்பினை  என்றும் மதிக்கிறேன். அவர்களைப் போற்றுகிறேன். வாழ்த்துகிறேன். வணங்குகிறேன்.ஆனால் இன்று உனது சந்நிதியில் ஏன் இப்படி நடக்கவேண்டும்''

 என்று புலம்பியவளின்  தோளினை தட்டிய ஒரு மூதாட்டி ''. நான் எல்லாம் கவனிச்சுக்கொண்டு தான் இருந்தனான் பிள்ளை. முருங்கை மரம் ஒன்றுக்கும் உதவாது பிள்ளை. சனத்திற்கு முன்னால தான் ஒரு பக்தை என்று நாடகம் போடும் அவளையும் எனக்குத் தெரியும். இவளைப்போல எத்தினை பேரை என்ர வாழ்க்கையில சந்திச்சிருப்பன் பிள்ளை.   உன்னையும் இங்க  தெரியும் பிள்ளை..  இதுக்கெல்லாம்  கவலைப்படாதை. தையிரியமாய் வீட்டுக்குப் போ பிள்ளை'' என்று ஆறுதல்படுத்தினாள்.   மூதாட்டியின் வார்த்தைகள்  கருணைராணிக்கு கொடுத்த  தைரியத்தில்  அவள் வீடு நோக்கிப் பயணமானாள்.

✍செ.மனுவேந்தன் 

Read More

பொதுப்பணியின் நகைச்சுவை நடிகர் ''விவேக்''

💥நடிகர் விவேக்கினுள் இத்தனை விடயங்களா!!💥
vivek 

                                   

தமிழ் திரைப்படத்துறையில் ‘சின்னக்கலைவாணர்’ என அழைக்கப்படும் விவேக் அவர்கள், தமிழ் சினிமா உலகில் ஒரு புகழ்பெற்ற நகைச்சுவை நடிகர் ஆவார். நகைச்சுவையில் சமூக சீர்த்திருத்தக் கருத்துக்களை உட்படுத்தி, சினிமா ரசிகர்களை சிரிக்கவைத்ததோடு மட்டுமல்லாமல், சிந்திக்கவும் வைத்தவர். ‘பாளையத்து அம்மன்’, ‘லவ்லி’, ‘அள்ளித்தந்த வானம்’, ‘யூத்’, ‘காதல் சடுகுடு’, ‘விசில்’, ‘காதல் கிசு கிசு’, ‘பேரழகன்’, ‘சாமி’, ‘திருமலை’ போன்ற திரைப்படங்கள் நகைச்சுவைக் கலந்த சிந்தனைக்கு எடுத்துக்காட்டாகும். தமிழ் சினிமாவில் மட்டுமல்லாமல் திரைப்படத்துறை வரலாற்றிலேயே, நகைச்சுவை வாயிலாக சமூகத்திற்கு நல்ல கருத்துக்களை சொல்லுவதில் வல்லவர், ‘கலைவாணர் என்.எஸ் கிருஷ்ணன்’ அவர்கள். அவரைப் பின்பற்றி, தான் நடித்த பெரும்பாலானப் படங்களில் லஞ்சம், மக்கள் தொகை பெருக்கம், அரசியல் ஊழல்கள், மூட நம்பிக்கை போன்றவற்றை கருப்பொருளாகக் கொண்டு, சமூக சிந்தனைக் கருத்துக்களைப் பெருமளவில் கடைபிடித்து, தமிழ் சினிமாவில் ‘சின்னக்கலைவாணர்’ எனப் போற்றப்பட்டார். திரைப்படத்துறையில் இவர் ஆற்றிய பங்களிப்பிற்காக இந்திய அரசு இவருக்கு ‘பத்ம ஸ்ரீ விருது’ வழங்கி கௌரவித்தது. ஒரு நாடகக் கலைஞனாகத் தன்னுடைய வாழ்க்கையைத் தொடங்கி, பின்னர்  தமிழ் சினிமாவில் நகைச்சுவையோடு கலந்த பல சமூகக் கருத்துக்களை விதைத்து, மக்களிடையே விழிப்புணர்வை ஏற்படுத்தி, சுமார் 25 ஆண்டுகளுக்கும் மேல் சிறந்த நகைச்சுவை கலைஞனாக தன்னுடைய ஆளுமையை கோலோச்சி வரும் விவேக்கின் வாழ்க்கை வரலாறு மற்றும் திரைத்துறைக்கு அவர் ஆற்றியப் பங்களிப்பினை விரிவாகக் காண்போம்.

பிறப்பு

“சின்னக் கலைவாணர்” என அழைக்கப்படும் விவேக் அவர்கள், 1961  ஆம் ஆண்டு நவம்பர் 19  ஆம் நாள் இந்தியாவின் தமிழ்நாடு மாநிலத்திலுள்ள மதுரையில் பிறந்தார். இவருடைய முழு பெயர் விவேகானந்தன் ஆகும்.

ஆரம்ப வாழ்க்கை மற்றும் கல்வி

தன்னுடைய பள்ளிப்படிப்பை மதுரையில் முடித்த சின்னக்கலைவாணர் அவர்கள், பிறகு அதே ஊரிலுள்ள அமெரிக்கன் கல்லூரியில் வர்த்தக இளங்கலைத் துறையில் பி.காம் பட்டம் பெற்றார். அதே துறையில், எம்.காம் முதுகலைப் பட்டமும் பெற்ற அவர், சிறிது காலம், தொலைப்பேசி ஆபரேட்டராக மதுரையில் வேலைப்பார்த்து வந்தார். அதன் பிறகு, சென்னைக்கு வந்து சேர்ந்த அவர், டி.என்.பி.எஸ்.சி குரூப் 4 தேர்வில் வெற்றிப்பெற்று, சென்னைத் தலைமை செயலகத்தில் ஜூனியர் உதவியாளராகப் பணியில் சேர்ந்தார்.

கலையுலகில்  அவரின் பயணம்

 madras humour club என்ற அமைப்பில் இல் stand up காமெடியனாக தனது நகைச்சுவை திறனை வெளிப்படுத்தி வந்தார்.இவரின் திறமையினை கண்டு வியந்த கிளப்பின் தலைவர், இயக்குனர் பாலச்சந்தர் அவர்களிடம் விவேக்கை அறிமுகம் செய்து வைத்தார்.

 ஆரம்பத்தில் சிறிய கதை எழுத வைத்து விவேக் அவர்களை சோதித்த  இயக்குனர் பாலசந்தர் அதன்பிறகு சிறிய வேடங்களில் ,திரையில் நடிக்க இடம் கொடுத்தார்.

1987 ஆம் ஆண்டு, ‘மனதில் உறுதிவேண்டும்’ என்ற திரைப்படத்தின் மூலம், தமிழ் சினிமா துறையில் கால்பதித்த சின்னக்கலைவாணர் அவர்கள், அத்திரைப்படத்தில் ஒரு சிறிய கதாபாத்திரத்தை ஏற்று நடித்தார். அதன் பிறகு, 1989 ஆம் ஆண்டு வெளிவந்த ‘புது புது அர்த்தங்கள்’ திரைப்படத்தில், இவர் பேசிய ‘இன்னைக்கு செத்தா நாளைக்கு பால்’ என்ற வசனம் இவரைப் பிரபலப்படுத்தியது. அதனைத் தொடர்ந்து, ‘ஒரு வீடு இரு வாசல்’, ‘புது மாப்பிள்ளை’, ‘கேளடி கண்மணி’, ‘இதய வாசல்’, ‘புத்தம் புது பயணம்’ எனப் பல படங்களில் நடிக்கத் தொடங்கினார். ஒரு காலகட்டத்திற்குப் பிறகு, வெறும் நகைச்சுவையை மட்டும் வெளிபடுத்தும் காட்சிகளில் நடிக்காமல், நகைச்சுவையில் சமூக சீர்த்திருத்தக் கருத்துக்களை உட்படுத்தி, சினிமா ரசிகர்களை சிரிக்கவைத்ததோடு மட்டுமல்லாமல், சிந்திக்கவும் வைத்தார். ‘உனக்காக எல்லாம் உனக்காக’, ‘திருப்பதி ஏழுமலை வெங்கடேசா’, ‘உன்னருகே நானிருந்தால்’, ‘ஆசையில் ஓர் கடிதம்’, ‘சந்தித்த வேளை’, ‘கந்தா கடம்பா கதிர்வேலா’, ‘பெண்ணின் மனதைத்தொட்டு’, ‘பாளையத்து அம்மன்’, ‘சீனு’, ‘லூட்டி’, ‘டும் டும் டும்’, ‘விஸ்வநாதன் ராமமூர்த்தி’, ‘பூவெல்லாம் உன் வாசம்’, ‘அள்ளித்தந்த வானம்’, ‘ஷாஜகான்’, ‘மனதைத் திருடிவிட்டாய்’, ‘தென்காசிப் பட்டணம்’, ‘யூத்’, ‘ரன்’, ‘காதல் சடுகுடு’, ‘சாமி’, ‘விசில்’, ‘தென்னவன்’, ‘தூள்’, ‘பாய்ஸ்’, ‘திருமலை’, ‘பேரழகன்’, ‘அந்நியன்’, ‘சிவாஜி’, ‘பசுபதி மே/பா ராசக்காபாளையம்’, ‘சண்டை’, ‘படிக்காதவன்’, ‘பெருமாள்’, ‘குரு என் ஆளு’, ‘ஐந்தாம் படை’, ‘தம்பிக்கு இந்த ஊரு’, ‘சிங்கம்’, ‘பலே பாண்டியா’, ‘உத்தம புத்திரன்’, ‘சீடன்’, ‘மாப்பிள்ளை’, ‘வெடி’ போன்ற திரைப்படங்கள் இவருடைய நகைச்சுவை நடிப்பில் வெளிவந்த குறிப்பிடத்தக்க திரைப்படங்கள்.

சின்ன கலைவாணர் விவேக்

இவருடைய நகைச்சுவை பெரும்பாலும் லஞ்சம், மக்கள் தொகை பெருக்கம், அரசியல் ஊழல்கள், மூட நம்பிக்கைப் போன்றவற்றை கருப்பொருளாகக் கொண்டு இருப்பதால், இவரை சினிமா ரசிகர்கள் ‘சின்னக்கலைவாணர்’ என்றும், ‘மக்களின் கலைஞன்’ என்றும் அடைமொழியிட்டு அழைக்கின்றனர். ‘பாளையத்து அம்மன்’, ‘லவ்லி’, ‘அள்ளித்தந்த வானம்’, ‘யூத்’, ‘காதல் சடுகுடு’, ‘விசில்’, ‘காதல் கிசு கிசு’, ‘பேரழகன்’, ‘சாமி’, ‘திருமலை’ போன்ற திரைப்படங்கள் இதற்கு சான்றுகளாகும். அதுமட்டுமல்லாமல், தன்னுடைய சொந்த வாழ்க்கையிலும் சமூக நலனைக் குறிக்கோளாகக் கொண்டு வாழ்ந்து வரும் விவேக் அவர்கள், ‘நாட்டில் வறட்சி ஏற்பட்டதற்கு நாம்தான் காரணம், வறட்சியைப் போக்கும் வகையில் சுமார் ஒரு கோடி மரக்கன்றுகளை நடுவேன்’ எனக்கூறி அவ்வப்போது இத்திட்டத்தினை செயல்படுத்தி மற்றவர்களுக்கு முன்மாதிரியாகத் திகழ்ந்து வருகிறார்.

அவர் நடித்த சில திரைப்படங்கள்

‘மனதில் உறுதி வேண்டும்’, ‘புது புது அர்த்தங்கள்’, ‘கேளடி கண்மணி’, ‘இதய வாசல்’, ‘ஜென்ம நட்சத்திரம்’, ‘உழைப்பாளி’, ‘பாஸ் மார்க்’, ‘வீரா’, ‘புதிய மன்னர்கள்’, ‘வனஜா கிரிஜா’, ‘பொங்கலோ பொங்கல்’, ‘எங்க முதலாளி’, ‘நந்தவன தேரு’, ‘மாயாபஜார் 1995’, ‘இளைய ராகம்’, ‘பெரிய இடத்து மாப்பிள்ளை’, ‘மைனர் மாப்பிள்ளை’, ‘தினமும் என்னை கவனி’, ‘காதல் மன்னன்’, ‘மறுமலர்ச்சி’, ‘உன்னுடன்’, ‘நாம் இருவர் நமக்கு இருவர்’, ‘நினைவிருக்கும் வரை’, ‘பூமகள் ஊர்வலம்’, ‘வாலி’, ‘விரலுக்கேத்த வீக்கம்’, ‘உனக்காக எல்லாம் உனக்காக’, ‘அதாண்டா இதாண்டா’, ‘திருப்பதி ஏழுமலை வெங்கடேசா’, ‘உன்னருகே நானிருந்தால்’, ‘ஆசையில் ஓர் கடிதம்’, ‘ஏழையின் சிரிப்பில்’, ‘சுதந்திரம்’, ‘தை பொறந்தாச்சு’, ‘முகவரி’, ‘அலைபாயுதே’, ‘சந்தித்த வேளை’, ‘கந்தா கடம்பா கதிர்வேலா’, ‘குஷி’, ‘பெண்ணின் மனதைத்தொட்டு’, ‘பட்ஜெட் பத்மநாபன்’, ‘பாளையத்து அம்மன்’, ‘சீனு’, ‘லூட்டி’, ‘மின்னலே’, ‘எங்களுக்கும் காலம் வரும்’, ‘டும் டும் டும்’, ‘சூப்பர் குடும்பம்’, ‘மிடில் கிளாஸ் மாதவன்’, ‘லவ்லி’, ‘தில்’, ‘விஸ்வநாதன் ராமமூர்த்தி’, ‘பூவெல்லாம் உன் வாசம்’, ‘அள்ளித்தந்த வானம்’, ‘ஷாஜகான்’, ‘மனதைத் திருடிவிட்டாய்’, ‘விவரமான ஆளு’, ‘அழகி’, ‘தென்காசிப் பட்டணம்’, ‘யூத்’, ‘ரன்’, ‘காதல் சடுகுடு’, ‘சாமி’, ‘பார்த்திபன் கனவு’, ‘விசில்’, ‘தித்திக்குதே’, ‘தென்னவன்’, ‘தூள்’, ‘பாய்ஸ்’, ‘திருமலை’, ‘பேரழகன்’, ‘அந்நியன்’, ‘வணக்கம் தலைவா’, ‘பரமசிவன்’, நீ வேணும்டா செல்லம், ‘சிவாஜி’, ‘பசுபதி மே/பா ராசக்காபாளையம்’, ‘சண்டை’, ‘படிக்காதவன்’, ‘பெருமாள்’, ‘குரு என் ஆளு’, ‘ஐந்தாம் படை’, ‘தம்பிக்கு இந்த ஊரு’, ‘சிங்கம்’, ‘பலே பாண்டியா’, ‘உத்தம புத்திரன்’, ‘சீடன்’, ‘மாப்பிள்ளை’, ‘வெடி’.

பொதுப்பணி

நடிகர் விவேக் ஒரு நடிகர் என்பதையும் தாண்டி, அப்துல் கலாம் அவர்களின்  வார்த்தையினை வேத வாக்காக கொண்டு  '' நாட்டில் வரட்சிக்கு காரணம் நாங்கள் தான் என்று கூறும் விவேக் வரட்சியை போக்கும் வகையில் 1 கோடி மரக்கன்றுகள் நடுவேன்  என்று கூறி அத் திட்டத்தை செயல்படுத்தும் வகையில் ''கிரீன் கலாம் ''என்ற அமைப்பை ஏற்படுத்தி கடந்த 10 ஆண்டு காலத்தில் 30 இலட்சம் மரக்கன்றுகளை நாட்டி சாதனை புரிந்ததுடன்,தொடர்ந்து அதை நிறைவேற்றியவாறு  மற்றவர்களுக்கு முன் மாதிரியாக திகழ்கிறார்.

மதுரை மாவட்டம் உசிலம்பட்டி கிராமத்தில் 100 ஆண்டுகள் பழமை வாய்ந்த மரம் பட்டுப்  போவதை அறிந்து அங்கு சென்று அம்மரத்திற்குரிய ஆலோசனைகளை அறிந்து  வைத்தியம்  செய்து அதை மீண்டும் துளிர்விட செய்தார்.

விவேகானந்தரையும்,அப்துல் கலாமையும் தம் குருவாகக் கொண்டு சமுதாயத்தில் நல் மாணவர்களை உருவாக்க அரும் பாடுபட்டு வருகிறார்.

விருதுகளும், மரியாதைகளும்

இந்திய அரசால் ‘பத்ம ஸ்ரீ’ விருது.

அனைத்து நேர விருப்பமான நகைச்சுவை நடிகருக்கான ‘விஜய் விருது’.

2002-ல் ‘ரன்’, 2003ல் ‘சாமி’, 2004-ல் ‘பேரழகன், 2007-ல் ‘சிவாஜி’ போன்ற திரைப்டங்களுக்காக சிறந்த நகைச்சுவை நடிகருக்கான ‘ஃபிலிம்ஃபேர் விருது’.

‘உன்னருகே நானிருந்தால்’, 2002-ல் ‘ரன்’, 2003ல் ‘பார்த்திபன் கனவு’, 2007-ல் ‘சிவாஜி’ போன்ற திரைப்டங்களுக்காக தமிழ் நாடு அரசின் மாநில விருது வழங்கப்பட்டது.

சிறந்த நகைச்சுவை நடிகருக்கான ‘தேசிய தமிழ் திரைப்பட விருதுகள்’ பெற்றார்.

சிறந்த ஆண் நகைச்சுவை நடிகருக்கான ‘எடிசன் விருது’.

சிறந்த நகைச்சுவை நடிகருக்கான ‘கொடைக்கானல் பண்பலை வானொலி விருது’.

சிறந்த நகைச்சுவை நடிகருக்கான ‘ஐ.டி.எஃப்.ஏ விருது.

1990-களின் தொடக்கத்தில் துணை நடிகராகத் தமிழ் சினிமாவில் நடிக்கத் தொடங்கி, இப்பொழுது பிரபல நகைச்சுவை நடிகராக விளங்குகிறார். இவருடைய நகைச்சுவைக் காட்சிகள் வெறும் பொழுதுபோக்குக்காக மட்டுமல்லாமல், வாழ்வியலை ஒரு சில நொடிகளிலேயே புரிய வைக்கும் ஆற்றலை உண்டாக்கியவையாகும். நகைச்சுவையில் கருத்துக்களை மட்டும் வழங்குவதில் இவர் வள்ளலாக இருந்துவிட வில்லை, தமது வாழ்க்கையிலும் ஒரு சில சமூக நலக் குறிக்கோள்களை கடைபிடித்து, அதனை செயல்படுத்தியும் வருகிறார். குறிப்பாகச் சொல்லப்போனால், தமிழ் சினிமாவில் பல கலைஞர்கள் உருவாகி, சாதித்து, மறைந்திருக்கலாம், ஆனால், என். எஸ். கிருஷ்ணன் அவர்களுக்குப் பிறகு, நகைச்சுவையில் பல சீர்த்திருத்த கருத்துக்களை திரைப்படங்களில் துணிவோடு எடுத்துக் கூறியவர் விவேக் என்று சொன்னால் அது மிகையாகாது.

மறைவு

இவர் 16 ஏப்ரல் 2021 அன்று மாரடைப்பு காரணமாக சென்னை வடபழனியில் உள்ள ஒரு தனியார் மருத்துவமனையில் அனுமதிக்கப்பட்டார், ஆனால் சிகிச்சை பலனின்றி 17 ஏப்ரல் 2021 அதிகாலை 4.30 மணிக்கு காலமானார்.

📂தொகுப்புசெ.மனுவேந்தன் 

Read More