மகாவம்சத்தில் புதைந்துள்ள....(பகுதி 12)

உண்மைகளும், வரலாற்று சான்றுகளும் 


ஆறாம் அத்தியாயம் / விஜயன் வருகையில் [CHAPTEE VI / THE COMING OF VIJAYA ] 
 "மற்றவர்கள் அங்கும் இங்குமாக ஓடி விட்டனர். ஆனால் அவள் [விஜயனின் தாய்], சிங்கம் வந்த அதே பாதையில் ஓடினாள் .... தூரத்தில் சிங்கம் அவளைப் பார்த்தது. உடனே காமவெறி சிங்கத்தைப் பற்றிக்கொண்டது. வாலைக் குழைத்துக் [ஆட்டிக்] கொண்டும், காதுகளை மடக்கிக் கொண்டும் அவளை நோக்கி வந்தது ....  அவளைத் தனது முதுகின் மீது சுமந்து கொண்டு வேகமாகத் தனது குகையைச் சென்றடைந்தது. அங்கு சிங்கம் அவளுடன் கூடியது. இந்தக் கூடலின் விளவாக ராஜகுமாரி இரட்டைக் குழந்தைகளைப் பெற்றெடுத்தாள். ஒன்று ஆண் [சீகபாகு / சிங்கபாகு /Sihabahu / Sinhabahu] ; ஒன்று பெண் [சிங்கசீவலி / சீகவலி / Sinhasivali or Sihasivali]. [the other folk fled this way and that, but she fled along the way by which the lion had come ...  love (for her) laid hold on him, and he came towards her with waving tail and ears laid back ...  took her  upon his back and bore her with all speed to his cave, and there he was united with her, and from this union with him the princess in time bore twin-children, a son and a daughter.] என்றும் அதன் பின் தன் தந்தையான சிங்கத்தை, சிங்கபாகு கொன்று, தன் உடன்பிறந்த சகோதரியான சிங்கசீவலியை மணந்து, ராணியாக்கி, நாளடைவில் சிங்கசீவலி பதினாறு முறை இரட்டைக் குழந்தைகளாகப் பெற்றாள். மூத்தவன் விஜயன் இரண்டாவது சுமித்த ஆகும். எல்லோருமாக முப்பத்திரண்டு மகன்மார்கள் .....  [ As time passed on his consort bore twin sons sixteen times, the eldest was named Vijaya, the second  Sumitta; together there were thirty-two sons ..... ] என்றும் மற்றும் ஏழாம் அத்தியாயம் விஜயனின் பட்டாபிஷேகத்தில் [CHAPTER VII / THE CONSECRATING OF VIJAYA ], தேவர்களுடைய பெரும் சபையில், மாமுனிவரும், பேச்சாற்றல் உடையவர்களிலேயே மிகச் சிறந்தவருமான புத்தபெருமான், அவருடைய  நிர்வாணத்துக்கான படுக்கையிலே படுத்திருந்துகொண்டு, தம் அருகில் நின்ற சக்கனிடம் (இந்திரன்) "சிங்கபாகு" வின் மகன் விஜயன் லால நாட்டிலிருந்து எழுநூறு பேர்களுடன் இலங்கைக்கு வருகிறான். தேவர்கள் தலைவனே!  இலங்கையில் என்னுடைய மதம் நிலை நிறுத்தப்படுவதற்காக, அவனையும் அவனைச் சேர்ந்தவர்களையும் இலங்கையையும் கவனமாகப் பாதுகாத்து வருவாயாக." என்று கூறினர். ததாககர் [புத்தபெருமான்] கூறிய இவ்வார்த்தைகளைக் கேட்ட தேவராஜன், அவரிடம் கொண்ட மரியாதை காரணமாக இலங்கையைப் பாதுகாக்கும் பொறுப்பை நீல தாமரை மலர் போன்ற மேனி வண்ணம் படைத்த *தேவனிடம் [நீல வண்ணமுடைய - விஷ்ணு] ஒப்படைத்தான் [(Tathagata) was lying on the bed of his nibbana, in the midst of the great assembly of gods, he, the great sage, the greatest of those who have speech, spoke to Sakka (Indra, king of the gods) who stood there near him: ' Vijaya, son of king Sihabahu, is come to Lanka from the country of Lala, together with seven  hundred followers. In Lanka, O lord of gods, will my religion be established, therefore carefully protect him with his followers and Lanka. When the lord of gods heard the words of the Tathagata he from respect handed over the guardianship of Lanka to the god who is in colour like the lotus (Visnu)] என்கிறது. ஆகவே நாம் இங்கு சிங்கம் [மிருகம்] மனிதனுடன் குடும்ப வாழ்வு நடத்துவதையும்,மீண்டும் தேவ லோகத்தையும், இந்திரன், விஷ்ணு போன்ற இந்து மத கடவுள்களையும் காண்கிறோம்.
ஆனால் கிறிஸ்து பிறப்பதற்கு ஆறு நூற்றாண்டுகளுக்கு முன்பு இந்து மதம், சமண மதம் சூழலில் பிறந்து வாழ்ந்து, அவைகளின் நடவடிக்கைகள், போதனைகளில் திருப்தி அற்றவராகி, அதிக போக வாழ்க்கை, ஞானத்தினைக் கொண்டுவராது என்றும், அதேபோல மிக நெடிய தவமும் ஞானத்தினைக் கொண்டு வராது என்றும் உணர்ந்து, எனவே அவை இரண்டையும் தவிர்த்து, ஒரு மத்திம மார்க்கத்தைக் கடைப்பிடிக்க வேண்டும் என்றும் மற்றும் நான்கு உயரிய சத்தியங்களைப் புரிந்துகொண்டு அவற்றையும் கடைப்பிடிக்க வேண்டும் என்றும் போதித்தவர் சித்தார்த்தர். அது மட்டும் அல்ல, தானே ஞானோதயம் [அறிவொளி] பெற்று, நிர்வாண நிலையை, அதாவது ஆசாபாசங்களிலிருந்தும் துயரங்களிலிருந்தும் விடுபட்டு பூரண அமைதியையும் ஞானோதயத்தையும் அடைந்து மக்களுக்கு வழியும் காட்டினார். மேலும் இவர்.மரணப் படுக்கையில் தன் சீடர்களுக்கு “எவருடைய உதவியையும் நாடாமல் சத்தியத்திலே தன்னந் தனியாக நின்று முக்தியை நாடித் தேடுங்கள்.” என்று கூறியதாக ஒரு தகவலும் உண்டு. ஞானோதயம் தெய்வத்திடமிருந்து வருவது இல்லை, ஆனால் நல்ல சிந்தனை, நல்ல செயல்கள் ஆகியவற்றை வளர்த்துக் கொள்ள ஒருவர் எடுக்கும் சொந்த முயற்சியிலிருந்து தான் வருகிறது என்பது புத்தரின் கருத்தாகும். கடவுளைப் பற்றி அவர் அதிகமாக எதுவும் சொல்லவில்லை. புத்தர் என்றுமே தன்னை ஒரு தேவன் என்றோ, கடவுளின் அவதாரம் என்றோ கூறிக்கொண்டதில்லை. தான் புத்த நிலையை அடைந்த ஒரு மனிதன் என்பதையும், புவியில் பிறந்த மானிடர் அனைவருமே இந்த புத்த நிலையை அடைய முடியும் என்பதையும் தெளிவாக வலியுறுத்தினார். ஆசையே துன்பத்தின் அடிப்படை, என அவர் கூறினார். 
"புத்தன்" என்ற சொல்லுக்கு "விழித்தெழுந்தவன்", "ஒளியினைக் கண்டவன்" என்று பொருள் ஆகும். அதேபோல "ததாகதர்" என்பதற்கு உண்மையை அறிந்தவர் என்று பொருள். "தான்", "தனது" என்ற நிலையிலிருந்து விலகுவதையே "விடுதலை" அல்லது "நிர்வாண நிலை" என்றுரைப்பர். இந்த உண்மை நிலையில் நின்று நாம் மேலே கூறியவற்றை அலசும் பொழுது, கட்டாயம் இவை புத்தரின் போதனைக்கும் நம்பிக்கைக்கும் புறம்பாகவே, ஏற்கமுடியாததாகவே காட்சி அளிக்கிறது. எனவே இதற்கு ஏதாவது உள்நோக்கம் மகாநாம தேரருக்கு இருந்து இருக்கும் என்பதை உறுதிப்படுத்துகிறது. அதன் விளைவு தான், இன்று இலங்கையில் பர்மாவில் நடப்பவையாகவும் இருக்கலாம்? என்றாலும் அது நியாயமான இலங்கையை ஆண்ட மன்னர்களின் விபரங்களை, சரி பிழைகள் இருந்தாலும் ஓரளவு வரிசைக் கிரமமாக தருகிறது. அது மட்டும் அல்ல, மிகவும் நாகரிக இலங்கை பழங்குடி மக்களான நாகர்கள், இயக்கர்களைப் பற்றிய தகவல்களை தரும் சில அரிய நூல்களில் இதுவும் ஒன்று ஆகும்.

 -கந்தையா தில்லைவிநாயகலிங்கம்-/-அத்தியடி, யாழ்ப்பாணம் 

பகுதி: 13 தொடரும்

'ஸ்மார்ட்- காண்டாக்ட் லென்ஸ்’:

'ஸ்மார்ட் வாட்ச்' போல வருகிறது 'ஸ்மார்ட்- காண்டாக்ட் லென்ஸ்’: வசதிகள், சிக்கல்கள் என்ன?


இப்படிக்  கற்பனை செய்து பாருங்கள்.

நீங்கள் ஒரு நிகழ்ச்சியில் உரையாற்றத் தயாராக இருக்கிறீர்கள். ஆனால், அது குறித்து நீங்கள் எழுதி வைத்துள்ள குறிப்புகளைப் பார்ப்பதற்காக நீங்கள் குனிய வேண்டியதில்லை. அதற்குப் பதிலாக, உங்கள் கண்களிலேயே நீங்கள் படிக்க வேண்டிய குறிப்புகள் திரையில் ஓடுவதைப் போல ஓடுகின்றன. இது எப்படி இருக்கும்?

எதிர்காலத்தில் இதுவும் நடக்கும் என்கிறார்கள் ஸ்மார்ட் 'காண்டாக்ட் லென்ஸ்' ( contact lenses) தயாரிப்பாளர்கள்.


"நீங்கள் ஓர் இசைக் கலைஞர். உங்கள் கண்ணிலேயே பாடல்வரிகளோ அல்லது ஸ்வரங்களோ ஓடுகின்றன. அல்லது, நீங்கள் ஒரு தடகள வீரராக இருக்கிறீர்கள். உங்களுக்கு தேவையான பயோமெட்ரிக்ஸ், நீங்கள் ஓடிய தூரம் மற்றும் உங்களுக்கு தேவையான விவரங்கள் கிடைக்கின்றன. நினைத்துப் பாருங்கள்," என்று ஸ்மார்ட் 'காண்டாக்ட் லென்ஸ்களை' உருவாக்கிவரும் மோஜோ நிறுவனத்தைச் சேர்ந்த ஸ்டீவ் சின்க்ளேர் கூறுகிறார்.


அவரது நிறுவனம் மனிதர்கள் மீது ஸ்மார்ட் காண்டாக்ட் லென்ஸ்கள் பயன்படுத்தி சோதனையைத் தொடங்க உள்ளது. இதை அணிபவர்களுக்கு, அவர்கள் கண்கள் முன் வரிகள் மிதப்பது போல இருக்கும்.


இந்த தயாரிப்பின் ஸ்க்லரல் லென்ஸ் (Scleral Lens) (கண்ணின் வெள்ளைப்பகுதி வரை நீண்டு இருக்கும் ஒரு பெரிய லென்ஸ்) பயனரின் பார்வையை சரி செய்கிறது. இதில் ஒரு சிறிய மைக்ரோ எல்இடி டிஸ்ப்ளே (MicroLED Display), ஸ்மார்ட் சென்சார்கள் மற்றும் திட-நிலை பேட்டரிகள் ஆகியவற்றையும் இருக்கும்.


"உண்மையில் பயன்படுத்தப்படும், அணியக்கூடிய அம்சங்கள் கொண்ட 'முழுமையான' ஸ்மார்ட் கான்டாக்ட் லென்சை நாங்கள் உருவாக்கியுள்ளோம் . விரைவில் அதை நாங்கள் சோதிக்க இருக்கிறோம்," என்கிறார் சின்க்ளேர்.


"இப்போது இதில் ஒரு சுவாரசியமான விஷயம் உள்ளது. நாங்கள் இதன் செயல்திறனை மேம்படுத்தத் தொடங்குகிறோம். நாள் முழுவதும் நாம் இதை அணியலாம் என்று நிரூபிக்க இதை நீண்ட நேரம் பயன்படுத்தி பார்ப்போம்," என்கிறார்.


ஒருவரது உடல்நிலை குறித்த தரவுகளைச் சேகரிக்க மற்ற ஸ்மார்ட் லென்ஸ்கள் உருவாக்கப்படுகின்றன.


இந்த லென்ஸ்கள் "ஒருவரது உடல்நலம் குறித்த சுய கண்காணிப்பு, கண் அழுத்தம் மற்றும் குளுக்கோஸைக் கண்காணிக்கும் திறனை உள்ளடக்கியிருக்கலாம், " என்று கொலம்பியா பல்கலைக்கழகத்தின் ஆப்டோ மெட்ரிக் அறிவியல் பயிற்றுவிப்பாளர் ரெபேக்கா ரோஜாஸ் கூறுகிறார். உதாரணமாக, நீரிழிவு நோயாளிகளுக்கு அவர்களின் குளுக்கோஸ் அளவை கண்காணித்துக்கொண்டு இருக்க வேண்டும்.

நீரிழிவு நோய் முதல் கண் நோய் வரை உள்ள நோய்களுக்கு, அவர்களின் நோய்களை கண்டறிந்து சிகிச்சையளிக்கக்கூடிய லென்ஸ்களை உருவாக்கும் ஆராய்ச்சியும் நடந்து வருகிறது. புற்றுநோய் இருப்பவர்களுக்கு, புற்றுநோய் தொடர்பான மூலக்கூறுகள், குளுக்கோஸ் அளவு போன்ற பயோ மார்கர்களை கண்காணிக்கவும் இது உதவலாம்.


சர்ரே பல்கலைக்கழகத்தில் உள்ள ஒரு குழு, ஒரு ஸ்மார்ட் 'காண்டாக்ட் லென்ஸை' உருவாக்கியுள்ளது. அதில், ஒளியியல் தகவல்களை பெறுவதற்கான போட்டோ-டிடெக்டர்கள் (photo detector), கருவிழி தொடர்பான நோயைக் கண்டறிவதற்கான வெப்பநிலை சென்சார், கண்ணீர் திரவத்தில் குளுக்கோஸ் அளவைக் கண்காணிக்கும் குளுக்கோஸ் சென்சார் ஆகியவை உள்ளன.


"மிக மெல்லிய அடுக்குடன் நாங்கள் அதை மிகவும் தட்டையாக உருவாக்குகிறோம். மேலும் சென்சார் லேயரை நேரடியாக காண்டாக்ட் லென்ஸில் வைக்கலாம். ஆகவே, அது நேரடியாக கண்ணை தொடும், என்று சர்ரே பல்கலைக்கழகத்தில் பயோ எலக்ட்ரானிக்ஸ், ஆற்றல் சேமிப்பு பிரிவின் விரிவுரையாளர் யுன்லாங் சாவோ கூறுகிறார்.


"இது வளையும் தன்மை கொண்டதால், இதை அணிவது மிகவும் வசதியாக இருப்பதைப் போல உணர்வீர்கள். மேலும் நேரடி தொடர்பு இருப்பதால், இது மிகவும் துல்லியமான உணர்திறன் முடிவுகளை அளிக்க முடியும், " என்று டாக்டர் சாவோ கூறுகிறார்.


இந்த ஸ்மார்ட் லென்ஸ் தொழில்நுட்பம் குறித்து கேட்க நன்றாக இருந்தாலும், இது இன்னும் பல தடைகளை கடக்க வேண்டும்.

அதில் ஒன்று, பேட்டரிகள் மூலம் அவற்றை இயக்குவது தொடர்பான சவால். இவை நினைத்துப் பார்க்க முடியாத அளவுக்கு சிறியதாக இருக்க வேண்டும். அப்படி சிறியதாக இருக்கும்போது அது பயன்படும் வகையில் இருக்குமா என்பதையும் பார்க்க வேண்டும்.

மோஜோ அதன் தயாரிப்பை இன்னும் சோதித்து வருகிறது. ஆனால் வாடிக்கையாளர்கள் அவர்களின் லென்ஸ்களை ரீசார்ஜ் செய்யாமல் நாள் முழுவதும் அணிய வேண்டும் என்றும் அந்த நிறுவனம் விரும்புகிறது.

"நீங்கள் லென்ஸ்கள் மூலம் தகவல்களை தொடர்ந்து பெறாமல், நாள் முழுவதும் சிறிது நேரம் அவ்வப்போது பெற வேண்டும் என்பதுதான் எதிர்பார்ப்பு. அது உங்கள் ஸ்மார்ட்போன் அல்லது ஸ்மார்ட் வாட்ச் போலவே, ஒரு பேட்டரியின் திறன் எப்படி, எவ்வளவு முறை பயன்படுத்தப்படுகிறது என்பதைப் பொறுத்தது. " என்று நிறுவனத்தின் செய்தித் தொடர்பாளர் விளக்குகிறார்.

இதில் இருக்கும் மற்றொரு விஷயம் என்னவென்றால், 2014 ஆம் ஆண்டு கூகுள் நிறுவனம், ஸ்மார்ட் கண்ணாடிகளை அறிமுகப்படுத்தியதில் இருந்து தனியுரிமை பற்றிய பிற விஷயங்களை கருத்தில் கொள்ள வேண்டும். கூகுளின் இந்த முயற்சி தோல்வியும் அடைந்தது.

"முகத்திற்கு முன்னே இருக்கும் கேமராவை கொண்ட எந்தவொரு சாதனமும் பயனர் படங்களை எடுக்க அல்லது வீடியோவை பதிவுசெய்ய அனுமதிக்கும். இது எதிரில் இருப்பவர்களின் தனியுரிமைக்கு ஆபத்தை விளைவிக்கிறது," என்கிறார் ஆக்சஸ் நவ் (Access Now) என்ற டிஜிட்டல் உரிமைகள் விழிப்புணர்வு குழுவின் மூத்த கொள்கை ஆய்வாளர் டேனியல் லியூஃபர்.

"ஸ்மார்ட் கண்ணாடிகள் மூலம், சுற்றி இருப்பவர்களைப் பதிவு செய்யும்போது, அவர்களுக்கு சமிக்ஞை அளிக்க சில வாய்ப்புகள் உள்ளன. உதாரணமாக, சிவப்பு எச்சரிக்கை ஒளி. ஆனால் காண்டாக்ட் லென்ஸ்கள் மூலம் அத்தகைய அம்சத்தை எவ்வாறு செயல்படுவது என்பதைப் பார்ப்பது மிகவும் கடினம்," என்கிறார் அவர்.


இது தவிர, அதன் தயாரிப்பாளர்ள் லென்ஸ் அணிந்தவர்கள் பற்றிய தரவு-பாதுகாப்பு குறித்த கவலைகளையும் கொண்டிருப்பார்கள்.


ஸ்மார்ட் லென்ஸ்கள் பயனரின் கண் அசைவுகளைக் கண்காணித்தால் மட்டுமே அவற்றின் செயல்பாட்டைச் செய்ய முடியும். மேலும் இதுவும் அவர்களைப் பற்றய மற்ற தரவுகளை அதிக அளவில் வெளிப்படுத்தும்.


"இந்தச் சாதனங்கள் நான் எதைப் பார்க்கிறேன், எவ்வளவு நேரம் அவற்றைப் பார்க்கிறேன், ஒரு குறிப்பிட்ட நபரைப் பார்க்கும்போது என் இதயத் துடிப்பு அதிகரிக்கிறதா அல்லது ஒரு குறிப்பிட்ட கேள்வியைக் கேட்டால் எவ்வளவு வியர்க்கிறது என்பதைப் பற்றிய தரவுகளைச் சேகரித்து பகிர்ந்தால் என்ன செய்வது?," என்று லியூஃபர் கேட்கிறார்.

"எங்கள் பாலியல் நிலைப்பாடு முதல் விசாரணையின் கீழ் நாங்கள் உண்மையைச் சொல்கிறோமா என்பது வரை தனிப்பட்ட விஷயங்கள் அனைத்தும் சேகரிக்கப்படும்," என்று அவர் மேலும் கூறுகிறார்.

ஏஆர் (ஆக்மென்டட் ரியாலிட்டி) கண்ணாடிகள் அல்லது ஸ்மார்ட் காண்டாக்ட் லென்ஸ்கள் போன்ற சாதனங்கள் மிகவும் தனிப்பட்ட தரவுகளின் சாத்தியமான களாமக பார்க்கப்படும் என்பது எனது கவலை." என்கிறார்

கூடுதலாக, வழக்கமான லென்ஸ்க்கள் அணியும் எவருக்கும் நன்கு தெரிந்த தயாரிப்பு பற்றிய கவலைகளும் உள்ளன.

"எந்த வகை கான்டாக்ட் லென்ஸும் சரியாகப் பராமரிக்கப்படாவிட்டாலோ அல்லது சரியாகப் பொருத்தப்படாவிட்டாலோ கண் ஆரோக்கியத்திற்கு ஆபத்தை ஏற்படுத்தும்.

மற்ற மருத்துவ சாதனங்களைப் போலவே, நோயாளிகளின் ஆரோக்கியத்திற்கும் முன்னுரிமை அளிக்கப்படுவதை நாம் உறுதிப்படுத்த வேண்டும். மேலும் எந்த சாதனம் பயன்படுத்தினாலும் ஆபத்தை விட அதிக நன்மைகள் இருப்பவையாக இருக்க வேண்டும்." என்கிறார் கொலம்பியா பல்கலைக்கழகத்தைச் சேர்ந்த ரோஜாஸ்.

"லென்ஸ் பராமரிப்பை முறையாக செய்யாமல் இருந்தல், நீண்ட நேரம் அணிந்திருப்பது பற்றி நான் கவலையடைகிறேன். இவை எரிச்சல், வீக்கம், தொற்றுகள் அல்லது கண் ஆரோக்கியத்திற்கு ஆபத்து போன்ற சிக்கல்களுக்கு வழிவகுக்கும்", என்கிறார்.

மோஜோவின் லென்ஸ்கள் ஒரே நேரத்தில் ஒரு வருடம் வரை பயன்படுத்தப்படும் என எதிர்பார்க்கப்படும் நிலையில், சின்க்ளேர் இது கவலைக்குரியது என்று ஒப்புக் கொள்கிறார்.

ஆனால், ஸ்மார்ட் லென்ஸ் என்றால் அது போதுமான அளவு சுத்தம் செய்யப்படுகிறதா என்பதைக் கண்டறியவும், அதை மாற்ற வேண்டியிருக்கும் போது பயனர்களை எச்சரிக்கவும் திட்டமிட முடியும் என்று அவர் சுட்டிக்காட்டுகிறார்.

இது தொடர்பாக கண் மருத்துவர்களுடன் சேர்ந்து பணியாற்றவும் இந்த நிறுவனம் திட்டமிட்டுள்ளது.

"நீங்கள் ஒரு ஸ்மார்ட் காண்டாக்ட் லென்ஸ் போன்ற ஒன்றைத் தயாரிக்கத் தொடங்கி, முதல் நாளிலேயே அனைவரும் அதை ஏற்றுக்கொள்வார்கள் என்று எதிர்பார்க்க வேண்டாம்" என்கிறார் சின்க்ளேர்.

"எல்லா புதிய நுகர்வோர் தயாரிப்புகளைப் போலவே இது ஏற்கப்படுவதற்கும் சிறிது காலம் எடுக்கும். ஆனால் நம் லென்ஸ்கள் அனைத்தும் இறுதியில் 'ஸ்மார்ட்' ஆகப் போவது தவிர்க்க முடியாதது என்று நாங்கள் நினைக்கிறோம்." என்கிறார்.

:எம்மா வூல்லாகாட்-/-தொழில்நுட்பம் மற்றும் வணிகச் செய்தியாளர் /பிபிசி 

பழகத் தெரிய வேணும் – 38

 


அன்பைக் காட்டும் வழி: சுதந்திரம் அளிப்பது

குழந்தைப் பருவத்திலிருந்து மனிதனுக்கு இரு முரணான குணங்கள் இயற்கையிலேயே அமைந்திருக்கின்றன.

 

உண்பது, தன் துணியை தானே மடித்து வைத்துக்கொள்வது போன்ற விஷயங்களைத் தாங்களே செய்ய வேண்டும் என்று அடம் பிடிக்கும் குழந்தைகளைப் பார்த்திருக்கிறோம். ஆனால், எதையாவது கண்டு பயந்தாலோ, கீழே விழுந்துவிட்டாலோ, ஓடி வந்து தாயைக் கட்டிக்கொள்வார்கள்.

 

சிறுவர்களாக இருக்கும்போது மட்டுமல்ல, எல்லா வயதிலும் சுதந்திரமும் வேண்டும், பாதுகாப்பும் வேண்டும்.

 

`என் உரிமை!’ என்று முழக்கமிடும் பதின்ம வயதினர் `சுதந்திரம்’ என்று எண்ணுவது தான்தோன்றித்தனமாக நடப்பது.

 

அவர்களுக்குச் சகல வசதிகளும் அளித்து, செலவழிக்கப் பணமும் கொடுக்க வேண்டிய பெற்றோர், `இது எப்படி சுதந்திரம் ஆகும்?’ என்று அலுத்துக்கொள்வதில் நியாயம் இருக்கிறது.

 

ஒருவர் தன் வாழ்க்கையைத் தானே அமைத்துக்கொள்வதுதான் சுதந்திரம். அது பிறர் அளிப்பதல்ல; சுய முயற்சியால் பெறுவது.

 

சில குடும்பங்களில், வயதில் மூத்தவர்கள் சொல்வதை அப்படியே கேட்டு நடக்கவேண்டும் என்ற எதிர்பார்ப்பு உண்டு. அங்கு இளையவர்களுக்கு பேச்சு சுதந்திரம் கிடையாது. வேறு விதமாக யோசிப்பதே குற்றம் என்பதுபோல் வளர்க்கப்படுவார்கள்.

 

பெண்களுக்கோ! கேட்கவே வேண்டாம்.

 

கதை:

கூட்டுக் குடும்பத்தில் வாழ்க்கைப்பட்டாள் காவேரி. திருமணமாகி, இரு குழந்தைகளுக்குப் பின் மேற்படிப்பைத் தொடர்ந்து, பட்டங்களும் பெற்றாள்.

ஆரம்பப் பள்ளி ஒன்றில் அவளை அழைத்தார்கள், தலைமைப் பதவியை ஏற்க.

மாமியாரோ, `நீ வேலைக்குப் போய்விட்டால், குழந்தைகளைப் பார்த்துக்கொள்ள என்னால் முடியாது,’ என்று திட்டவட்டமாகக் கூறினாள்.

பெரியவர்களை எதிர்த்துப் பழக்கமில்லாத காவேரி அடிபணிந்தாள்.

பல ஆண்டுகள் கழிந்தபின், தனக்குப் பொருளாதாரச் சுதந்திரம் கிடைக்காமல் போய்விட்ட வருத்தம் எழுந்தது. `குழந்தைகளையாவது நல்ல விதமாக வளர்க்க முடிந்ததே!’ என்ற சிறு ஆறுதல் கொண்டாள்.

 

அவள் துணிந்திருந்தால், குழந்தைகளைப் பார்த்துக்கொள்ள பணிப்பெண்ணை அமர்த்தி இருக்கலாம். இல்லையேல், தனிக்குடித்தனம் போயிருக்கலாம்.

 

நம் திறமைக்கேற்ப வாழ்க்கையை அமைத்துக்கொள்வது நம் கையில்தான் இருக்கிறது. ஆனால், பலருக்கும் தானே சிந்திப்பதைவிட, பிறரைத் தொடர்வது எளிது.

 

அப்படி அவள் தனிக்குடித்தனம் போயிருந்தால் என்ன ஆகியிருக்கும்?

 

`பெரியவர்களை விட்டுவிட்டு, உனக்கு அப்படி என்னடி வாழ்க்கை?’ என்று ஆசாரமான அவள் குடும்பத்தாரே பழித்திருப்பார்கள்.

 

`பிறர் என்ன சொல்வார்களோ!’ என்று சுயமாகச் சிந்திக்கவே பயந்தால், வாழ்வில் மகிழ்ச்சியோ, பிடிப்போ இல்லாமல் போய்விடுமே!

 

தான் விரும்பியதைப் பிறருக்காக விட்டுக் கொடுத்து, தன் திறமையை முழுவதாக வெளிப்படுத்த முடியவில்லையே என்ற ஏக்கமும் கையாலாகாத உணர்வும் மேலிட வாழ்கிறவர்கள் எத்தனை பேர்!

 

(நாடு தழுவிய நிலையிலும் இதேதான். நம் கருத்து பிடிக்காவிட்டாலும், `பிழைத்துப் போ!’ என்று நம்மைத் தண்டிக்காது விட்டால், அதுவே சுதந்திரம் என்று மகிழ வேண்டியதுதான்).

 

காலம் காலமாகக் கடைப்பிடிக்கப்பட்ட பழக்க வழக்கங்களையோ, எண்ணங்களையோ ஏற்றுக்கொள்ளாது, தன்னம்பிக்கையுடன் நடக்க முயலும் எவருக்கும் கஷ்டங்கள் தவிர்க்க முடியாதவை. அவற்றுக்குப் பொறுப்பேற்கத் தயாராக இருக்கவேண்டும். அதற்கான துணிச்சல் அவசியம்.

 

கதை:

அப்போது நான் கல்லூரியில் படித்துக்கொண்டிருந்தேன்.

அப்போது விரிவுரையாளராக இருந்த மிஸ் சுந்தரவல்லி, “உங்களிடம் படித்த மாணவிகளில் சிறப்பானவள் என்று நீங்கள் யாரை நினைக்கிறீர்கள்?” என்று என் பள்ளித் தமிழ் ஆசிரியை திருமதி கோமளாம்பாளிடம் விசாரித்திருக்கிறாள். (அது தனியார் பள்ளியான கமலாபாய் பெண்கள் பள்ளி. பெங்களூரில்).

பத்து வருடங்களுக்கு ஒரு முறைதான் நிர்மலா போன்ற ஒரு மாணவி கிடைப்பாள்!” என்ற பதில் கிடைத்ததாம்.

மிஸ் சுந்தரவல்லியே இதை என்னிடம் கூறி, “பரீட்சைகளில் நீ அப்படி ஒன்றும் சிறப்பாக எழுதுவதில்லையே! ஏம்மா? தலைவலியா?” என்று போலிப் பரிவுடன் ஒவ்வொரு முறையும் விசாரித்தபோது, எனக்குப் பதிலளிக்கத் தெரியவில்லை.

பல வருடங்களுக்குப் பின் புரிந்தது, அவ்விரு ஆசிரியைகளுக்கும் இடையே இருந்த வேறுபாடு.

 

பள்ளிக்கூடத்தில் எனக்குள் இயற்கையாகவே அமைந்திருந்த எண்ணச் சுதந்திரம் தடை செய்யப்படவில்லை. மாறாக, அது வளரும் விதத்தில் ஊக்கம் அளிக்கப்பட்டது.

 

`நான் சொல்லியது மட்டுமல்லாது, பரீட்சைத்தாளில் சுயமாகக் கருத்து சொல்வதற்கு இவளுக்கு என்ன திமிர் இருக்கவேண்டும்!’ என்று ஆத்திரப்பட்டிருப்பாள் மிஸ் சுந்தரவல்லி.

 

(பட்டப் பரீட்சையில் நானும், இன்னொரு பெண்ணும் மட்டுமே தமிழில் முதல் வகுப்பில் தேர்ச்சி பெற்றிருந்தோம்).

 

கல்வி கற்பதன் நோக்கமே ஒருவர் எதையும் கூர்ந்து கவனித்து, ஆராய்ந்து, ஒரு முடிவுக்கு வருவதுதான்.

 

இது புரியாது, சுயமாகச் சிந்திப்பவர்களை மரியாதை கெட்டவர்கள், கர்வம் கொண்டவர்கள் என்பதுபோல் தண்டித்தால், அது என்ன கல்வி?

 

பெண் எழுத்தாளர்களும் சுதந்திரமும்

ஆண்கள் எப்படி எழுதினாலும் ஏற்கலாம். ஆனால், தமிழ்ப் பெண்களின் எழுத்து ஒரு வரையறைக்குள்தான் இருக்கவேண்டும் என்பது எழுதப்படாத விதி.

 

(ஆங்கிலத்தில் எழுதும் பெண்களுக்குப் பூரண எழுத்துச் சுதந்திரம் உண்டு. அவர்களது உள்ளுணர்வை விவரித்தால் அது தவறாகக் கருதப்படுவதில்லை).

 

கற்பனை விரியும்போது, அதைத் தணிக்கை செய்யாது, அப்படியே எழுத்தில் வடிக்கும்போதுதான் நிறைவு ஏற்படுகிறது.

 

`இது சரியா?’

 

`இப்படி எழுதினால், என் பெயர் கெடுமோ?’

 

இவ்வாறு கலக்கத்துடன் யோசித்து, ஒவ்வொரு வரியையும் திருத்திக்கொண்டே இருந்தால், நாம் எழுதுவதில் முழு மனத்துடன் ஆழ்ந்துபோக முடியுமா? கதையில்தான் என்ன சுவை இருக்கும்?

 

கதைகளில், பெண்கள் முறை தவறி நடக்கிறார்கள் என்பதுபோல் எழுதினால், அந்த எழுத்தாளினியின் நடத்தையில் சந்தேகம் எழுப்புவார்கள்.

 

படைத்தவரின் கைவண்ணத்தைவிட்டு, ஒரு கலைஞரையே வேண்டாத விமரிசனத்திற்கு உள்ளாக்குவது பொறாமையால்தான் என்று தெளிந்தால் போதும். துணிச்சல் அதிகரிக்கும்.

 

அத்தகையவர்களுக்குப் பயந்து, பிறர் மதிக்கவேண்டும் என்றே ஒவ்வொரு செயலையும் புரிவது, அல்லது ஒவ்வொரு வார்த்தையையும் அளந்து பேசுவது என்று பழகிக்கொண்டால், முன்னேறுவது எப்படி?

 

என்னைச் சில பெண்கள் கேட்டிருக்கிறார்கள், “ஆண்களின் சில போக்கைக் கேலி செய்து நீங்கள் (ஆங்கிலத்தில்) எழுதுகிறீர்களே! உங்கள் கணவர் கோபிப்பதில்லையா?” என்று.

 

எரிச்சலுடன், “நான் – எழுத்தாளர்! எனக்குத் தோன்றுவதை, எனக்குச் சரியென்று படும் விதத்தில் எழுதுகிறேன்,” என்று பதிலளிப்பேன்.

 

அன்பும், காதலும்

 

வளர்ந்த பிள்ளைகளோ, தம்பதியரோ, ஒருவர் தான் சொல்கிறபடியே நடக்கவேண்டும் என்று அவரைக் கெட்டியாகப் பிடித்திராது, அவர் போக்கில் விட்டால், அப்படி அளிக்கும் சுதந்திரத்தையே அன்பு என்பேன்.

 

`ஐ லவ் யூ’ என்று வாய்வார்த்தையாகச் சொல்பவர்கள் எத்தனை பேர் இதைக் கடைப்பிடிக்கிறார்கள்?

 

:நிர்மலா ராகவன்-/-எழுத்தாளர், சமூக ஆர்வலர். மலேசியா.

‘’இன்னா நாற்பது’’ -/05/-உலகத்தில் கூடாதவை என்னென்ன...

 

‘’இன்னா நாற்பது’’ என்னும் நூல் ‘கபிலர்’ என்னும் புலவரால் இயற்றப்பட்டது. நாற்பத்தொரு பாடல்களைக் கொண்ட இது பதினெண் கீழ்க்கணக்கு நூல்கள் என அழைக்கப்படும் சங்கம் மருவிய காலத் தமிழ் நூற்றொகுதியுள் அடங்குவது. உலகத்தில் கூடாதவை என்னென்ன என்பது பற்றிக் கூறி நீதி உரைப்பது இந்நூல். இது கி. பி. நான்காம் நூற்றாண்டைச் சார்ந்த நூலாகும். இந்நூல் இன்னிசை வெண்பாக்களால் ஆனது. இதில் நூற்று அறுபத்து நான்கு கூடாச் செயல்கள் கூறப்பட்டுள்ளன.

 


‘’இன்னா நாற்பது’’தொடர்கிறது...

 

வெண்பா:21

ஈத்த வகையால் உவவாதார்க்கு ஈப்பு இன்னா;

பாத்து உணல் இல்லாருழைச் சென்று உணல் இன்னா;

மூத்த இடத்துப் பிணி இன்னா; ஆங்கு இன்னா,

ஒத்து இலாப் பார்ப்பான் உரை. 

 

விளக்கம்:கொடுத்த அளவினால் மகிழாதவர்களுக்குப் பொருள் கொடுத்தல் துன்பமாம். பகுத்து உண்ணுதல் இல்லாதவனிடம் சென்று உண்ணுதல் துன்பமாம். முதுமையுற்ற பருவத்தில் நோய்ப்படுத்துதல் துன்பமாம். அவ்வாறே வேதத்தை ஓதுதல் இல்லாத அந்தணனின் செயல் துன்பமாம்.

 

 

வெண்பா:22

யானைஇல் மன்னரைக் காண்டல் நனி இன்னா;

ஊனைத் தின்று ஊனைப் பெருக்குதல் முன் இன்னா;

தேன் நெய் புளிப்பின் சுவை இன்னா; ஆங்கு இன்னா,

கான் யாறு இடையிட்ட ஊர்.

 

விளக்கம்:யானைப் படையில்லாத அரசரைப் பார்த்தல் மிகவும் துன்பமாகும். உடலைத்தின்று உடல் வளர்ப்பது மிகவும் துன்பமாகும். தேனும் நெய்யும் புளித்துவிட்டால் துன்பமாம். அவ்வாறே காட்டாறுக்கு இடையில் உள்ள ஊர் மிகவும் துன்பமாம்.

 

 

வெண்பா:23

சிறை இல்லா மூதூரின் வாயில் காப்பு இன்னா;

துறை இருந்து ஆடை கழுவுதல் இன்னா;

அறை பறை அன்னர் சொல் இன்னா; இன்னா,

நிறை இலான் கொண்ட தவம். 

 

விளக்கம்:மதில் இல்லாத ஊரைக் காப்பது துன்பமாம். குடிநீர்த் துறையில் ஆடை கழுவுதல் துன்பம். பாறை போன்றோரது சொல் மிகவும் துன்பமாம். ஐம்பொறிகளை அடக்கிக் கொள்ளத் தெரியாதவனது தவம் துன்பமாகும்.

 

 

வெண்பா:24

ஏமல் இல் மூதூர் இருத்தல் மிக இன்னா;

தீமை உடையார் அயல் இருத்தல் நற்கு இன்னா;

காமம் முதிரின் உயிர்க்கு இன்னா; ஆங்கு இன்னா,

யாம் என்பவரோடு நட்பு.

 

விளக்கம்:காவலற்ற ஊரில் வாழ்தல் மிகவும் துன்பமாகும். தீச் செய்கையுடையவரது அருகில் இருத்தல் மிகவும் துன்பமாகும். காமநோய் முற்றினால் உயிர்க்குத் துன்பமாகும். அவ்வாறே, நான், எனது என்பாரோடு தங்கியிருத்தல் துன்பமாம்.

 

 

வெண்பா:25

நட்டார் இடுக்கண்கள் காண்டல் நனி இன்னா;

ஒட்டார் பெருமிதம் காண்டல் பெரிது இன்னா;

கட்டு இலா மூதூர் உறைவு இன்னா; ஆங்கு இன்னா

நட்ட கவற்றினால் சூது.

 

விளக்கம்:நட்புக் கொண்டவர்களுடைய துன்பங்களைப் பார்ப்பது துன்பமாம். பகைவரது பெருமிதத்தைப் பார்ப்பது மிகவும் துன்பமாகும். உறவினர் இல்லாத பழைய ஊரில் வாழ்தல் துன்பமாகும். அவ்வாறே சூதாடுவது துன்பமாகும்.

 

‘’இன்னா நாற்பது’’தொடரும்

 

தேட‌ல் தொட‌ர்பான தகவ‌ல்க‌ள்:

இன்னா நாற்பது - பதினெண் கீழ்க்கணக்கு, இன்னா, துன்பமாம், துன்பமாகும், மிகவும், ஆங்கு, அவ்வாறே, இலக்கியங்கள், காண்டல், நாற்பது, இல்லாத, இருத்தல், பதினெண், கீழ்க்கணக்கு, சென்று, ஊரில், வாழ்தல், பார்ப்பது, மூதூர், சொல், உண்ணுதல், உணல், சங்க, கழுவுதல், தவம்